French Revolution thlen chhan

French Revolution 1789 kha khawvela revolution lar bera chhal ngam a ni a. A lo intan dante, mipui lungawi loin Bastille kulh an lak dante,  nunna a suat hnem ziate, he revolution denchhena Napoleon Bonaparte lo dinchhuah dante, Europe ram dangte nena an indo buai chhoh zui dante leh a chanchin tamtak kan hre hlawmin a rinawm.

French revolution lo thlen chhan kha sawi tur tamtak a awm a. A lar zual, kan tangkaipui theih tur leh kan tunlai khawvel nena inhne rem deuh tlemazawng lo tarlang ila:

  1. Kum zabi 18-na vela France ram lalte kha an lal em em a, Pathian aiawh a roreltu, Pathian hnuaia chiaha awm angah an in ngai hial a ni. Mipuite kha engah mah an ngai lo a, mipui aiawh a roreltu Parliament hial thiatin, engmah lo-ah an siam a. Mipuiten Lalte leh an sorkar kalphungah engmah sawi theih an nei lo.
  2. France sorkarah khan eirukna a nasa em em a, Lalte leh miliante mai bakah sorkar hnathawkte pawh eiruknaah hian an fihlim chuang lo.
  3. Indona tul lo tak takah an inrawlh nasa lutuk a (eg. Seven Years War, American War of Independence, etc), chu chuan ram chhung sum che vel nasa takin a nghawng a, nunna a heh mai bakah mipui ei leh bar dinhmun nasa takin a tichhia a ni.
  4. An ram mipui maktaduai 20 zinga za zela pahnih (2%) vel chauh, Lalte leh an miliante’n an duh dan danin ram an kaihruai a. Mipuiah chhiah nasa takin an khawn a, anmahni an awl leh daih si! Lalte leh miliante chuan mipuite chhiah tlingkhawm chu anmahni sum ang maiin duhtawkin nuam tawl nan an hmang mai mai a ni.
  5. France hi ram leilung tha tak leh hausa tak a nih laiin Agriculture lamah hma an sawn thei reng reng lo a. Mipuite chhiah tlingkhawm chu awmze nei lo a an hmanral mai mai avangin ramchhung tihhmasawnna tur sum a awm thei lo a ni ber. Ram dang pawisa an puk a, kum telin an leiba a pung tulh tulh a. A rulhna turin mipuiah chhiah nasa takin an khawn leh si; chu chu mipuiin an hrethiam thei lo a ni.
  6. Hetiang a nih mek lai hian khawvel ram hrang hranga rorelna inthlak chhoh dante leh an hmasawn dante mipuiin an hre ve vek si a. An ram dinhmun an ngaihtuahin an rilru a na a, kalphung thar duhin mipui an tuihal a ni.
  7. Thuziak mi lar leh mifing tak tak – Montesquieu, Voltaire, Rousseau leh midangten an thuziak hmangin mipui rilru an hneh nasa a. Mipuite rilruah ram leh hnam hmangaihna an tuh nasa a, thu khat vuain mipui an awm theih phah a ni.
  8. Kum 1775-a American Independence an sualpuina a American hoin an ram an hmangaihna thuk tak chuan French mipuite rilru a hnehin a chawk tho nasa hle.
  9. Khatih hunlai a an kohhran kha an hausa em em a, chutiang kara kohhran hruaitute hlemhletna nasa lutuk leh mipuite rethei lutuk bawk si chuan mipui lungawilohna a ti zual bawk.

Fall of Bastile, July 14 , 1789

Heng kan tarlan tak leh tarlan tak chiah loh chhan hrang hrangte avang a mipui thinrim, hun rei tak lo inup tawh chu kum 1789-ah a lo puakchhuak ta a. Hemi kum hian an Lal Louis XVI chuan an ram sum leh pai dinhmun chhe lutuk siamthat dan tur sawiho turin kum 175 zet an lo tihtawp tawh mipui aiawhte rorelna Parliament chu a din leh ringawt a. A thunun zawh leh si loh avangin a thiat leh ringawt, mipui an lungawi ta lo! Mipui vantlang (Third Estate)-ten mipui rorelna khawl an din National Assembly chu an thutkhawmna hmun ber kharsak an nih avangin June 20, 1789-ah Tennis Court-ah mipui lungawilo an fuankhawm ta a. Ram siamtha turin thutiam an la ta sup sup mai a ni.

Mipui lungawi lo chuan Bastille kulh luhchilhin mitang zawng zawng an chhuah vek a, Bastille kulh an lak ni July 14 chu France ram Independence Day-ah hman zui a ni ta bawk. France Lal leh Lalnu pawh an man a, an lu an tansak hmiah mai a ni. Milian ho, hun rei tak a nawm a mak a mipui lo bawlzan thintute, hnam hmelma an tih maite chu an han suat tak tak mai a, Paris khawpuiah ringawt pawh mipui lungawi lo hian milian ho chu 5000 chuang an tihlum a ni.

JANUARY 16: Execution of Marie Antoinette on October 16, 1793, painting from that time by an unknown Danish artist. France, 18th century.

He French revolution rapthlak zia leh a nghawng natzia hian tun thlengin History zirnaah hmun pawimawh tak a la chang ta zel a ni.