England-ah Football a kir leh ta! Semi Final-ah England inhlangkai

Zan hmasa lam game-te ngaihtuah chuan Sweden leh England inkhel hmuhnawm dan a ropui viau lo a. Zan hmasa lama Game class sang tak leh speed rang tak angte hmuh tur a awm lo a, amaherawhchu, goal mouth action erawh beisei aiin a tam a tih theih awm e.

Starting Line-ups

ENGLAND

Goalkeeper: 1 Jordan Pickford (Everton)

Defenders: 6 Harry Maguire (Leicester), 5 John Stones (Manchester City), 12 Kieran Trippier (Tottenham), 2 Kyle Walker (Manchester City), 18 Ashley Young (Manchester United)

Midfielders: 20 Dele Alli (Tottenham), 8 Jordan Henderson (Liverpool), 7 Jesse Lingard (Manchester United)

Forwards: 9 Harry Kane (Tottenham), 10 Raheem Sterling (Manchester City)

SWEDEN

Goalkeeper: 1 Robin Olsen (Copenhagen)

Defenders: 3 Victor Lindelof (Manchester United), 4 Andreas Granqvist (Krasnador), 6 Ludwig Augustinsson (Werder Bremen), 16 Emil Krafth (Bologna)

Midfielders: 7 Sebastian Larsson (Hull), 8 Albin Ekdal (Hamburg), 10 Emil Forsberg (RB Leipzig), 17 Viktor Claesson (Krasnador)

Forwards: 9 Marcus Berg (Al Ain), 20 Ola Toivonen (Toulouse)

History

World cup a Sweden thlen san ber tum chu kum 1958 kha ni daih tawhin, hemi tum hian final-ah Pele-a team Brazil an lo hneh lo tawh a. Hei bak chu thlen san em em an nei ngai tawh lo.

England ve thung hi kum 1966 daih tawh khan German hnehin an lo champion ve tawh a. Amaherawhchu, a hnu lam kum 52 chhung hian chanchin an nei ropui hleithei tawh lo thung. Hetiang a nih avang hian tun tuma hetia an han thleng sang ve deuh pawh hi nuam an ti leh pek khawp a. An hla pui ber pawh Three Lions tih hla niin, “Football’s coming home” an ti dup dup mai a ni.

Inkhel thlir ang

Khelh tan tir lamah midfield-ah an indang tawk viau a, minute engemawzat chhung chu chance tia sawi tur awm mumal lovin an inkhel chho. Minute 11-ah goal shoot hmasa ber kan hmu a, Kyle Walker chuan Sweden keeper chu hla tak atanga pet khum tum mah se,a hlawhtling lo. Minute 14-ah Sweden-in chance an nei ve leh nghal a. mahse Viktor Claesson chuan goal hlauhawmah a chhuah thei lo.

England-in hahdam angreng takin game an thunun a, goal chance pawh a awm chho ta zauh zauh. Minute 30 a ni a, England-in goal an khung ta nge nge. Ashley Young-a corner pet chu Cahill-te aia an thlan zawk England Leicester defender Harry Maguire chuan chiang takin a tauh lut a. An game enin a chak tur zawk a hriat nghal deuh ruak mai.

Half time hma deuhin Sterling hmangin England-in chance tha tak tak an nei a, mahse Man City lama chance uiawm tak taka hlah thintu Sterling bawk chuan goal-ah a chantir hleithei lo. Half time a ni a, England-in 1-0 a hmahruai chungin chawlhlawk an hmang thei e.

Second half an tan chho a, game-ah danglamna a awm tam lo. Sweden lamin chance an nei chho zauh zauh a, mahse England keeper Pickford a che tha ve tlat zel a, tha takin a lo dang leh thin.

Minute 58-ah England chuan goal dang an khung leh ta nge nge a. Lingard chuan ding lamah ball chaih kualin cross tumin a pet a, Trippier  a kutah per mahse referee-in a ham lo. Chumi ball kal zel chu Lingard chuan tha taka cross in, penalty box a free taka lo awm Dele Alli chuan chiang em emin a lo tauh lut ta a ni. Delle Alli hi England player, world cup a goal khung thei naupang ber dawttu a ni ta a ni.

Hemi hnu hi chuan a chak tur zawk a chiang thawkhat tawh a. Sweden lamin goal hlauhawm nei leh zauh zauh thin mah se, an finishing that tawk loh vang leh England Everton goalkeeper Jordan Pickford a chet that ve miau thin avangin an paltlang thei tawh lo. England-in fiahna hautak lutuk lo paltlangin World Cup Semi Final an lut ta a, hei hi world cup-a semi final an thlen vawi 3-na chauh a ni a, kum 1990 hnu a semi final an thlen lehna hmasa ber a ni bawk. Anmahni English ho tawngkam takin England-ah football a lo kir leh ta a ni ber e!