KUMBAKONAM TRAGEDY (Zirlai naupang 93 zet kan hlumna kangmei rapthlak chu!)

(Kum 2008 May 12-a China rama Sichuan lirnghingah khan lirnghingin school building engemawzat a sawichim avangin zirlai 10,000 vel an thi a. Kum 2006 Feb.17-a 17 Southern Leyte, Philipine-a leimin chuan a bulhnai a awm Elementary School-a zirtirtu leh zirlai 250 zet chu a chhilh hlum hmiah tawh bawk. Kum 2005 Oct.8 chawhma dar 8:30 a Muzzafarabad (Kashmir, Pakistan) lirnghingah khan school 10,000 chimah zirlai 18,000 chuang an thi a, zirlai 5,000 chuangin hliam na tak an tuar bawk. Turkey lirnghing, kum 2003-ah khan school building chimin zirlai 135 zet a delh hlum a. Kum 2001 January 26-a Bhuj, Gujarat-a lirnghingah pawh khan zirlai 971 leh zirtirtu 31 an thi a, school building 1884 a tluchhia a, school 11,761 chu class lak nana hman tlak lovin a sawi chhe bawk. Hetiang thil thleng rapthlak tak tak hi sawi tur tamtak a awm a, tamtak chu leilung chhiatna thleng nasa lutuk vang anih laiin tamtak chu school building thalo leh nghet lo te, leilung chhiatna thleng thut thei laka inpuahchahna tha a awm loh lutuk vang leh mihringte fimkhur tawk loh vang a ni)

Kum 2004 JULY 16-ah chuan Tamil Nadu, Thanjavur District, Kumbakonam-a School pakhat Lord Krishna School-ah chuan dan pangngai angin class an la mek a. He School hi helai chheh velah chuan school tha a ngaih a nih avangin zirlai pawh 700 chuang lai an nei a ni.

Hetihlai hian School choka ah naupang ho chawchhun (mid-day meal!!) tur buatsaih mek a ni bawk a.  Hei hi  chu an nitin tih dan phung anih avangin choka sir kil lam atanga meikhu a rawn chhuah hlat hlat pawh chuan tute mahin hlauhthawnna chang an la hre chuang lo. Class VII zirlai Surya chuan chu kangmei chu a va hmu hmasa ber a. Amaherawhchu hetih hunlai hi July-August thla chho, thli thaw tam lai tak anih avangin thelh tumin theihtawpin bei mahse, thli chuan a beng fuh em avangin a hnu lawkah chuan thelh rual lohvin a kangchhuak ta a ni. Hei hi chawhma dar 10:00 vel  a ni.

Kangmei hmu hmasa bertu Surya hi an zirtirtu in pawna tlanchhuak nghal turin ti mahse, first floor sei tak, classroom panga lai awmna primary school zirlai mi 193-te chu mangnghilh niin an lang tlat. Chung naupang te te awmna floor-ah chuan meikhu a rawn zam lut a, naupang ho mangang lutuk chu an tlankual a, an au a, an tap a, tanpuitu an au a. Mahse tlanchhuahna tur an hre mai lo. Sawi tawh angin tlanchhuahna kawngka zimte pakhat chauh a awm a, chuta tlanchhuah tum chuan an innek nasa lutuk a, primary zirlai naupang te te tan chuan tlanchhuah ngaihna a awm si lo. School naupang lian deuh tawhte chu bulding chhawng chung zawk atangin an zuangthla a, an him theih laiin chu pawh chu zirlai naupang te zual tan chuan tih theih a ni chuang lo. Chutih lai tak chuan an awmna in chung, di leh thilthek ilo mai maia siam chu kangmei avangin a chim zui ta lehnghal a. Chu hmunah ngei chuan naupang 75 lai chu a nung chungin an kanghlum ta a ni. A hnuah naupang 18 Hospital-ah an thi leh bawk.

Naupang mangang au thawm leh inchung chim thawm chuan tualchhung mite a ko khawm nghal a. Chhanchhuahna hna an thawk nghal a. School bul hnaia dawr nei Rajendran chu school building first floor-ah a bulhnai a building atanga pakaiin tukverh a tikeh a. Naupang engemawzat a chhanchhuak a. Mahse, mittui tla zawih zawih chungin “Ka chhuk leh chuan, ka fanu Class III zirlai nunna chu ka chhanchhuak thei ta chuanglo tih ka hre ve chiah a ni” a ti.

Chenna bulding pahnihin a kar cheh he School hi feet 40 a zau, feet 120 a sei a ni a. Kangmei chhuah lai hian he School-ah hian zirlai 740 an awm a. Luhna/chhuahna kawngka pakhat zimte chauh a awm a, chu chu class lak lai chuan an kalh vek thin avangin kangmei chhuah lai pawh hian a inkalh nghe nghe. Hei vang hian naupang mangang tlanchhuah tumte chu an innek buai nasa a, chhuah harsa khawpa an innek tawt avangin pawn lam atanga chhanchhuahna hna thawh tum tualchhung mite pawh an lut thei bik lo.

He School-ah hian, he choka ah ngei hian a hma pawhin kangmei a lo chhuak tawh a. Hemi tum hi chuan thelh mit thei mai mahse, a vawi hnihna a lo thlen meuh chuan thelh mih rual a ni ta lo a ni. Kangmei hmasaah khan inzir fing se, invenna lam lo ngaihven deuh chu nise zirlai 93 kan hlumna hi a thleng lo tur a ni a..

AN CHHUI TA..

Hetia chhiatna rapthlak a thlen hnu hian an han chhui tak tak ta a. He school hian dan a lo bawhchhe nasa hle tih hriat chhuah a ni a.  Hetia chhiatna a thlen hma deuh khan an dan bawhchhiat avang hian  an permit hlih sak an lo ni tawh nghe nghe a. Amaherawhchu Court lamah kalin thiam an chan avangin sorkar thuneituten tih ngaihna tak an hrelo niawm tak a ni. Sorkarin building sak dan tur leh himna chungchanga dan a siamte chu a zawmlo nasa hle a. A din tirh, kum 1950-ah khan Tamil Medium Aided School tiin a ding a, a hnu lawkah phalna nei lem lovin he building ngaiah tho hian school pahnih, Primary leh Middle Section hawn belh leh a nih avangin a bulding hi an phuahchawp tawh hle a. A chung pawh di leh thilthek hmanga chih mai mai a ni tawh a ni.

Kangmei chhuah ni pawh hian Additional Education Officer chuan he School-a Tamil Section chu a endik a. School naupang ngah a, grant dawn tam an duh avangin ground floor-a English section zirlai tamtak chu Tamil Medium section lamah awmtir an ni nghe nghe.

He kangmei chhuah chungchangah hian mi 17 zet man nghal an ni a. An zingah hian he school staff thenkhatte bakah helai District-a Education Officer lian zawng zawng deuh thaw chu man an ni a. Mahse, hei hian chhiatna tawktu zirlai nu leh pate rilru na chu a thawidam lo chiang kher mai. Chhiatna thlen ni tlaia Tamil Nadu Chief Minister Jayalalitha-in chhiatna hmun rapthlak tak a tlawh a, nunna chante Rs.1,00,000 pek tur leh, inhliam na zualte Rs.25,000/-, inhliam na vak lote Rs. 10,000 pek tura a puante chuan an rilru na chu a thawidam zo chuang lo!!

SUPREME COURT ORDER

He chhiatna thleng hian Tamil Nadu mai ni lovin India ram a deng chhhuak a, Supreme Court meuh pawh a vir vut vut mai. He chhiatna thleng chungchanga Avinash Malhotra-a’n Union of India leh midangte laka Public Interest Ligitation (PIL)a  thehluh chu Supreme Court pawhin a buaipui nasa hle a. Hun engemaw chen ngaihtuah a nih hnuah kum 2009 April 14 khan Judgement order a tichhuak ta a. He Judgement order hi zirlai te himna ngaipawimawhtu tan chuan zirchian tham thil lawmawm tak a ni ngei ang.

India ram rorelna sang ber, Supreme Court chuan hun lo la awm leh zel tura zirlaite himna tura sawrkar leh school thuneitute zawm ngei ngei tur dan engemawzat a siam ta a. Judgement order No.40-ah chuan hetiang hian a ziak a:

  1. i) State sawrkar leh UT ten School recognition/affiliation a pek hmain School building chu a him tawk a ni tih leh, National Building Code of India a tarlan School Building sak dan tur kaihhruaina a siam ang taka sak a nih leh nih loh an endik hmasa ngei tur a ni.
  2. ii) Sorkar leh private school zawng zawngten thla ruk chhung ngeiin kangmei thelhna hmanrua an nei vek tur a ni.
    iii) School building-ah thil kang awlsam tak (inflammable) leh hetiang lam chi dah loh tur a ni. Engemaw thil avanga dah a ngai anih pawhin a him tawkah ngei dah tur a ni.
    iv) School structure endikna hi hunbi fel tak neia kalpui ngei tur a ni a. Hemi viltu Engineer leh Official-te chuan National Building Code an zawm ngei tur a ni. Uluk taka a nih dan tur ang thlapa endik anih hnuah chauh safety Certificate pek tur a ni a. An duty thlahthlamtu official-te chungah rang taka action lak nghal tur a ni.
    v) School staff-te leh official-ten kangthelhna hmanrua hmandan training an nei ngei tur a ni.

He Judgement no.40 hnuaiah hian hetiang hian no.41 hmangin a ngaihpawimawhzia a tarlang leh bawk a:

 “State leh UT hrang hranga Education Secretary-te chuan he thupek hi an zawm ngei a ni tih lanna Affidavit thla khat chhung ngeiin an siam tur a ni a, hemi chhung hian school tinah kangthelhna hmanrua an bun ngei tur a ni” tiin.

National Building Code of India, 2005 Part IV-ah chuan Fire & Life Safety and the Code of Practice of Fire Safety in Educational Institutions (IS 14435:1997) of the Bureau of Indian Standard chiang taka tarlan a ni a. Hetiangin:

 3:1 FIRE SAFETY MEASURES IN SCHOOLS

  1. i) School building block tinah hmuh mai theih tur langsar laiah kangthelhna hmanrua (fire extinguishers) ISI mark chuang ngei dah tur a ni.
  2. ii) First Aid hmanruate leh damdawi hmanchawp mai tur school-ah a awm reng tur a ni.
    iii) Kangmei chhuah thulh a hman mai tur Water tank leh pipe invuah sa a awm reng tur a ni.
    iii)  Class X-XII zirlai leh zirtirtute chu kangthelh dan training pek tur a ni.
    iv) School tinah Fire Task Force, Head of Institution telna din tur a ni a. Chutah chuan zirtirtu/staff pahnih bakah Fire Department mi leh sa pakhat an tel tur a ni. Fire Department hian school a kangmei venna atan ruahmanna an siampui ang a, thla thum chhungin vawi khat tal an endik thin tur a ni.
    v) School notice board-ah leh hmun langsar dangah emergency telephone number leh biakpawh mai tur mite number tarlan tur a ni.
    vi) Kangmei chhuah thulh chet dan tur zirna (mock drill) hi regular taka buatsaih tur a ni. Floor tinah fire alarm dah tur ani a, hetiang dah remchan lohna hmun thingtlang angah te chuan hetiang huna vuak tur dar (bell) an ngaihtuah mai tur a ni.
    vii)       Fire Department lam nen inrawn tlangin school-a electric wiring leh hmaraw hlui tawhte chu ISI mark chuang ngeia thlak tur a ni.
    ix) School hnaivaiah Electric line pui a kal tur a ni lova. A lo awm tawh anih chuan dahsawn ngei tur a ni.
    x) Fire & Rescue Department-in school-te tana ‘tihtur leh tihloh turte’ fel takin an duang tur a ni a, fitness certificate an pechhuak tur a ni. Hei hi a khat tawka renew tur a ni bawk.

Mizoramah ve thung

Han hawi vel ila, a chunga kan tarlan tak ang chi dan leh dunte hi Mizoramah chuan ngaihpawimawh a hlawh lohzia kan hre thei ang. Hetiang khawpa chianga Supreme Court Order a awm tawh hnu pawh a kan la ngaihsak tha duhlo hi chu a thinrimthlak a, a manganthlak bawk. Dan neilo pawh kan ni bik si lo. Khai mah aw..

The Mizoram Education Recognised Private Schools (Regulation) Rules, 2006 No.5 (ii)-ah chuan ti hian a inziak a:

“The School has been provided with a fire-proof bulding of its own with adequate ventilation and lighting consisting of such accomodation as may be prescribed for classrooms, laboratories, libraries, office accomodation, staff common room and toilets for men and women.”

A chunga kan tarlan hi a tihlawhtlinglo a nih chuan recognition pek theih a ni lo ang tih a ni.

Supreme Court order zawng zawngte,  National Building Code of India-a tarlan dan zawng zawngte hi Mizoram-ah chuan kan zawm theilo tih kan hre vek a. Mahse, zawm theih chin tawk leh a him chin chu kan hre thei mai ang. School recognition pekna dan kan siam ve zawng zawngte chu tumahin kan zawm lova. School neitute’n an ngaihsak lova, sorkar official lam lahin an ngaipawimawh hek lo.

Vanduaina hi midang tawh tura dah ringawt tur a ni lova. School hi a kang thei a, a chim thei a, misual in an luhchilh thei bawk. Chutiang chhiatna rapthlak lakah chuan vanneihna a innghah reng ringawt tur niin a lang lo. School naupangte leh zirtirtute hian nitin school-ah darkar 6 vel hun an hman avangin School safety hi tute pawhin kan ngaipawimawh em em tur niin a lang zawk a ni. Tuna kan kaldan angah hi chuan, chhiatna rapthlak pakhat chauh emaw pawh tawk ila chuan, chiang taka Supreme Court Order a awm vek tawh avang leh, Mizoram Sorkar ngei pawhin dan a siam vek tawh avangin  Education Minister-te, Education Department hotu lian engemawzat bakah School neitute hi chuan thubuai rit tak an awrh ngei ang le.

%d bloggers like this: