Osama Bin Laden thattu sipai tha bik thlanchhuah US NAVY SEALs

(Osama Bin Laden thah anih ruala mitin rilru a lo lut nghal chu kha Operation ropui zia leh an Commando-te chet fel zia kha a ni awm e. Kha Operation kha kan hriat angin Afghanistan-a Kandahar Airport atang neih a ni a, Pakistan ramri-ah Pakistan sipai ho radar pawhin an lo man a, an han chhui zui a, Pakistan thlawhna ani lo tih an hriatchhuah meuh kha chuan an Operation kha an lo zo fel hman tawh a, Pakistan ram an lo thawhchhuah san leh daih tawh a ni.

            He Operation hi Israel Commando ten Africa khawmualpui a awm Uganda rama an mite an chhanchhuah dan ropui tak nen khaikhin a ni hial a. Khawvel a Commando Operation ropui ber pawl a chhiar a ni ngei ang. Kha Operation kengkawh tute kha US sipai tha bik, Navy SEALs an tih mai a Team 6 te an ni a. An chanchin tlangpui kan tarlang dawn a ni)  

United States Navy SEa, Air and Land (SEAL), Navy SEALs tia kan hriat lar tak hi US Navy-in operations force a neih that ber a ni a. SEAL hi Naval Special Warfare Command (NSWC) leh United States Special Operations Command (USSOCOM) te nena inthlun zawm vek a ni.

SEAL hi kum 1962 January ni 1 atang khan mumal taka hman tan chauh a ni a, vawiin thleng hian tha takin hna a la thawk reng a ni. United Staes Navy hnuaia awm a ni a, tui, boruak leh khawmual-a hnathawk thei tura a bik tak training pek an ni.  US special operation team an nih anging Navy SEALs-te hian hna tinreng an thawk a ni ti ila kan sawi sual tam awm lo e! Hel beih te, ruihhloa sumdawnna te, mi chhanchhuah te leh thildang tam tak an khawih a ni. An hmunpui hi Coronado, California Little Creek hmuna awm a ni a, hming lem (nickname) pawh pathum ngawt a nei- Frogmen, The Teams leh Greenfaces. An motto hi “ The only Easy Days Was Yesterday” tih leh “It Pays to be a Winner” a ni.

US Navy SEALs te hi indopui 2-na atang din a ni kan ti thei awm e. An din tirh hian he hming hi an pu nghal lo a. US-in sipai a mamawhna a nasat avang an din a ni. He sipai pawl hian lawng chhuak tur leh rawn thleng tur an buaipui ber thin. He sipai pawl vang hian Amphibious Scout leh Raider School chu Army leh Navy-te tangkawp chuan 1942 khan an din a. Hetatang hi chuan tui lama chet mai bakah khawmual lam chet an zir chho ta zel a. A hnu lawkah chuan Naval Combat Demolition Unit (NCDU) tiin a lo ding chho ta a ni. He unit hi United States Navy-a sipai, tui leh khawmuala chetla thei tura special group din hmasak ber a nih angingin kum 1942-a Operation Torch, N. Africa-a an neih tum khan hlawhtling operation an nei a ni.

John F. Kenndy (World War-II Navy Veteran) pawh khan he unit hi a ngaipawipawh hle a. Kum 1961 May ni 25 khan US Congress-a a thusawinaah he unit tihchak nan hian US $100 million sen a huam thu a sawi a, hetih hunlai hi mi zawng zawngin thlaa lawn an buaipui luih luih lai kha a ni.

Hun a kal zel a, he unit hian ngaihpawimawh a hlawh chho zel a. Kum 1961 March khan Chief of Naval Operations, Arleigh Burke chuan Guerilla leh Counter Guerilla unit din a rawt a. He unit hi tui, khawmual leh boruaka che thei tura ruahman a ni a. Hetatang hian Navy SEALs hi a rawn piang ta a ni. A hming, SEALs an tih pawh hi Sea, Air and Land tihna mai a ni a. Tuipui, boruak leh khawmuala che thei vek tur, operation nei thei vek tura duan/training pek vek  an nih vang a ni.

TRAINING

Navy SEALs -te hi khawvela sipai tha ber tur an nih avangin training hi an uluk em em a, khawvela sipai training hautak berte zinga pakhat a ni a. An duh uluk ngang a ni ang, training zinga zaa sawmhnih chauh an thlang chhuak thin a. Training zinga 80% chu an drop out thin tihna anih chu. Navy SEALs training tur pawh hian Commando training chhuak tawhte chauh an thlang thin a. Heta tang mai pawh hian an training hautak dan tur chu a hriat theih mai awm e.

WEAPONS AND DEMO

SEALs Commando te hi ralthuam chi hrang hrang hmang thei vek tur khawpa training nei tha an ni a. Ralthuam pawh US siam an hmang tlangpui. US siam anih loh pawhin anmahnin an duh ang taka an khawih danglam chauh an hmang thin. Carbine M4A1 an hmang nasa hle a, Pistol an pai vek a, an Operation neih tur azirin ralthuam hi an thlang tlangpui thin.  Tunlai an ralthuam hman tlangpuite lo tarlang ila:

  • MK23 Mod 0 .45 cal SOCOM Offensive Handgun
  • M11 Sig Sauer P228 (9mm)

Assault Rifles

  • M4A1 with SOPMOD Accessory Kit (5.56mm)

Sniper Rifles

  • M14 Sniper Rifle (7.62mm)
  • MK11 Mod 0 Sniper Weapon System (7.62mm)
  • M82A1 Heavy Sniper Rifle (.50 cal)
  • Submachine Guns : HK MP5 Submachine Gun (9mm)
  • M60E3 Machine Gun and MK43 Mod 0 (7.62mm)
  • Combat Shotguns : Benelli M4 Super 90 Shotgun
  • Grenade Launchers : M203 Grenade Launcher (40mm)
  • Mortars : M224 Mortar (60mm)
  • Anti-Tank Rockets : M136 AT4 Light Anti-Tank Rocket

SEAL TEAMS

SEAL team hi group hnihah an then a : Naval Special Warfare Group One (West Coast) leh  Naval Special Warfare Group Two (East Coast), he group-te hi Naval Special Warfare Command hnuaia awm an ni a, an hmunpui chu NAB Coronado, California a ni. Original SEAL Team, Vietnam War-a kal te kha group hnihah then an ni a, West Coast Team ONE) leh East Coast (Team TWO) te an ni. Kum 2006-ah chuan SEAL Teams hi pariat an awm tawh a. Tuna SEAL Team-ah hi chuan Team 1,2,3,4,5,7,8,10 an awm a ni.

SEAL teams te hi Naval Special Warfare Squadron emaw Special Operation Task Force emaw hmangin khawvel khawi hmunah pawh hna thawk thei tura duan an ni a. SEAL Team-te hi Navy Commander (0-5) command-na hnuaia awm an ni.

TEAM 6

A chunga Team hrang hrangte kan en chuan Osama thattu ber, Team 6 an awm ve lo tih kan hre thei ang a. Kum 1962 velah SEALs din a ni a, kum 1987-ah Team 6 hi thiah a ni a. Team 6 hming pu tawh lovin, Operation pawimawh zual bik khawih turin United States Naval Special Warfare Development Group DEVGRU an tih mai chu din thar a ni a. Team 6 te kha he DEVGRU ah hian leh an ni tihna anih chu. Amaherawhchu, a chang chuan an hming hlui Team 6 tia sawi an la ni thin tho bawk. He Special Force hi Naval Special Warfare Command hnuaiah awm mah se, anihna takah chuan anni chetchhuahna tur hi chu Joint Special Operations Command lam thu daih ani thung. Army, Navy leh Airforce hotu lu ten an Command daih tihna anih chu. Tunah hian Garrison/HQ hi Dam Neck Annex, Naval Air Station Oceana, Virginia-ah a awm a ni.

ST6 lo indin tanna hi Operation Eagle Claw an tih mai, kum 1980-a Iran rama US Embassy, Terrorist ten an luhchilh tuma an mihrente chhanchhuak tura operation an neih hlawhchham tum kha niin a lang a. Heta tang hian Commando tha leh zual, a bik taka din duhna a lo awm chho a, kha Operation-a Navy represent anga tel ve Richard Marcinko chuan he Team ruangam tur hi a duang chho ta a ni.

Hetiang anih avang hian Navy SEALs ho rau rauah pawh Team 6-te hi chu a bik lehzual taka din an ni a. Operation an neihna tur pawh pawimawh tawpkhawkah chauh a ni thin. Tin, sawi tawh angin a command tu tak tak chu   Joint Special Operations Command daih an nih avangin President thuneihna liau liau anihna chen a awm awm e.

Osama thahna a tel Commando-te lukhumah khan Camera, Satellite nena thlunzawm sa a invuah vek a. Chuvang chuan an Operation neih lai zawng zawng kha Command Centre atangin President Obama hovin engkim kha live in an lo en thei a ni.

Osama thahna ah khan CIA kaihhruaiin Team 6 Commando 40 vel an tel a. 24 chu lei lama an chet laiin a dang zawng chuan boruak atangin an lo veng a ni.

Be the first to comment on "Osama Bin Laden thattu sipai tha bik thlanchhuah US NAVY SEALs"

Leave a Reply

This site uses Akismet to reduce spam. Learn how your comment data is processed.

%d bloggers like this: