India ram nghawrnghingtu : KATHUA RAPE CASE

Kathua rape case an tih chu Jammu & Kashmir-a cheng hmeichhe naupang kum 8 leka upa, ruk bo a, pawngsual hrep hnu a thahna chungchang leh a hnu lam thu kal zel chanchin a ni ber a. He thil thleng hi a rapthlak em avang leh, a hnu lama thil thlen zel danin mipui lung a tih awi loh em avangin India ram pum a dengchhuak a ni.

Eng thil nge thleng?

He hmeichhe naupang duhawm tak, Asifa Bano (8) hi chenna nghet nei mumal lova vak kual reng thin (an ran vulhte ei tur awmna lam apianga pem kual mai thin) Bakarwal ho zinga mi a ni a. A ruang an hmuhchhuah hma chawlhkar khat kalta vel atanga bo niin, Police-ah report a ni na a, police lamin an ngaihsak tha duh lawk lo a. April, 2018 a he thila inhnamhnawihte laka case siam a nih chauhin ram pum hriat a hlawh ta a ni. Hetia he thila inhnamhnawihte ni a ngaihte man an nih hnu hian an mi mante thlavang hauh a lungawi lohna nasa taka lantir a ni a. Mak takin he lungawilohna an lantirnaah hian Jammu & Kashmir-a BJP Minister ni lai mek pahnih an la tel zui a. A boruak a sosan tak hnuah heng Minister pahnihte hi minister an nihna atangin an bang zui ta bawk.

Background
Crime Branch lamin an chhuina atang chuan he hmeichhe naupang laka pawikhawihna leh tihhlumna hi helai area atanga Bakherwals hnam ho umchhuah tumna niin a lang a. He thila an rinhlelh lian ber pakhat phei chu Bakherwals hovin Rasana khuaa ram an lei tur dodaltu langsar tak a ni nghe nghe a ni.

Complaint
Jammu-a Senior Superintendent of Police-in charge sheet a thehluh atanga a lan danin 12 January 2018 daih tawh khan Asifa Bano-i pa, Mohammad Yusuf chuan a fanu bo thu hi Hiranagar police station-ah a report a. A complain dan chuan a fanu kum 8 mi chu Jan. 10, 2018 khan sakawr venga a awm laiin a bo a. Tlai dar 4 vela Sakawrte an lo haw hnuah pawh a lo haw ve ta lo a. Theihtawp a an zawn hnuah an hmuh zawh tak loh avangin FIR an thehlut ta a ni.

Ruang an chhar
January 17, 2018 khan he hmeichhe naupang khawngaihthlak tak ruang hi an awmna khua atanga km.1 vela hlaah an chhar ta mai a. Hetiang a nih hnu hian he case hi Crime Branch lamin an la chhunzawm ta bawk. Hemi hnu lawk hian Police-te chuan he thila inhnamhnawih ni a an hriat mi 8 an man thu an chhuah a, heng zinga 4-te chu police officer an ni nghe nghe. Heng an ni man zinga mi pakhat phei chu kumtling lo a ni nghe nghe. Tin, he thilah hian finfiahna awm thei (evidence) tihchhiat tuma puhin police officer pahnih man an ni bawk. Puitling chin mi 7-te lakah hian April 9, 2018 khan chargesheet thehluh a ni a, Sections 302, 376, 201 leh 120-B of the Ranbir Penal Code hmanga charge an ni.

Forensic evidence
Postmortem hi Kathua District hospital-ah neih niin, a taksaah nasa taka sawisakna hnu hmuh a ni a. Pawngsual a nih hmain damdawi hmanga hrai ruih a ni tih hmuhchhuah a ni bawk. Forensic evidence atanga a lan danin he hmeichhe naupang hi he thila inhnamhnawih ni a ngaihte zinga pakhatin a enkawl lai mek Temple-ah ni engemawzat hren a ni a, he temple-ah hian hmeichhe naupang sam zai hmuhchhuah a ni. Tin, hetia an hren lai hian mi engemawzatin vawi tamtak an pawngsual bawk. Forensic lam chuan he hmeichhe naupang hi reh hlum a nih thu leh, chumi hnuah a luah lung rit taka chhut a nih thu an tarlang a ni.

Aftermath
He thila mipui thin ti rim zualtu ber chu hnu thup tumna lian tak awm leh, he thil thleng dem zawng ni lo, a titu ni a hriat, an mante thlavang hauha Right-wing Hindu groups-ten na taka hma an la leh, chu hmalaknaa State BJP Minister-te Forest Minister Lal Singh Chaudhary leh Industries Minister Chander Prakash-te meuh an inrawlh te, heng miten Police-te chargesheet thehlut tur an tibuai te, Ukil-te meuh pawhin dodaltute an thlawp zawk hi a ni a. Tin, he hmeichhe naupang laka nunrawnna vawrtawp thlenna hmun Temple a lo ni kher hian boruak a vaw alh nasa hle bawk.


Jammu & Kashmir mai ni lo, India ram hmun hrang hrangah he thil thleng duhlohna hi lantir a ni a. Media lamah nasa taka demna thu tarlan a ni a. J & K CM chuan hnuchhuina hna chu rang taka zawhfel a nih tur thu a sawi a, he thila inhnamhnawihte chu thih thlenga hremna hial pek a duh thu a sawi bawk. April 13 khan PM Modi leh Supreme Court pawhin he thil thleng an dem thu leh, rorelna dik hlenchhuah ngei nise an duh thu an sawi a. UN Secretary-General Antonio Guiterres meuh pawhin a dem thu a sawichhuak bawk.

Communal tension
He thil thleng hian Jammu & Kashmir-ah hnam leh sakhua inbeihna a thlen chiam ang tih hlauhawm tak a ni. Bakarwal ho hi Muslim hnam tenau niin, Hindu ho chen tamna Kathua District a awm an ni si a. He thil thleng hi Bakarwal Muslim ho hnawh bo tumna thiltih ni ngeia police lamin an sawi bawk si avangin boruak a sosang hle a ni.
He case a inhnamhnawih ni a puhte hi April 16 (Thawhtanni) khan Court-ah hruai niin an pha nasa hle a. Dawt an sawi leh sawi loh enfiah nan Lie detector khawl hman an ngiat bawk. He case a inrawlhte hi an len em avangin state pawn lama ngaihtuah ngiatna a lian hle bawk. Eng thil nge thleng zel dawn i lo thlir zel ang u.