Saidingpuii Chhakchhuak, IAS

(Mizoram atang hian UPSC Civil Service Exam paltlanga IAS a direct a inziak tling nalh nalh thei hi kan nei khat ta hle a. Kan neih hnuhnun ber chu kum 2014-a IAS-a inziak tling, Grace Lalrindiki Pachuau d/o Vanhela Pachuau kha a ni. Grace-i hma a tling awm hnaivai leh ber chu kum 2006-a inziak tling Dr. Franklin Laltinkhuma a ni leh mai! Pu R.Lalvena IAS leh Dr. Christina Z Chawngthu te hi kum 2001 a inziak tling an ni bawk. Kum 10 chhungin direct IAS pahnih chauh kan nei a, kum 20 chhungin 6 chauh kan nei thei bawk! Chuvangin, a personal life chu eng pawh ni sela, he IAS Officer chhuanawm tak hlawhtlinna kawng hi zirlaite cho nan kan han chhuah nawn leh a ni. Students’ Outlook Magazine June 2008-a tihchhuah tawh a ni e)

Saidingpuii Chhakchhuak hi kum 1981 March 19 khan Pu C.Lalhmingthanga leh Pi Vanlalbuki te inkarah a lo piang a. Unau panga, mipa pali leh hmeichhia pakhat niin amah hi a naupang ber dawttu a ni.

Class VII thleng P.C.Girls-ah kalin, St.Pauls Higher Secondary School atangin HSLC a pass a, 69.2% a hmu a ni. Higher Secondary erawh chu St.Thomas Girls School, Kolkata atanga pass-in mark 80.6% a hmu leh a. College hi Presidency College, Hyderabad atangin 54.3% hmuin kum 2002 khan a graduate thung.

Kum 2002-a BA a pass hnu hian Hyderabad-a Brain Tree-ah Coaching Class a kal nghal a. Kum 2003 khan MCS pawh exam ve nghalin written-ah inziak tling mahse, Interview-ah a tla ta hlauh a. Hetia Hyderabad lama Coaching Class a kal hnu hian Delhi lamah chhovin, Test Series class a kal leh a. Thil dang tum lovin, Civil Service atan a inbuatsaih char char a. Vawi 5 lai a exam hman a, beidawng lova a beih zel avangin a vawi 6-naah a inziak tling ta a ni.

Inbuatsaih dan

“Coaching class a kal zawh hnu khan Delhi lamah ka awm a. Hetih lai hian Time  table insiamin hun a khat thei ang berin ka insiam a. Chu chuan pressure pawh min siam nasa hle a, ka tangkai pui khawp mai. Tin, The Hindu ka chhiar nasa  a, Competitive beih tum dangte tan pawh he chanchinbu hi chhiar ngei ngei chi niin ka hria”

Optional subject?

“Anthropology leh Public Administration ka la. History hi BA a ka honours subject a ni na a, Competitive atan chuan PA hi a thaa ka hriat avangin ka la a ni. Tunlaia tling tamtak hi he subject la te hi an ni reng bawk a..”

Lehkha zir dan tlangpui

“High School ka kallai atang tawh reng reng khan bye heart system hian ka kal ngai lova. Kan zirlaibu ka chhiar tawp a, chuta tang chuan ka ownword mai thin a. Mark score a har deuh na a, zir sual a awm ve theilo a. Chubakah kan zirlai kan thiam hneh a a tha khawp mai”

Beidawnna?

Kum 2005-a ka tlin loh tum khan ka chhungte pawhin MA zawm mai turin min ti deuh a. Mahse nasa zawka inbuatsaih leh ka tum avangin min hnial lemlo thung. Lo chhuah chhoh changa thiante leh hmelhriatte min zawhna chhan kha hrehawm ka ti thin bawk.

 

Personal Interview hmachhawn dan    

“Personal Interview-ah hian Main exam kan neih dawna applicationa kan bio-data thehluh atang khan zawhna  a kal thin tih ka hriat avangin ka bio-data a ka ziahlan ang ho kha chu ka inpuahchah nasa viau a. Mahni state chanchinte, College-a ka subject History lamte min zawt nasa hle”

“Hriat reng tur chu Interview-ah hian mahni nihna anga lan ngam hi a pawimawh khawp mai a. Board-a thu te kha mithiam tak tak, thil hre tak tak an ni a, thil hriat loh hre ang deuh a awm chu an hrechhuak rang khawp mai. Keini Board-ah pawh khan Mizoram chanchin hre deuh pakhat a tel ve a.. a hre khawp mai. Interview hi minute 45 vel ka hmachhawn”

Interview chungchang

Mi chanchin a tha zawng sawi hram hram a tha. Pakhatin zawhna min zawt a, “I home state(Mizoram)-a awm i duh tih i ziak  a, eng vang nge?” a ti a. Kei chuan, “Mizoram khera awm ka duh a ni lova, a theih chuan a tha alawm ka ti a, Yes ka ti mai alawm. Khawiah pawh ka awm thei alawm” ka ti a. “Chuti anih chuan hmundangah chuan awm dawn ta la, khawi stateah nge i awm duh” a tia. Kei chuan, “Khawiah pawh min dah ula, ka lawm tho ang” ka ti a. “Nilo, i sawi ngei ngei a ngai” an ti tlat a. “Andhra Pradesh a awm hi ka pawiti lo khawp mai. Hyderabad-ah ka lo awm tawh a, Telegu ho khu an sual lova” ka ti a. Pakhat khan “Nih leh West Bengal hi” a rawn ti leh a. “West Bengal pawh ka duh tho, Bengali ho hi ka ngaina angreng khawp mai. An fel ka ti” ka ti leh a. Chutia ka tih chuan min zawttupa chuan lehlam ami chu a va nuih a, ani pawh chu a lo nui var var  a. Bengali a lo ni reng a. Chu Bengali pa chu a lawm hmel khawp mai a, Kolkata a ka lo awm tawhna College chanchin, ka hriat ngei ngei tur eng eng emaw min zawt zui a. A tihchi angreng khawp mai.”

Civil Service  exam tumte tana thuchah

“Kan hriat reng tur thil pawimawh tak chu, midang pawn an tih theih chu enge ka tih ve theih lohvang tih hi a ni. Tin, thil ziah thiam a ngai em em a. Mark put dan azirin word limit te  alo awm ta a. Duh duh zat ziah ngawt theih a ni lo. Entirnan, mark 10 puah word 150 te lo ni ta se, khami i pelh chuan an du chuan penalty an pe thei daih che a ni. Chuvangin word tlemte hmang si a fiah deuh a ziah thiam a ngai. Keini pawhin kan practice nasa khawp mai. Hun hi darkar thum a ni na a, zawhna a tam a. Ziah zawh hman loh awmthei anih avangin time management tha deuha tih a ngai”

Language problem      

“Mizo Medium chhuak ka nia, phai lama ka zir tirh chuan sap tawng hi ka hmang zak thin a. Ka thiante khan min lo lawm ve khawp mai a, ka te reuh bawk sia, Chinese emaw min ti thin a. English a min biak pawh khan ka chhang zak thin a, min nuih thin a. Mahse ka pa hian kan kal dawnin Dictionary chhah deuh mai min leisak a, chu chu kan lehkhazirna ah hian ka keng tel ziah thin a. Ka word hriat ngai loh hi ka en nghal zel a. Ka thiante chuan ‘i van keng peih zawk’ min ti thin. Mahse khami hmang khan ka in build-up ve zel a, class XII result a lo chhuah kha chuan English-ah khan ka lo hmu sang ber a, 93% daih ka lo hmu a. Medal te kha min pe ta sia, ka thiante chuan a tangkaina kha an hmu ve ta a. “I lo awm tirh te kha chuan biak pawh khan i la tawng ngam si lova” an ti.

Phai lam leh Mizoram inthlauhna

“Kan zirlai hi a quality a tha lo deuh em ni awm ka ti. Pawl 12 kan zo a, phai a ka han zawm kha hriat loh, zir loh hi kan lo la ngah lutuk a. Ka hriat ve loh tamtak kha ka thiante chuan anmahni Board-ah an lo zir vek tawh a. Hrelo bik ka lo ni thin a. Mahse ka zir tlem vang ni chuang lovin kan zirlaibuah khan a lo awm ve tlat lova. Kan standard a hniam deuh niin ka hria. Mahse tunah chuan CBSE follow deuhin an kalpui tawh niin ka hria a, a tha tawh ang chu”

“Tin, by heart system hi a tha lo. A text book ngaihpawimawh a tha. A pawimawh tur lai hriatthiam riau te hi a ngai ve in ka hria.”

Mizo thalaite hnena chah duh

“Civil Service-ah hian Mizote hi kan tlem em em a. Thahnemngaih hi a na lutuk a. Lehkhathiam tamzawkte hian han tum ve hrim hrim sela, tum chuan a theih a ni th hi hre reng ila a tha ka ti. Ka thei lovang tih ringawt tur a ni lo. Mahniin tum ve reng reng, tih chhin ve reng reng a ngai a ni”

%d bloggers like this: