HMINGMAWIZUALA, MCS TOPPER 2017

Mizoram Public Service Commission (MPSC) chuan December 15, 2017 khan Mizoram Civil Service (Combined Competitive) Exam, 2017 result a tichhuak leh ta a. MCS atan mi 5 tlingin, Mizoram Finance & Account Service (MF & AS) atan mi 2 leh Mizoram Information Service (MIS) atan mi pakhat an tling a ni. A pumpuia pakhatna Hmingmawizuala hi Mizoram pel miah lova lehkha zir, Matric leh Class XII second division a pass a ni a nghe nghe…

Hmingmawizuala hi kum 1989 June 29 khan Pu C.Thanglura (Forest Guard) leh Pi Lalrintluangi (Housewife) te fa tlum ber niin a lo piang a. English Medium pawh kal mumal lo leh tunlai ngaih a school a thaah pawh kal lovin, Mizoram a competitive ngaihhlut ber MCS Exam-ah pakhatna a ni thei a ni.

ZIRNA LAM

Khawbung-ah Primary School atanga High School a chhuah thlengin a kal a. Champhai a school lar tak, GM HSS-ah class XI zir zawm mah se, HSSLC erawh Auxillium HSS (tuna Boston HSS ni ta) Aizawl atangin II Division-ah a pass thung. Matric (HSLC) pawh Khawbung High School atangin II Division-ah a lo pass tawh tho bawk.

Zirna lama a hun hmasa hi a chhuanawm fahran bik lo hle a. High School leh Higher secondary school a kal laite chuan zirlai thiamthei chungchuang tak ni pawhin a lang chuang lo tih a result atangin a hriat theih. Amaherawhchu, a pawimawh chin tak takah, college chinah a thiamna nasa takin a tipung a, zirna awmzia a man chho ta ni berin a lang.

HSSLC II Div.-a a pass hnu hian Pachhunga University College-ah B.Sc (Mathematics) a zir zawm a, B.Sc (Mathematics) hi tha taka pass-in, Mizoram University hnuaiah ti tha berin gold medalist a ni. Mizoram University-ah vek hian M.Sc (Mathematics) a zirzawm leh nghal a. Hei pawh hi tha taka pass-in, gold medalist a ni leh bawk.

COACHING

M Sc (Mathematics) a zawhfel hnu hian kum chanve vel a chawl a, chumi hnuah Delhi lamah Civil Service Coaching kalin kum chanve vel a zu tal ve a. Coaching hi a kal kual nasa hle a, test chi hrang hrang a nei nasa hle.

English medium a kal ngai lo, Mizo medium chhuak a nih avangin English-ah tan lak a ngai a ni tih a inhre chiang hle a. English a hmasawn tumin theihtawp a chhuah ta a. Grammar, idioms & phrases leh a dang tamtak uluk taka zir nawn lehin, word hriat tam hrim hrim tum pawhin nasa takin a bei a. Lehkhabu a hmuh theih ang ang a khawm zel bawk.

Delhi a Coaching a kal hian a pui nasa hle a. Civil Service lam la hawi ngai lo, Science background nei a nih avangin civil service competitive exam kalphung hrim hrim a hriatchian phah nasa hle.

EIZAWNNA

Delhi lama Coaching a zu kal zawh hian kum 2015 January thla atangin Synod HSS, Mission Vengthlang-ah Mathematics lecturer hna a thawk nghal a, MCS Exam tura a inbuatsaih chhung zawng zawng pawhin a hna hi a chawlhsan lo a ni.

A LO HLAWHCHHAM VE TAWH THIN

Kum 2015 leh 2016 MCS (Combined Competitive) Exam-ahte khan a lo bei ve nasa tawh a. Heng a exam tum hian Preliminary Exam leh Main Exam-ahte inziak tling mah se, interview-ah a tla leh thin a. Mahse, beidawng mai lovin a bei zel a, Civil Service Exam a hmachhawn vawi 3-na, 2017 a lo thlen meuh chuan dan rual a ni ta lo a. MCS atan a inziak tling mai ni lovin, a pumpuiah pakhatna (topper) a ni ta hial a ni. Kum 2015 & 2016 chho a Prelim leh Main paltlang vek hnu a interview a a tlak leh thinna chhan hi Main Exam a a tihthat tawk loh vang niin a ngai a ni.

UPSC Civil Service Exam pawh hi a lo bei ve fe tawh bawk a. Preliminary Exam hi vawi engemawzat a lo hmachhawn tawh a. Amaherawhchu, tlin tum tak leh tih tak tak a bei a nih lem loh avangin Prelim a la paltlang thei lo thung.

Kum 2016 a MPSC buatsaih tho Inspector of Taxes Exam te pawh kha hmachhawnin written a paltlang vek hnuah interview-ah a lo tla tawh bawk.

M Sc (Mathematics) ni mah se, MCS Main Exam-ah hian Mizo subject thlangin, Mizo subject hmangin MCS a inziak tling a. Hei hi a interview an hmachhawn tum pawhin a chhan an zawt nghe nghe. A chhan chu eng dang ni lovin, amah thingtlang chhuak, Mizo nunphung hre ve tawk tak a nih vang leh inbuatsaihna a hautak loh deuh zawk vang a ni ber.