Europe-a Wenger sulhnu

UEFA Europa League semifinal khelh zawh takah Arsenal chu Atletico Madrid hneh lovin an tla a, Wenger-a’n european trophy chawi ve a tumna chu a hlawhchham leh ta. Heivang hian Arsenal-in season tharah UEFA Champions League an khel dawn lo tih a chiang ta bawk.

Manager ropui ber te zinga chhiar tel tawh tur Arsene Wenger hian Arsenal hi season 22 chhung a enkawl a, hlawhtlinna tam tak chanpui mahse; fans te beisei ber europe-a champion erawh a thlenpui thei dawn ta lo a ni. Wenger hian european competition-ah Arsenal hi vawi 110 a chakpui hman a, chak lo zawkah vawi 58 tangin, inhnehtawk vawi 48 a neihpui bawk.

Final vawi hnih a thlenpui a, kum 2000 khan UEFA Cup (tuna Europa League)-ah final thlengin Galatasaray chu penalty-ah an hneh lova. Kum 2006-ah UEFA Champions League-ah final a thlenpui leh a, FC Barcelona chu 2-1 in an hneh lo leh bawk. Season 22 chhung Arsenal hi european competition-ah a tel pui ziah a, final vawi hnih leh semifinal vawi 4 a thlenpui chu a record tha ber a ni dawn ta a ni. Season 22-ah hian season 19 chu inelna sang zawk Champions League a khelhpui thei a, hei ringawt pawh hi manager pangngai tana thil harsa tak a ni ve thung.!

Barcelona nomawi chawi lai an thlir (2006)

UEFA Champions League leh Europa League hi khawvela football club tha ber ber te inelna a ni a, champion thei nih hi inchhuanna tham tak a nih laiin, a khel phak hrim hrim nih pawh inchhuanna tham a tling ve tho awm e. Hemi anih avang hian player ten champion an chak tluk zetin, manager (coach) te pawn champion an chak a, team te champion pui thei chu manager ropui zingah ngaihsan leh dah ropui deuh bik an hlawh thin. Arsene Wenger pawh hi a ropui zia sawi lang thin mah ila, “mahse european trophy a chawi ve lo” tih chu sawi tel reng a ni tawh ang.

Europe-a a record lo en ila (Arsenal bik):

1996-97 UEFA Cup – First round

1997-98 UEFA Cup – First round

1998-99 Champions League – Group stage

1999-2000 Champions League – Group stage

1999-2000 UEFA Cup – Runners-up

2000-01 Champions League – Quarter-finals

2001-02 Champions League – Second group stage

2002-03 Champions League – Second group stage

2003-04 Champions League – Quarter-finals

2004-05 Champions League – Last-16

2005-06 Champions League – Runners-up

2006-07 Champions League – Last-16

2007-08 Champions League – Quarter-final

2008-09 Champions League – Semi-final

2009-10 Champions League – Quarter-final

2010-11 Champions League – Last-16

2011-12 Champions League – Last-16

2012-13 Champions League – Last-16

2013-14 Champions League – Last-16

2014-15 Champions League – Last-16

2015-16 Champions League – Last-16

2016-17 Champions League – Last-16

2017-18 Europa League – semi-final