Graduate hnuah eng kawng nge i zawh dawn? (Part-1)

Mizoramah hian kumtin Graduate thar 2000 vel kan nei reng anga ngaih a ni a (kum 2018-ah MZU hnuaiah ringawt graduate thar 2457 an awm), chutih rualin kum khat chhunga Mizoram a hna (eizawnna tling) kan siam theih zat (sorkar hna leh private hnuaiah) erawh  tlem hle thung.

Eng line berah emaw kan graduate ve ringawt a, tih tur engmah kan hre leh si lo. Mite hriat lohin kan buai ru em em a, hnathawh mumal kan neih loh miau avangin chhungkua leh khawtlangah inthlahrunnain kan khat bawk a. Sorkar hna a vang a, a awm chhunah kan tling thei bawk si lo. Private hnuaia thawh dawn lahin hlawh a tlem lulai lutuk bawk si! Mahni a sumdawnna tan turin a capital tur kan nei lo a, idea/plan kan neih that tawk loh bakah kan idea kan dinchhuahpui ngam hek lo. Engtin nge kan awm zel ang le? Graduate hna hmu lo nih ringawt aiah Master Degree kan zawm leh mai dawn em ni? Nge M.Phil leh Ph.D te kan han thleng law law dawn? Chutiang pawh chu lo zo tehreng pawh ni ila, eng nge kan thawh chuan ang?

Ngaihtuahna sen tak tak a ngai ta a ni! Tunlai khawvel, inelna sang lutuk tawhah hian kan dinchhuah vena tur kawng kan dapchhuah a ngai ta. Chutiang tur chuan engtin nge kan tih ang le? Engtin nge hlawhtling tlakin kan thiamna leh kan hlutna hi kan tih pun tak ang?

Graduate tawh hnu pawh hian hlawhtling tak tak tur chuan kan thiamnate nasa taka kan tih pun a ngai a, nasa taka kan tahhriam a ngai bawk. Chutiang tur chuan a hnuaia point hrang hrangte hi ngun takin chhiar la, i ngaihtuahna sawr bing teh le.

  1. Computer : Computer hi sorkar hnathawk tur phei chuan thiam ngei ngei a ngai ta a, thiam satliah mai ni lovin certificate neih a ngai ta zel mai. Sorkar hna mai pawh ni lo, private hnathawhna tam zawkah pawh computer thiam hi a tangkai em em tawh a ni. Chuvangin, hetiang lam thiamna i la nei lo a nih chuan hna zawnna kawnga i weight tipung turin certificate course engemaw ber tal kal tum ang che.
  2. Language : Eizawnna tha nei thei tur chuan tawng thiam a ngai ta hle a, India ramah phei chuan a bikin English leh Hindi thiam tluk a awm ta lo. Mizo thalaiten phai lama hna hmuh kan harsatna chhan ber pakhat chu ‘tawng thiam tawk loh vang’ a ni fo mai. English pawh thiam ve sawih sawih ni lo, “I think… I think” tih nek nek ngai lo a nal zaiha tawng thei tura inzir a pawimawh hle. English mai bakah Hindi thiam tel hian hna hmuhna kawngah nasa takin a pui thei bawk. Inzir peih deuh tan chuan movie en atangte, news ngaihthlak atang ringawtte pawhin language skill hi nasa taka tihhmasawn theih a ni.
  3. Interview skill : Tunlai hna lakna reng reng chu interview paltlanga lak a ni deuh zel tawh a, chuvangin, interview dan hi a zir a zir tak tak a ngai a ni. Coaching centre thenkhatin course an hawng thin a, tin, mahniin engemawchen inzir theih a ni bawk. Interview skill tipung thei tur thuziak tamtak internet-ah en tur a awm tawh a ni.

  1. Knowledge zau : Hna tha deuh hlek thawk tur chuan khowledge zau tak nih a ngai deuh zel mai. Knowledge ti zau tur hian thla 2/1 zir vak chi a ni ngawt lo a, hun rei tak ngaihven a, chhiar tam a en tam a ngai a ni. Chu chu a bikin competitive exam hmachhawn tum tan chuan tih ngei ngei tur a ni. Mizoram leh India ram chhung mai bakah International news liantham hi chu detail taka hriat ve vek tum a tha. Eizawnna tha tak kan neih hma chu ZIRLAI kan la ni tih hriat reng tur a ni a, inzir nasat deuh deuh zawk tur a ni. Pass tak avanga zirna chawlhsan ringawt tur a ni lo.
  2. Hnaruak ngaihven : Engtik lai pawhin Graduate tana dil theih tur hnaruak a awm reng ang a ngaih a ni a, chutiang hre tur erawh chuan employment news lam kaihhnawih chhiar tam a tha hle. Tin, android phone tamtakah chuan hetiang lama awlsam taka information hmuh zung zung theihna mobile app, playstore atanga download mai tur pawh tamtak a awm tawh a ni. Heng hnaruak hrang hrangte hi chhiar liam mai lovin, eng thiamna nei nge an mamawh tih chik zui a, eng thiamna hi nge nei ve ila hna hmuh awlsam ang tih ngaihtuah a hmalak zui a tha hle.
  3. Zei/Smart : Incheina mai bakah nunphung leh hawiher smart/zei hi hna zawnglai nih chuan a pawimawh khawp mai. A ruaitu tur tana rawih chakawm tak tura smart thlarh a chet hi kan zir a ngai a ni. Mizo thalaite hi kan ngaih a samin mahni invawnna kawngah kan sang lo hle a. Hetiang lamah hian a bikin graduate chinte chuan hma kan sawn a ngai takzet a ni.
  4. Training Programme : Kan skill ti pung thei tur emaw, hna zawnna kawnga kan weight ti rit lehzual thei tur training programme chi hrang hranga tel theih chuan a tha hle a, seminar pawimawh thlengin kan tel theihna awmah chuan tel ve zel a tha. Hengte hi hriatna leh thiamna ril zawk neihna atan a tangkai em em a ni.
  5. Chhiar tam…chhiar tam : Kan tana tangkai tur lehkhabu leh thuziak tha chhiar tam hi a tha em em a; mahse, hei tak hi Mizo thalai tamtakte peih loh ber a ni thung. Kan chhiar tlem luat avangin kan hre tlem a, hre tlem na na na chuan thiam ngaihna a awm loh avangin competition hrang hrangah kan hnufual ta pur pur mai a nih hi. Hlawhtlinna sang tak neih i duh a nih chuan chhiar chhiar ringawt mai teh!
  6. Internet hman tangkai : Internet hi social media khawihna atan chauha hmang hi Mizo thalai zingah engzat tak awm ang maw!! Internet hi lehkha zir nan, lehkhabu tha chhiar nan, kan mamawh zawnkhawm nan, news tangkai hriatna atan, kan tana mi tangkai turte hnuhhnaihna atan, etc hman tangkai tur a ni. Thenrual kawmna atan ringawta internet kan hmang a nih chuan chhiatpui mai loh chu kawng dang a awm lo a ni. Delhi tlangval pakhat chu coaching class kal miah lovin, social media atang ringawta inbuatsaihin, mi inbuatsaihna leh titihona group a tel zelin IAS-ah a inziak tling daih nia!

  1. Tlatfal ngam a ngai : Hna zawng lai kan nih a, hlawhtlinna sang tak, eizawnna tha tak neih kan duh a nih chuan khawtlang leh kohhran, Mizo society-ah inhman dan chin tawk hriat a ngai hle. Kohhran leh khawtlang thil bakah activities hrang hranga kan tel duh a nih pawhin (mi bik kan ni a nih loh chuan) hna zawnglai kan nih chuan active part lak loh a, chanvo pawimawh chelh loh a him ber mai! Chutiang tur chuan tlatfal ngam a ngai a, sawisep tamtak paltlang ngam a ngai bawk. Chutih rualin, heng activities-te hi personality development atan a pawimawh avangin a mawi tawk a tel ve zel hi a thain, Mizo society vawn nun zel nan pawh a tha em em a ni.

(Part-II ah Graduate tana kawng zawh tur chi hrang hrang awm theite leh duhthlanna siam dawna hriat tur pawimawhte kan tarlang leh dawn nia – Editor, Hillsgate)