INDIA INDO THLAWHNA A TLA LEH TA…

Indian Air Force (IAF) thlawhna, Jaguar fighter chu vawiin, June 5, 2018 zing dar 10:30 vel khan Gujarat-a Kutch bulah chesualin a tla a, pilot a boral. Thlawhna tlakna hmun hi ran tlatna hmun a nih avangin ran engemawzatin an thih phah bawk.

Defence thupuangtu sawi danin he Jaguar thlawhna hi Air Commodore Sanjay Chauhan-a khalh niin, tih dan phung pangngai a routine training mission a thlawkchhuak a ni a. Jamnagar air base atanga thlawk chhuakin a thlawh chhuah hnu lawkah a tla ta mai niin report a ni.

Thla khat liamna mai khan IAF helicopter pakhat chu Assam a Majuli Island-ah a lo chesual tawh bawk a, pilot pahnih- Wing Commander J James and Wing Commander D Vats-ten an lo boral phah tawh bawk. Tin, April thla khan Uttarakhand-a Kedarnath-ah Mi-17 chopper chesualin mi 6 an lo hliam tawh a, May 23 khan Jammu and Kashmir-a Natha Top-ah IAF helicopter pakhat a lo chesual tawh bawk a ni.

IAF SEPECAT Jaguar

Jaguar fighter hi British leh French kutchhuak niin, lei lam beihna (ground attack) a ni a, variant hrang hrang siamchhuah a ni. Speed 1,350 kmph (ri let 1.3) in a thlawk thei a, hmelmate ram chhung thuk tak thlenga va bei thei tura duan a ni nghe nghe. He thlawhna hi a upa tawh hle a, Indian Air Force (IAF) hian kum 1979 atang khan (kum 39 chhung) an lo hmang ngar ngar tawh a. A siamtu ram pahnih air force-ten an hman bakah India, Oman, Ecuador leh Nigeria-ahte thawnchhuah a ni a, heng ram zingah hian India chauh hi la hmang awmchhun a ni. Kum 1960 chho a siamchhuah a nih tirh chuan jet trainer atana siam a ni a, a lo that vei fu si avangin fighter tha taka chherchhuah a ni a. Gulf War leh khawvel hmun hrang hranga buaina thlengah tangkai taka hman a lo ni tawh thin a ni.

A siamchhuaktute pahnih – French leh British-te hian 2005 leh 2007 khan an lo chawlh tir tawh a, Dassault Rafale leh  Eurofighter Typhoon in an lo thlak fel tawh a ni.