High Court-in Technical Seat chungchanga ‘Stay’ order a sut; Medical admission tifel nghal

Gauhati High Court chuan Mizoram sorkarin Mizoram quota technical seat changtu tur thlanna dan a siam The Mizoram (Selection of Candidates for Higher Technical Courses) Rules, 2016 chungchanga August 8, 2018-a stay order a lo siam tawh chu vawiin August 28, 2018 hian a sut leh ta a. Stay order a pek avanga Central pool hnuaia Mizoram quota MBBS seat 18 leh BDS seat 7 bakah MIMERS, Falkawn-a admission a tih fel theih lohte chu tihfel theih  a ni dawn ta a, admission hi August 31 thleng chauh tih theih a ni dawn a ni.  Hetiang a nih avang hian kum 2018 admission bikah chuan Chakma-te pawh The Mizoram (Selection of Candidates for Higher Technical Courses) Rules, 2016 angin Category-II (Non-Zo ethnic Category) ah an awm leh rih dawn ta a ni.

Mizoram sorkar, Higher & Yechnical Education Department-in kum 2015 a The Mizoram (Selection of Candidates for Higher Technical Courses) Rules, 2015 a siamah Chakmate chu Category-II a a dah avangin Mizoram Chakma Students Union (MCSU) chuan Gauhati High Court-ah  PIL an thehlut a. Mizoram sorkarin Rules chu July 16, 2015-ah a hnûhkîr leh avangin High Court pawhin PIL chu a titawp leh a. Mizoram sorkar hian kum 2016 khan Rules hi tichhuak tha lehin, MCSU-te pawhin PIL an thehlut tha leh a. Gauhati High Court (Mizoram Bench) chuan hun eng emaw chen Rules a stay hnuah Chakma-te ukil Court-ah a inlan ngai loh avangin August 2, 2016 khan Rules a stay-na hi a hnukkîr leh ta a ni.

Hetiang a nih avang hian kum 2018-ah pawh Mizoram quota technical seat-te chu The Mizoram (Selection of Candidates for Higher Technical Courses) Rules, 2016 anga hnawhkhah a ni chho ta a. Seat tam zawk hnawh khah a nih lai mekin Chakma zirlai pawlte hian Case hi Mizoram Bench atangin Gauhati lamah suanthlak dilin an ti nung tha leh ta a. Gauhati High Court pawhin Stay order a rawn pe tha leh ta a. Hemi avang hian Mizoramin Central pool hnuaia MBBS seat 18 leh BDS seat 7 a neihte leh MIMERS-a seat thenkhatah admission a ti hman ta lo a, stay order chhuah hma hian NEC aquota leh MIMERS-a admission tam zawk erawh chu tihfel hman a ni thung. Case hi September 25-a ngaihtuah tura tih ni mah se, medical admission hi August 31 thleng chauh tih theih a nih vangin Mizoram sorkar Ukil ngenna angin August 27-ah ngaihtuah a ni leh ta a. High Court chuan stay order a lo pek tawh chu August 28, 2018-ah hian a sut leh ta rih a ni.

Hillsgate-in Mizoram sorkar Ukil JC Lalnunsanga a biaknaah Ukil chuan Mizoram sorkar hian thiam a chang tihna a la ni chuang lo niin a sawi a. Admission dang zawng zawng pawh 2016 Rules anga kalpui a nih vek tawh avanga Stay order sut rih a, admission kaltlang tir rih tura a ngenna anga stay order chu sut a nih rih mai thu a sawi a. Case hi a la kal zel dawn avang leh, Chakma zirlai pawlte hian Supreme Court lama an appeal ngei a rinawm avangin an appeal hma ngei a admission la tihfel lohte tifel nghal tura  Mizoram sorkar chu thurawn a pek thu a sawi bawk. A thurawn ang hian Mizoram sorkar Higher & Technical Education Department official-te chuan admission la tihfel lohte tifel turin Counselling an ko nghal niin hriat a ni nghe nghe. Ukil JC Lalnunsanga hi Gauhati High Court Aizawl Bench-a he case lo buaipui tawhtu tho a ni.

Mizoram sorkar Ukil JC Lalnunsanga leh a nupui fanaute

Central pool hnuaia MBBS seat 18 leh BDS seat 7 Mizoram sorkarin a hmuhnate hi Medical College tha tak tak an nih hlawm avangin MIMERS, Falkawna MBBS admission ti tawh engemawzat pawhin Central pool MBBS seat-te hi duh zawkin admission an ti tha leh niin Hillsgate chuan thu a dawng a. Hetiang a nih avang hian MIMERS-ah seat ruak engemawzat a awm dawn ta a, hengahte hian MBBS seat chang tawh lo tura in ngai mi engemawzatin admission an ti tha leh thei dawn a ni.

Mizoram (Selection of Candidates for Higher Technical Courses) Rules, 2016-ah hian Category-I ah Mizorama Zo hnahthlakte (Zo-ethnic) dah niin, an tan seat 95% hauh a ni a; Category-II ah Zo hnahthlak lote dah niin, an tan seat 4% zuah a ni. Seat 1% chu Mizorama cheng, Central sorkara thawk fate tan dah a ni thung. Category-II a awm Chakma zirlaite zingah hian kum 2018-ah NEET qualify, MBBS admission ti thei tur 7 an awm niin hriat a ni.

Be the first to comment on "High Court-in Technical Seat chungchanga ‘Stay’ order a sut; Medical admission tifel nghal"

Leave a comment

Your email address will not be published.


*