Career Guidance : SORKAR HNA PIAH LAM

Khawvel inher danglam zelah eizawnna chi hrang hrang a lo tam ta a, sorkar hna piah lamah eizawnna chi hrang hrang a lo tam ve ta. Tin, mipui pun zel anga sorkar hna hi pung ve thur thur thei a nih loh avangte, sorkar hna tha a lut tura inelna nasa tial tial avangtein sorkar hna a luh hi a harsa ta hle a. Chutih rualin, eizawnna peng hrang hrangah sorkar hnathawh aia hlawk zawk a lo tam ta bawk nen, Mizo thalaite pawhin sorkar hna piah lam kan melh a hun ta hle a ni.
Private sector lama eizawn a thatna pakhat chu – thawhna a zirin taimak a, thiam tawk phawt chuan hlawh a pung thur thur thei hi a ni. Company lian tak takah luh fuh a, hna thiam mi nih chuan kum khatah vawi 2/3-te pawh a kaisan theih a. Entrepreneurship lam kawng zawh a, mahni ke ngeia dinchhuah tuma sumdawnna kawng zawh phei chuan hausak thur thur theih a ni. Amaherawhchu, sorkar hnathawkte angin a ngheta thawh ve theih a ni lo a, harsatna engemaw a thlen avanga chhiat tawh burh emaw, ban mai theih emaw an ni thung. Hetiang a nih avang hian private sector lama eizawn tum tan chuan inthlahdah a thiang lo reng reng a ni.
Tunlai khawvela sorkar hna piah lama eizawnna hlawk leh hna tamna, Mizo thalaite bawh theih tur chi hrang hrang lo tarlang ila:
Management :
Management course hi Graduation – MBA, BBA, BMS & BHM leh diploma course bakah certificate course te, thla 3 atanga kum 4 thleng a zir theihte a awm a. Tin, management huangah hian Hotel management-te, hospitality management course tamtak zir tur a awm reng bawk. Hengte hi tunlai khawvelah chuan private hnuaia hna hmuh awlsam em em na, hlawk bawk si a ni a. Hospitality management hnuaia khung theih beautician-te, hair dresser, etc-te hi tunlai khawvelah chuan eizawnna hlawk tak a ni tawh a ni. Mizoram pawn lama thawk ngam tan phei chuan Hotel lianah te, Cruiseline, Airlines, etc lamahte hna chi hrang hrang a tam hle.
Image result for Careers under management stream
Banking :
Bank lam hna chi hrang hrang (Probationary Officers, Clerks, etc) hi Graduate tan exam theih a ni hlawm a. India rama bank chi hrang hrangte hian a khat tawkin exam an buatsaih reng a, public sector bank hrang hranga thawk tur a hlawma latu IBPS (Institute of Banking Personnel Selection)-in a khat tawkin exam an buatsaih reng bawk a, exam a tam avang hian inbuatsaih thlawn a awm hman meuh lo. Hlawh a tha em em a, hamthatna tamtak an nei bawk.
Image result for Banking Career in India
Law :
Class XII pass hnuah LLB kum 5 chhung (5 yrs course) a zir theih a, Graduate hnuah LLB kum thum (3 yrs course) a zir theih bawk. Law hi master degree leh a chunglam thlengin zir theih a ni. Law lam thiamte tan chuan Lawyer (Ukil) mai bakah sumdawng company liana thawh thlengin hna a tam thei hle. Ukil lar leh mi rawih hlawh deuhte phei chu rawih man an toin, an hausa chak em em a ni.
Medical :
Damdawi leh a kaihhnawih lamah hian eizawnna a tam em em a, course zir tur chi hrang hrang pawh a tam hle. Doctor chi hrang hrang (MBBS, BAMS, etc), BDS (Dental) Nursing (B.Sc Nursing & GNM), Pharmacy (B.Pharm, etc), Technician, Assistant, etc te hi tunlai khawvelah chuan eizawnna tha tak a ni vek a. Sorkar a luh kher ngai lovin heng thiamna neite tan hi chuan private hospital leh clinic-ah te, company hrang hrangahte hna a tam thin hle. A thiam zualte tan phei chuan hlawk zawka foreign lam thlenga thawh theih a ni.
Medical lam hi awlsam tak zir theih a ni lo tlangpui a, Institution tha a lut tur phei chuan entrance hautak tak paltlang a ngai deuh vek a ni. A bikin MBBS leh BDS zir tur phei chuan all India entrance exam, NEET paltlang ngei ngei a ngai a ni.
Engineering :
Science peng pakhat, Engineering lam zirchhuakte tan hian private company hrang hrangahte, corporate lian tak takah hna a tam thei hle a. A tlangpuiin heng company liana thawkte hi an thiamna ang nei, sorkar hnuaia thawkte aiin an hlawh a sang zawk deuh vek bawk. Mechanical Engineer-te, Oil lam kaihhnawih Engineering lama thiamna neite tan phei chuan Oil company leh mechanical lam kaihhnawih company-ah thawhna tur a tam em em a  ni. Engineering hi chi hrang a tam a, sorkar hnuaia lut kher loa hna hmuh theih mai na tur thlan thiamte pawh a pawimawh hle a ni.
Image result for different types of Engineering
Journalism & Mass Communication :
Chanchinthar thehdarh leh a kaihhnawih lama tui tan course chi hrang hrang a zir theih a. Diploma, Graduation atanga Master degree thlenga zir theih a ni. Hetiang lama thiamna nei leh tui tan chuan News agency lian tak takah te, mahni a practice pawhin thawh tur a awm ve reng thei a. Tin, ram changkang apiangah hetiang lama thawkte hi ngaihpawimawh an nih thin avangin zahawmna nasa tak a keng bawk.
Designing :
Designing tih ringawt hnuaiah hian course hrang hrang -Fashion designing, Interior designing, Graphic designing,  etc a awm thluah a. Certificate leh diploma course zir theih tamtak a awm a ni. Khawvel changkang zelah hengte hi eizawnna tha leh hlawk tak an ni tawh a, sorkar a luh kher ngai lovin, sumdawnna idea nei tha deuhte phei chu an hlawk thin hle a ni. He huanga khung tel theih pakhat Architechture lamte hi eizawnna tha leh hlawk lutuk a ni a, amaherawhchu, hemi line zir thei tur chuan entrance hautak tak paltlang a ngai thung.
Visual art/decorative art:
Hemi huang chhungah hian course tamtak zir tur a awm a, hetiang lama kal mi tan chuan eizawnna tling tak vek a ni. Chhungte chu: Painting, Drawing, Sculpture, Photography, Conceptual arts, Architecture, Weaving, Fabrics, etc.
Performing arts : Performing arts an tih ho hi entertainment lam nena inkaihhnawihte a ni hlawm a, Mizo thalai tamtakin eizawn nan a an hman lai mek a ni hlawm. Chungte chu : Music, Theatre, Dance, Singing, Acting, Comedy, Direction, Choreography, Editing, Martial art, etc
Construction Works :
Tunlai khawvela Mizorama hna hmu ber pakhat chu Construction worker-te hi an ni. Construction worker kan tih hian Cement mistiri, thing mistiri mai bakah labour-te, construction lam kaihhnawih a thawk chi hrim hrim sawina a ni ber. A bikin Thing Mistiri leh Cement Mistiri-te, Floor tile phah thintute, Electrician-te leh tlema thiam bik nei hnathawktute hian hna an ngah em em reng a ni. Heng eizawnna tamtak, thla khata sing engemawzat lakluh theihnate hi Mizoten bawh nachang kan hre tawk lo a, hnamdang tamtak an lo luh phah thin a ni.
ITI Courses :
Mizoram a Industrial Training Institute hrang hrangah Course tangkai leh tha tak tak engemawzat zir tur a awm a. Hengte hi lehkha zir sang lutuk lote thlenga zir theih, tangkai bawk si a ni a, bawh nachang kan hriat a pawimawh hle. ITI, Aizawla Course awmte: Computer Operator & Programming Assistant, Stenography (English), Hair & Skin Care, Baker & Confectioner, Cutting & Sewing,  Information Technology & Electronics System Maintenance (IT & ESM), Mechanic Computer Hardware, Electronic Mechanic, Electrician, Surveyor, Draughtsman (Civil), Mechanic (Motor Vehicle), Mechanic ( Diesel ),  Mechanic (Refrigeration and Air-Conditioning), Mechanic Auto Electrical & Electronics, Mechanic (R & TV), Fitter, Sheet Metal Worker, Welder (Gas and Electric), Carpenter, Plumber, Mason (Building Constructor), Wireman.
Poytechnic Courses :
A chunga kan sawi tamtakte khi Mizorama zir theih deuh vek a ni. Women Polytechnic, Durtlangah ringawt pawh heng course hrang hrangte hi zir theih a ni: Diploma in Electronics and Telecommunication Engineering, Modern Office Practice, Garment Technology, Beauty Culture and cosmetology. Tin, Mizoram Polytechnic, Lungleiah Engineering lam course chi hrang hrang a zir theih bawk.
Corporate World :
A chung lama kan tarlan leh kan tarlan sen loh thiamna chi hrang hrang neite tan hian Company lian tak takah hna a tam em em reng a. Company lian deuhah phei chuan thiamna neih inang rau rauah sorkar hnathawk hlawh let engemawzat hlawh theihna te a ni. Amaherawhchu, heng corporate liantham hnuaia thawk tur hi chuan communication skill (language, etc) neih that te, midangte nena thawh ho thiam ni nihte, mihring nunphung zei chi nihte a ngai a. Mahni zirlai thiam mai bakah interview hmachhawn dan thlenga thiam hle a ngai a ni. Mizo thalaiten hetiang lama harsatna kan tawh lian ber thin chu tawng (language) a ni a. Chuvangin, hetiang a corporate world a hna thawk thei tur chuan English nal taka thiam mai bakah Hindi thiam tel a tha hle.
Entrepreneurship :
Entrepreneurship tih chu mahni kutkawih sumdawnna lama thil thar chinchhuahna emaw, mi tih tawh sa pawh ti danglam zeuh a sumdawnna tha zawka chhuah theihna kawng hi a ni ber a. Khawvela mi hausa ber berte hi entrepreneur an ni deuh vek a ni. Hetiang sumdawnna lama idea nei tha leh mi taima tan chuan eizawnna tur a tamin, a bikin Mizoramah chuan chance a la sang hle. Mizoram sorkar pawhin hetiang lama tuite tan hian hamthatna dawn theihna tur ruahmanna chi hrang hrang Entrepreneurship Development Scheme (EDS) hnuaiah a nei tha tawh hle.
Image result for Entrepreneurship
Entrepreneurship lama kal tur hian qualification sang tak neih ngei ngei a ngai kher lo a, amaherawhchu, idea tha tak neih a, plan fel tak siama a taka bawhzui nghal a ngaih avang leh, mi kawng la zawh ngai loh, kawng khawhar tak zawh a ngaih chang a awm avangin chhel a ngai hle. Mi fimkhur tak leh chik taka thil ngaihtuah hmasa mi nih a ngai bawk.

– C.Lalhriatpuia

Editor, Hillsgate

Be the first to comment on "Career Guidance : SORKAR HNA PIAH LAM"

Leave a comment

Your email address will not be published.


*


This site uses Akismet to reduce spam. Learn how your comment data is processed.