Hlawhtlinna leh buaina lalpa Mourinho

Khawvela football manager ropui berte zinga mi Jose Mourinho hian a career-ah club paruk a enkawl tawh a, Champions League vawihnih, league title pariat leh cup 15 zet a chawi tawh. Heti chung hian club pakhat a enkawl rei thei lo hle a, season thum bak a daih thei meuh lo.!

A team enkawl hmasak ber hi an ram (Portugal) club União de Leiria a ni a, kum 2001 July thla khan enkawl tana, thla ruk chiah a enkawl hman. Leiria a chetthat pui avangin kum 2002 January thla khan club lian zawk FC Porto chuan an manager ni turin an laluta, heihi khawvelin a hmelhriatna a ni chho ta bawk. Manager hna a thawh hma hian Benfica-ah kum 2000 September atangin assistant manager hna a thawk tawh a ni.

Mourinho leh hlawhtlinna

Porto:

  • 2001-02: Kum 39 leka upa ni chungin Porto a enkawl tan a, manager-ah chuan a naupang ber pawl a ni. A enkawl tira pangana kha season tawpah pathumna a nih pui.
  • 2002-03: Primeira Liga , Uefa Cup leh Portuguese Cup-ah a champion pui a, football khawvelah a hming a chher tan.
  • 2003-04: Primeira Liga leh Portuguese Super Cup-ah a champion nawn bakah Champions League-ah champion-in a lar chak hle a, season tawp rualin english club lian Chelsea chuan an manager atan an la nghal.

Chelsea:

  • 2004-05: Premier League leh League Cup-ah a champion pui nghal a, Champions League-ah semi-final a thlenpui bawk. ‘Special One’ tih hming a invuah.
  • 2005-06: Premier League-ah champion nawnin, Community Shield an chawi pui.
  • 2006-07: Premier League-ah pahnihna niin, FA Cup leh League Cup champion anih pui a,  Champions League semi-final a thlenpui leh bawk.
  • 2007-08: 2007 September thlaah inbiakremna neiin Chelsea a chhuahsan

Inter Milan:

  • 2008-09: Serie A leh Supercoppa Italiana a chawipui nghal.
  • 2009-10: Serie A , Champions League, leh Coppa Italia -ah champion in Inter Milan chu treble champion a nih pui a, khawvelin Special One an ngaisang hle. Season tawp rualin Inter a chhuahsan a, spanish club lian Real Madrid a zawm.

Real Madrid:

  • 2010-11: Copa del Rey -ah a champion nghal a, La Liga-ah pahnihna niin, Champions League semi-final a thlenpui.
  • 2011-12: Barcelona vanglai dang chatin La Liga champion a nih pui a, Champions League-ah semi-final a thlenpui leh.
  • 2012-13: Supercopa de Espana a lakpui leh a, Champions League-ah a vawithum nan semi-final a thlenpui leh a, Copa del Rey-ah runners-up an ni bawk. Season tawp hmain inremsiamna neiin Real a chhuahsan a, season tawpah a vawihnih nan Chelsea a zawm.

Chelsea:

  • 2013-14: Premier League-ah pathumna a nih pui a, Champions League semi-final a thlenpui bawk.
  • 2014-15: Premier League leh League Cup-ah champion puiin, hunrei zawk Chelsea enkawl tur beisei a ni.
  • 2015-16: Buaina neuh neuh a neih chhoh avangin 2015 December thla-ah Chelsea a chhuahsan.

Manchester United:

  • 2016-17: Europa League leh League Cup-ah a champion pui nghal a, Premier League-ah parukna a ni thung.
  • 2017-18: Premier League leh FA Cup-ah runners-up an ni ve ve.
  • 2018-19: ??

Mourinho leh buaina

A hun hmasa lamah hian buaina a nei lo tih theih a ni a, a hlawhtlinna bul FC Porto a chhuahsan dan pawh hriatreng tlak leh zahawm takin a chhuak. Mahse kum 2006 atang khan Mourinho buaina hi a intan tih theih a ni a, a team enkawla buaina chawkchhuak tu (?) leh ti pun luntu a ni chho ta.!

Tawngkam thlahdah ve tak anih avangin sawi leh sel a ngah hle a, kum 2006-a Chelsea-in AC Milan atanga Andriy Shevchenko an lak khan Mourinho leh club neitupa Roman Abramovich inkarah buaina a awm tan a, Shevchenko hi Mourinho duhzawng nilo, club neitupa duhzawng anih avanga an lei a ni. Mourinho hian a duh loh player an lak chungchangah a vui thu a sawichhuak ta fova, zawi zawiin club chhung boruak a chhiat phah zel a, kum 2007 September thla khan an ban ta nge nge a ni.

Kum 2008-ah Inter Milan enkawlin season hnih ropui takin hun hmang mahse atawp dan erawh buaina bawk a ni leh a, Mourinho chawhchhuah leh bawk a ni. Treble champion a nih pui hnu lawkah Mourinho hian club a chhuahsan tur thu a sawi a, kum hnih lai contract ala neih bawk si avangin Inter hotute an lawm lo hle. Inter chhuahsan a tum chhan hi Real Madrid a enkawl chak vang niin, club pahnihte pawh hian buaina an neih phah a, club president pahnih an inbiak hnuah Real Madrid hian Inter hnenah zangnadawmna £6.8m zet an pe a, Mourinho a chhuak thei hram.

Kum 2010 atangin Real Madrid-ah bul a tan a, beiseina sang tak nen awmin Barcelona kal vung vanglai pawh a titawp hman hial. Mahse season thumnaah buaina a nei leh a, club captain leh fans te ngainat rawn goalkeeper Iker Casillas nen buaina an nei a, a hnampui defender Pepe nen pawh an inngeih lo hman viau. Club boruak a chhiat zel loh nan kum 2013 khan an ban leh ta nge nge a ni.

Buaina nei reng nimahse a hlawhtlinna chan tawhte avangin club enkawl tur erawh a hmu thei hle a, Real a chhuahsan hnuin a vawihnih nan Chelsea a zawm lehnghal. Hetah hian dan pangngai ang bawkin a tir lamah boruak tha tak an nei a, hlawhtlinna te chanpuiin club hotute chuan kum 10 chhung tal Chelsea enkawl tura an duh thu te an sawi hman a ni. Mahse a season thumnaah chuan a zia a chhuak leh a, club doctor Eva Carneiro leh Jon Fearn te nen buaina an nei leh a, court-ah te an inkhing hman zak zak a ni. Heihian club chhungah nghawng thui tak a nei a, a chawk chhuaktu Mourinho bawkin tuar lehin an ban thu an puang leh thuai bawk.

‘Chhura duh loh Naa’n a nei’ tih ang deuhin Mourinho hi Manchester United chuan an manager niturin an la lut vat a, season hmasa berah trophy pahnih a chawipui nghal a ni. Beiseina sang tak nen phur takin kal chho mahse a season thum naah chuan a zia a chhuah chho leh mek a, player thenkhat nen buaina neiin, a duh ang player an leitheih loh avangin buaina a chhuak lek lek reng bawk. United fans tam tak chuan Mourinho hi ban tawh se an ti hial.!

Mourinho hian manager tam tak tih theih loh ti theiin trophy a chawi mawlh mawlh reng a, mahse a game plan defensive lutuk thin hi ngaina lo tu an tam hle. A game plan (Bus park) hi fans te chauh ni loin player te pawh hian an ning ve hle thin niin a lang a, heivang hian season hnih bak tha takin an khel thei meuh thin lo a ni. Tunah pawh Mourinho hi Manchester United fans zingah ning tu an tam leh hle tawh a, club hotuten an la thlawp reng thu thuchhuah an siam a ngai hial. Hetiang dinhmuna a din leh tawh avangin tun season kal mekah, manager zinga a hna chan hmasa ber tura ngai tu an tam hle a ni.

Hetihlai hian football an khelh chhan ber trophy a chawi theih miau avangin club lian pawn an hnar phal chuang lova, kum hnih danah ban tawk fo mahse; hlawh tha tak pe thei club an awm reng thung. ‘Special One’ chu a ni ve chiang e.