Guardiola hoin record ropui an siam dawn

Football inelna hrang hrang zingah England rama football inelna sang ber, Premier League hi club lian an tam avangin khawvela league khelh harsa ber niin an sawi thin. Champion nih a har em em a, champion thei team pawh an la tam lo hle. Champion tluk zeta harsa, a tha lam zawnga record siam pawh thil ropui tak a ni a, champion bawka record siam bawk chu duhthusam a tih theih awm e. Chutiang dinhmuna ding tur chuan Manchester City an awm mek a, nomawi an chawi tawh a, record siam turin zaninah bul an tan tha leh dawn. An record siam theih hrang hrang te:

Chak hnem ber

Season khat chhungin match 38 theuh an khel a, heta tanga vawi 30 chak thei chu club pahnih; Chelsea leh Manchester City chiah an la awm. Chelsea hi season liamta (2016/17) khan vawi 30 chak neiin record thar an siam a, tun season-ah City hi match 36 atangin vawi 30 an chak tawh a, Chelsea record an nih rual. City hian an home-ah Brighton & Hove Albion an la tum dawn a, match hnuhhnung berah Southampton an luhkhung bawk ang. An khelh leh tur pahnihah hian vawikhat an chak leh anih chuan Premier League record thar an siam dawn a ni.

Sunday zan khan Manchester City chuan 2017/18 Premier League nomawi an chawi a, Premier League nomawi vawi 3 an chawina niin, english top flight-a vawi 5 an champion na chiah a ni bawk.

Point hmu tam ber

Season khat chhunga point hmu tam ber record siamtu hi Chelsea tho an ni a, kum 2004/05 khan point 95 lai an hmu a ni. Kum 10 chuang khum thei an awm loh hnuin tun season City hian khumna hun tha tak an nei a, point 94 hmu tawhin; vawi hnih khelh tur an la neihah point hnih an hmuh theih chuan record thar an siam ang.

Goal thun hnem ber

He record chelh mektu pawh Chelsea leh bawk an ni a, 2009/10 season khan goal 103 zet an thun a, Premier League chanchinah season khat chhunga goal thun hnem ber an ni. Kum 10 dawn record an chelh hnuah City bawkin tun season-ah hian an khum dawnin a lang a, vawi hnih khelh tur la nei chungin goal 102 an thun tawh a, season an hman chhoh dan en chuan City hian record thar an siam a rinawm hle.

City tana league goal thun hnem pathum: Aguero, Sterling, Jesus

Away-a chak hnem ber

Home leh away-ah vawi 19 ve ve an khel a, mahni khelmual (home)-a chak pawh a harsat laiin, midang khelmual (away)-a chak phei chu a harsa lehzual a ni. 2004/05 season khan Chelsea chu away-ah vawi 15 ngawt an chak a, record an siam. Kum 15 dawn an record khum thei an awm lo hnuin City an rawn lang a, vawi 15 chak hi rawn nihrual tawhin, an match hnuhnung berah Southampton an hneh chuan away-ah vawi 16 an chak dawn a, record thar an siam leh ang.
Hei bakah hian away-a point hmu tam ber record pawh City hian an siam nghal thei a, tunah hian away-ah point 47 hmu tawhin, Chelsea record lo siam tawh point 48 chu an khum thei dawn a ni.

Goal difference (GD)

Goal difference chu season khat chhunga an goal thun zat atanga an goal chhuah zat paih a ni. City hian +76 an nei mek a, record awmsa 2009/10 season-a Chelsea-in +71 an neih chu an khum der tawh a ni. Heihi an khelh leh turah ala danglam thei a, goal an thun belh leh chhuah dan a zirin GD hi a la danglam theih avangin season tawp hma chu record anga sawi theih ala ni lo.

Pahnihna nena inthlau ber

Champion team leh pahnihna inkar zau zawng point la tam ber chu 1999/2000 season kha niin, champion Manchester United leh pahnihna Arsenal kha point 18 zetin an inthlau a, record dinglai a ni. Pakhatna leh pahnihna point inthlauhna hian champion that zia a tilang chiag hle a, tunah hian pahnihna United hian City hi point 17-in an pha lo mek a, an record khum tir mai a rinawm hle.

Zanin dar 12:15-ah City hian Brighton an lo mikhual dawn a, hetah hian record thar thenkhat hi kan hmuh a rinawm a, thenkhat erawh season tawp kan nghah thlen phawt a ngai dawn a ni.

Zanin inkhel:

Chelsea v Huddersfield 12:15 AM
Leicester v Arsenal 12:15 AM
Man City v Brighton 12:30 AM
Tottenham v Newcastle 12:30 AM