France-in Uruguay 2-0 a hnehin World Cup Semi Final an lut

France chuan Raphael Varane leh Antoinne Griezmann-te goal thun hmangin 2-0 in Cavani tel lohna Uruguay an hneh a, FIFA World Cup 2018 Semi Final an inhlangkai ta.

He inkhel hmuhnawm takah hian goal mouth action hmuh tur a tam lo hle a, ram pahnihten clear chance an nei thei meuh lo. Uruguay lam hi an striker chhuanvawr Edinson Cavani, inhliam avanga a tel theih loh a hriat hle a, tlar hma lama mi hnawksak an neih theih loh miau avang leh, Luis Suarez a tar tak deuh avangin an attacking in an game hmasa lam a pha lo hle.

Starting line-ups

France (4-5-1): Hugo Lloris (capt); Benjamin Pavard, Raphael Varane, Samuel Umtiti, Lucas Hernandez; Paul Pogba, N’Golo Kante, Kylian Mbappe, Antoine Griezmann, Corentin Tolisso; Olivier Giroud.

Uruguay (4-4-2): Fernando Muslera; Martin Caceres, Jose Gimenez, Diego Godin (capt), Diego Laxalt; Lucas Torreira, Nahitan Nandez, Matias Vecino, Rodrigo Bentancur; Luis Suarez, Cristhian Stuani.

Inkhel tan phat atangin team pahnihten theihtawp an chhuah tih a hriat nghal a, Uruguay lamin France Player ball thiam tak takte hmunawl pek an tum loh mai bakah an khel pawh a rorum deuh zawk a. Inkhelh tantir lamah chuan game pawh an control deuh zawk. Midfield-a indangchat tawnin clear chance hmuh tur a tam lo hle. Match hmasa lama che tha tak, Argentina tlar hnung chaih phar hreptu PSG rising star Mbappe meuh pawh a game hmasa angin a khelchhuak thei bik lo.

Minute 40 an khelh tlin chiahin France defender Raphael Varane chuan Antoine Griezmann ball cross chu Uruguay defender-te dan hman rual lohin nalh takin a head lut a.  Uruguay goalkeepper Fernando Muslera a che hman lo! Kylian Mbappe an dang chat hle chungin hlauhawm taka chet a nei zauh zauh a, minute 20-na a a head chu goal kham chungah a kal a, minute 34-naah right wing lamah Diego Laxalt tlan pelin ball hlauhawm tak a pechhuak a, amaherawhchu, Uruguay tan thin phutna tham a ni chuang lo. First half-a Uruguay ball hlauhawm ber ni a lang chu Nahitan Nandez-an goal hnaih set sawtah neiin, hei pawh hi engmah loah a chhuak zui bawk. Martin Caceres-a head ball hlauhawm tak chu France goalkeeper Hugo Lloris chuan tha zetin a lo dang a, hei hi he inkhel a save ropui ber a chhal theih a ni hial awm e.

Goal hlauhawm em em nei zui lovin First half a tawp a, France in ngaihtha thawkhat takin hun chanve chawlh an hmang thei.

Second half an khel chho leh a, game-ah danglam a tam lo. An khel chho zel a, minute 61-naah Antoinne Griezmann chuan na takin goal zawnah a pet a, Uruguay keeper  Fernando Muslera tan dan harsa tura lang ni lo mah se, Spanish Man Utd goalkeeper De Gea ang maiin a chesual a, awlsam taka dan mai theih ni a lang chu a dang fuh thei ta si lo a, ho angreng takin goal-ah a per lut ta. France an lawm a, Uruguay beiseina erawh a thamral zui ta a ni ber. Minute 64-naah  Cristian Rodriguez  chuan Uruguay tan goal shot a nei leh a, mahse goal zawnah  a kal thei chuang lo.

Minute 68-naah Kylian Mbappe chu Cristian Rodriguez  nen an insi deuh zeuh mai ni a a lan laiin chiang takin a tlu a. Goal mamawh em em a khel mek Uruguay player-ten an ngaithei lo hle a. Hun engemawchen chu an buai laih laih nghe nghe. He thil thleng avang hian  Kylian Mbappe leh Cristian Rodriguez-ten Yellow Card an hmuh phah bawk. Kylian Mbappe hi a tlu hma deuh niin a lang.

Minute 73-naah Corentin Tolisso chuan Uruguay penalty area pawn deuh atangin chance tha tak neiin a shot a, amaherawhchu goal chung lamah ball a kal hlauh mai. Hemi hnu a free kick an hmuh pawh Antoinne Griezman-a’n goal hlauhawmah a chantir thei lo. Uruguay lam tan goal hnih sut let a huphurhawm tawh a, minute 5 pek belh a ral thlengin goal an khung lo mai ni lovin, goal hlauhawm an nei hleithei tawh lo. France chuan harsatna lian tham lutuk tawk lovin, thin ti phu zawk zawk thei tur khawpa nawrna hlauhawm lutuk pawh tawk lovin Semi Final an inhlangkai ta a ni.

Man of the match – Antoine Griezmann (France)

World Cup an lo khelh tawh thinah France leh Uruguay hi vawi thum an lo inhmachhawn tawh a, France hian record an nei ropui teh chiam lo hle. Kum 1966-ah 2-1 in Uruguay lakah hian an lo tlawm tawh a, 2002-ah 0-0 in an in draw a, 2010-ah 0-0 bawkin an lo in draw tawh bawk. Hetiang a nih avang hian France tan Uruguay hneh hi a lawmawm zual dawn hle a ni. World Cup-a vawi khat chiah la champion France hian kumin ah hian a vawi hnihna thlen tir an tum hle a. Brazil leh Belgium inkhel a a chak zawk zawk an la tum dawn avang erawh chuan an hmabak erawh a la ko hle.