Green Mizoram Day 2018

Kum 1999 atanga kumtin a Green Mizoram Day hman thin chu kumin ah pawh hman leh niin, vawiin khan Mizoram District hrang hrangah hman a ni a. A hmanna pui ber chu Chief Minister Pu Lal Thanhawla, Chairman, State Level Committee on Green Mizoram leh Forest changtu Minister ni bawk hovin tukin zing khan Chite Lui Kam, Ramthar leh Thuampui inkara Lei bulah neih a ni.

CM Pu Hawla thing phun lai

Chief Minister Pu Lal Thanhawla chuan ramngaw humhalh leh thing phun uar inzirtirna kawnga hmalakna chu 1998 khan Green Aizawl tia vuahin Mizoramah bultan a lo ni tawh a, a kum leh 1999 khan Green Mizoram tia vuahin chuta tang chuan kum tin khaihlak lova Mizoram pumpuia kalpui a nih tak thu a sawi a. Heihi environment humhalh leh siamthat bakah faina leh thianghlimna nen pawh inkungkaih vekin, changkanna a nih thu te, Green Mizoram hmalakna chu state dangte pawhin entawntlak a an ngaih thu te a sawi. Green Mizoram bultan a nih atanga thing phun tawh chu nuai 37 vela chhut a nih thu sawiin Chief Minister chuan a phun mai nilo a humhalhna kawngah pawh tan lak tel a tul thu a sawi a. Monitoring Committee lamin hma an lak that avanga thing phun nung chhuak zat in hma a sawn zel chu lawmawm a ti bawk.

Chief Minister hian kangmei venna kawnga District ti tha te leh Aizawl District huam chhunga mei kawng sial a khaw ti tha te ber te hnenah “Fire Prevention Award” a hlan a. Kangmei venna kawnga District ti tha ber chu Lunglei District niin, pahnihna chu Mamit District an ni a, pathumna chu Serchhip District a ni a. Aizawl District-a kangmei venna kawnga khaw ti tha ber chu Hlimen niin, pahnihna chu Rulchawm an ni a, pathumna chu Sawleng an ni a. District ti tha ber hian lawmman cheng 50,000 bakah thuziak leh Khitea Running Trophy an dawng a. District dang leh khua ten thuziak leh lawmman pawisa fai (pahnihna in cheng 30,000, pathumna in  cheng 20,000) an dawng bawk a ni.

CM Pu Hawla’n Fire Prevention Award a sem

Vawiina Green Mizoram Day-ah hian Chite Lui kama Ceremonial Planting neih bakah Department hrang hrang atanga volunteer ten mahni hmun bik ruahmanah hing an phun bawk a ni. Kumin atan State Level Committee chuan “Thingphun belh la, a awmsa humhalh rawh” tih chu thupui atan thlanchhuak a. Green Mizoram Day hian a hranpa in Logo leh Thupui (Everyone Grow One) a nei hrim hrim bawk a ni. Thing tiak phun te ngaihven a enzuitu Monitiring & Evaluation Committee chu kum 2014 khan din a ni. Report a tarlan danin nikum 2017 khan thing tiak 24,342 phun a ni a, a thlawnin 77,535 sem ni bawkin, heng atang hian 81.45% an dam a ni. Electronic leh Print media kaltangin leh eduction dept nena thawkhova awareness lama hmalak reng a ni bawk.

Tunah hian EF&CC Department hian division hrang hrangah thingtiak kum 2 aia naupang lo nuai 3.38 – a par mawi chi te, a rah ei chite a nei a, sawrkar department leh tlawmngai pawl hrang hrangte phun atan mamawhte chuan a ngaihven theih a ni.

Governor hoin Raj Bhavan-ah hun hman a ni bawk a..

Mizoram Governor Pu Kummanam Rajasekharan chuan ramngaw nei zau berte zinga Mizoram a nihna chu State dangte entawn tura chhunzawm zel turin kalkhawmte a sawm a. Green Mizoram Day-a thing an phun te chu duhtawk mai lovin, a puitlin thlenga enkawl zui turin a chah a. Sik leh sa inthlak danglam avangin Mizoram pawhin harsatna hrang hrang a tawh thu sawiin, heng harsatnate sukiang tur hian mitinin kan phak ang tawk theuhin hma kan lak a ngai a ni, a ti a. World Environment Day 2018 thupui pawh ‘Beat Plastic Pollution’ a nih angin Mizoramin plastic hman tlem kan zir a ngai a ni, a ti bawk.

Tun thla tira Conference of Governors an hman zawh takah khan India Hnampa Mahatma Gandhi kum 150 champhaphak tlin lawm dan tur an sawiho thu a sawi a. Governor chuan Mizoram chu Green Mizoram, Clean Mizoram, Bio Mizoram leh Organic Mizoram nih tir an tum thu a sawi. Heng tihlawhtling tur hian Governor chuan vawiina kalkhawmte leh Mizoram mipuite thawhpuiah a sawm a ni.

Mizoram Governor Kummanam Rajasekharan thingphun lai

Chief Secretary Pu Arvind Ray chuan ramngaw pawimawhnate sawiin, boruak a tithianghlimin, sik leh sa danglam tur a veng a ti a. Mizoram Governor official function hmasa bera a tel thei chu lawmawm a tih thu sawiin, a thurawn la tura sawrkar a inhawn reng thu a sawi bawk.