Nuclear Suppliers’ Group

Nuclear Power lama hmasawn tuma India in tan a lakna kawnga US nen an thawhdunna, Indo-US Nuclear Deal tihhlawhlin a nih theih nana Internatonal Atomic Energy Agency (IAEA) leh Nuclear Suppliers Group (NSG)-te remtihpuina pawimawhzia kha a takin kan hre tawh a. Amaherawhhu, he Indo-US Nuclear Deal hian tun thlengin puitlinna hmel tak tak erawh a la hmu hleithei lo. Kan hriat angin NSG-ten India nuclear policy an dodal tlat thinna chhan chu India in Nuclear Non-Prolifaration Treaty-te leh Comprehensive Nuclear-Test Ban Treaty (CTBT) a sign duh loh vang a ni.

Nuclear Suppliers Group (NSG) hi khawvel ram hrang hrang ten Nuclear ralthuam tih tlem nan leh Nuclear chakna, ralthuam hlauhawm siam nana hman a nih zel loh nana hmalakna tura kum 1975-a  an din a ni a. A din tan nachhan tak pawh kum 1974 May18-a India in Nuclear Bomb a test vang a ni nghe nghe.

London khawpuiah a din tirh lam, kum 1975-1978 khan Meeting an nei thin a. Chutah chuan International Atomic Energy Agency (IAEA) hnuaia nuclear chakna hralhchhuah khuahkhirhna chungchangah inremna an nei thei ta nghe nghe a ni. IAEA-in hmanraw hrang hrang hralhchhuah phal chin a siam pawh lungrual takin an pawm bawk.

A tir takah chuan NSG-ah hian member pasarih- Canada, the Federal Republic of Germany, France, Japan, USSR, United Kingdom leh United States-te chauh an awm a. Kum 1976-77 khan huang zauh hretin member 15-ah an pung a. Hemi tum hian Belgium, Czechoslovakia, the German Democratic Republic, Italy, the Netherlands, Poland, Sweden leh Switzerland-te an lalut a ni. Kum 1990 khan  member 12-in an belh leh a. Hemi hnu hian USSR kehthem ram thenkhat chu ‘future membership’ nihna pek an ni bawk. Kum 2004 khan People Republic of China hian zawm ve lehin kum 2005 ah kha chuan member 45 zet an awm tawh a ni.

Be the first to comment on "Nuclear Suppliers’ Group"

Leave a comment

Your email address will not be published.


*


This site uses Akismet to reduce spam. Learn how your comment data is processed.