Success story : ‘Thil theih loh’ ti theitu – GLENN CUNNINGHAM

Khawvel Indopui I-na hunlai kha a ni a, America khawthlang lama thingtlang khaw pakhat Everrets-ah chuan zingkar khawvawt chu a vin thei tak tak hle mai a. He khua a chengte hi thingtlang mi, hawihhawm tak, zingkar atanga tlai ni tlak thlenga rim taka hna thawk thin an ni a. Chu chu an naupan tet atanga an khawsak phung a nih miau avangin khawvawt pawh chu ngaiah an nei thei viau zawk a.

An khaw naupang dangte ang bawkin mipa naupang kum 7 mi lek Glenn Cunningham chu a u, kum 9 a upa Floyed nen an tih theih tawk hna thawkin an buai tuktin ve thin a. Naupangte mah ni se, an tih theih tawk tih chu an tih turah an ngai hmak mai a ni. An hna ber chu an in atanga mel 2 zet a hla a school pakhat a tuktin a mei va chhem chu a ni a. Khua a vawh thin em avangin zirlaite leh zirtirtute thlen hma a mei lo chhem a, room chhung lo tih lum vek chu an hna a ni.

A dik ta tlat lo

Kum 1916 February thla a ni a, zing khua a vawt vin tuk mai a. Tuk dang ang bawkin Floyed leh Glenn-te unau chu mei chhem turin zing hma takah School an lo thleng a, kawngka an kalh a, an khar phui te te a, mei chhem turin an inpuahchah tan ta a.

Thukah chuan thing an han dah khat a, khawnvartui bur chu an la a, a alhchhuah awlsam zawk nan khawnvartui chu an han leih hmasa a. Chu chu tuktin a an tih dan a ni reng reng a.

Mahse, chumi tuk ber kher chuan a dik ta tlat lo! A upa zawk Floyed chuan nawhalh a han nawt a, stove-ah chuan a han thehlut a. Chu veleh a ri ta hluai mai a, invenna hman a awm lo reng reng a ni. Mei chu a alh ta hluai mai a, khawnvartui bur chu a kangkai nghal a, a puak dur a, rang lutukin room chhung hmun tin chu kangmei chuan a man nghal a ni ber e.

Khawnvartui bur ah chuan khawnvartui ni lovin Petrol a lo awm niin!!  (Petrol hi khawnvartui aiin a kang duh a, a chak zawk fe bawk)

Mipa naupang pahnihte chu kangmei chuan rang takin a man nghal a, chhuatah na lutuk tuarin an let nghal der mai a. Petrol puak lah chuan rang lutukin school kawngkapui lam chu a man nghal a, tlanchhuahna tur a phui nghal vek bawk a.

Chumi tuka anmahni hruaitu an u hmeichhia Letha chu school bulhnai maiah hna dang thawkin a awm ve bawk a. Kangmei thawm a hriat vel leh rang takin a lo tlan a, school chu a lo kang hluah hluah tawh mai si! Mangang lutukin a naute chhan tumin a che nghal a, hlauh pawh a hre hman lo!
Kawngkapui chu engtin tin emaw a hawng thei hram a, meialh hluah hluah karah a naute pahnih chu a hnukchhuak ta a ni. Hmun him china a naute a dah hnu chuan tanpuitu dang punin a tlanchhuak leh nghal a,a lo let leh hnu lawkah a upa zawk Floyed chu a boral ta nge nge a.
A naupang zawk Glenn chu darkar engemawzat nikhaw hrelo in a awm a, a taksa hnuai lam a kan nasat em avangin doctor-te chuan a thih ngei an ring nghe nghe.

A thi tlat lo

Mahse, Glenn-a chu a thi tlat lo! A ke tuamkhah luk chungin damdawiinah a lo harhchhuak a, sawifiah thiam rual loh khawpin na a ti lehnghal a. A ke a tih chet theih loh miau avangin a u, Floyed-a zawngin a lu a chet kual nghal a. Mahse, a hmu zo lo…a hmu tawh ngai bawk lo ang.
Damdawiinah chuan chawlhkar tamtak a awm a, a dinhmun a tha lo hle. Nikhaw hrelo in vawi tamtak a awm a, chutianga a awm dawn leh a harhchhuah dawn lai vela a nu leh doctor-te titi chu a lo hre ru thin a. A tirah chuan Doctor-te chuan a damchhuah zawh an rin loh thu an sawi thin a, a damchhuak dawn ni a lan hnuah pawh a kan nasat em avangin ke a a kal tawh ngai loh tur thu leh a ke tan a ngaih hiala an rin thute an sawi bawk a.

Mahse, a nu chuan a fapa, a unaupa chan hlim hlawl chu a ke lehzel chantir chu a phal reng reng lo!
A tawp a tawpah chuan a ke tuamna chu an phelh ve ta a, damdawiin atangin an chhuak ve ta bawk a. Chutia a ke tuamna an han phelh chiah chuan doctor-te beidawnna chhan chu a lo lang ta nghal mai reng a.

Glenn chuan a ke veilam zungtang zawng zawng a hloh vek a, a ke rek lai tak zawmtu ruh a chhe bawk a. Kangmei chuan a khup leh ngal bawra tihrawl awm ve te chu a lo kang chhe vek a. A ke dinglam pawh a chhiat nasat em avangin a ke veilam aiin inches hnih laiin a tawi phah ta bawk a.
Doctor-te chuan an tih theih zawng zawng an ti a. Khatih hunlai khan vun, ruh leh tihrawl thlak thei khawpa thiamna a la san loh miau avang leh, lo tih theih pawh ni tehreng se an chhungkaw dinhmunin a zir loh miau avangin enkawlna tha zawk beisei ngam pawh a ni lo. Chuvangin, wheelchair nena haw tir a ni a, doctor-te chuan a chhungte hnenah a ke chu uluk taka massage thin turin thurawn an pe ringawt mai a. Chu chuan a muangchanga a tihrawl leh tha te a siamthat leh theih an beisei a ni.

A beidawng ve lo

Glenn-a chuan ke a kal leh ngei a tum nghet em em mai a. Na ti chung chungin a pa a massage tir thin a, a ni a hman loh leh a nu a tir leh mai a, an hman loh ve ve chuan a theih ang angin a mahin a massage ngat ngat mai thin a ni.

An chetsual atangin kum 3 zet a liam ta. Kum 1919 nipui lai hian ni khat chu an tih dan pangngaiin a nu in an kawtzawlah boruak thianghlim zawk hip turin a nawrchhuak a. In chhungah a luh san leh mai a, a hnu lawka a lo chhuah leh chuan Glenn-a, kawtzawla a bawkvak hrawt hrawt lai chu a rawn hmu ta mai a.

Thil diklo a awm ni ngeia ngaiin rang takin a tlan a. Mahse, a va thlen rual chuan Glenn-a chu phaitual hnim zing atang chuan huan hungna pal vuan chungin a rawn inbeng kang ta mai a.. A nuin puih tuma a han ban pawh chuan a duh ta hauh lo mai! Huan pal rinchhan chuan a theih ang angin a han in pawt kang a. A ke hmanga din tum chuan a bei ta ngat ngat mai a. Glenn chuan din a tum a ni ringawt lova, a ke hmanga kal leh ngei ngei a tum a ni tih a nu chuan a hrethiam ta a.
Chutiang chuan chumi kar chhung zawng chuan nitin a bei ta ngat ngat mai a, a tawpah chuan harsa takin a dingchhuak thei ta a. Thla a ral zel a, a ke chu a rawn chak chho zel a, huan pal rinchhanin a pen ve ta chhet chhet mai a, a tawpah chuan a mahin a kal ve thei ta hial mai le. Khawvel thiamna in ‘theih loh’ a tih chu a tumruhna hmangin a ti thei ta tlat mai!

‘Theih loh’ ti thei lo Glenn

Thla a vei leh chuan Glenn chu a kal a ni satliah lo, a tlan thei ta hial mai a. A tlan a tlan a, tlan chu nuam a ti em em mai a. Hmun tin maia a tlan reng avang chuan hriat pawh a hlawh hle nghe nghe.
“Tlan lo chuan feet 10 takngial pawh hi ka che sawn hleithei lo a ni ber e. Ka tlan reng mai a ni” a ti.
Chumi hnu lawk chuan mipa naupang, a ke kang chhe vek tawh a an sawi, thi ngei tura ngaih, ke a kal leh tawh ngai reng reng lo tura an lo ngaih, Dr. Glenn Cunningham lo ni ta chuan Madison Square Garden-ah ngei chuan Mel khat tlan thleng rang ber record a rawn siam ta daih mai a ni! Mel khat hi minute 4:06.8 -ah a tlan thleng thei a, he a world record siam hi kum 3 zet a ding nghe nghe (kum 2018 chho a mel khat tlan a world record dinglai chu 3:43.13 a ni a, Morocco mi, Hicham El Guerrouj siam a ni nghe nghe).

Doctor thiamten, “Kein a kal thei tawh ngai lo ang” an tih-a khan Olympic (Berlin 1936) intlansiakah USA aite a awh a, medal-te a dawng leh thei a. Kal thei tawh ngai lo tura an ngaih kha intlansiak zirtirtuah te a tang a, khawvelin a ngaihlu em em a. Doctorate degree-te nei chho zelin, wheelchair  a awm kumkhua tur khan wheelchair a mamawh ta lo!

March 10, 1988-a kum 78 mi a nih a a boral hnuah pawh he a hnehna ropui tak avang hian hriat a la hlawh ta reng a nih hi!

Personal information
Full name Glenn Vernice Cunningham
Nationality American
Born August 4, 1909
Atlanta, Kansas, U.S.
Died March 10, 1988(aged 78)
Menifee, Arkansas, U.S.
Height 5 ft 10 in (178 cm)
Weight 154 lb (70 kg)
Sport
Country United States United States
Sport Athletics
Event(s) 800 m1500 mmile
Team University of Kansas
Retired 1940
Achievements and titles
Highest world ranking 1st
Personal best(s) 800 m – 1:49.7 (1936)
1500 m – 3:48.2 (1940)
Mile – 4:04.4 (1938)

Life Summary of Glenn Cunningham

  • Kum 8 mi lek a nihin school building kangah nasa takin a kang a. Doctor-te chuan ke a kal leh tawh ngai reng reng lo tur tiin an sawi a.
  • Mahse, kum 3 hnuah kein a kal leh a, a kal a ni satliah lo, a tlan thei leh ta tlat!
  • High School a kal laiin intlansiakah tel ve in, mel khat tlan thleng rang ber record a siam a. Chumi hnuah chuan Kansas University-ah a zir zawm a, a chanchin in mi a hneh em avanga scholarship pek an tum zawng zawngte chu a hnar vek a. A mamawh chu amah ngeiin thawhchhuah a tum tlat…
  • Kum 1932 Olympics-ah metre 1,500 intlansiakna ah a tel ve a, khua a vawh lutuk avangin a tlan hlei thei lova, 4-na a ni pha tho.
  • Kum 1936-ah a athletes puiten “Most Popular Athlete” ah an thlang hial.
  • University of Iowa atangin Master degree a zo a, New York University atangin physical education-ah doctorate degree a dawng leh bawk.
  • New York Madison Square-a intlansiak vawi 31 awmah vawi 21 chu hnehna a chang a, hei pawh hi a hunlai chuan record a ni. Mel khat a tlan thlen ran ber chu kum 1938 a Dartmouth track meet-ah niin 4:04.4-ah a thleng a ni.
  • Kum 1940-ah Olympic-a tel leh tura a inbuatsaih laiin Olympic an cancelled leh hlauh a, intlansiak a chawlhsan ve nghal a, Iowa a Cornell College-ah tlan zirtirtu-ah a tang zui nghal.
    Indopui II-na hunlai khan kum 2 chhung chu Navy-ah a tang ve.
  • Kansas, USA-ah a hun tawp a hmang a. Glenn Cunningham Youth Ranch siamin naupang harsatna tawkte a tanpui nasa hle. Kum 1988-a a boral khan a nupui nen naupang 9000 chuang an enkawl hman a ni.

Be the first to comment on "Success story : ‘Thil theih loh’ ti theitu – GLENN CUNNINGHAM"

Leave a comment

Your email address will not be published.


*


This site uses Akismet to reduce spam. Learn how your comment data is processed.