Donald Trump-an chhiah tih punah EU a vau ve ta; China-in Trade War a tuar

US President Donald Trump chuan European Union (EU)-in US atanga an bungraw lakluh atanga chhiah an lakte an tih tawp loh chuan EU atanga an car lakluhte atangin chhiah 20% lak ve ah a vau. He an chhiah lak tur hi an tih puitlin a, EU nen sumdawnna lama indona (trade war) an neih vaih chuan $ 300 billion vel hu sumdawnna a nghawng thei dawn a ni.

Zirtawpni (June 22, 2018) ah khan he thu hi Donald Trump hian tweet-in, “US company leh hnathawktute tawrhna nasa tak thlentu he EU chhiah lak hi tihtawp a nih loh chuan an hnen atanga Car kan lakluhte atangin chhiah 20% lak ve a ni tawh ang” tiin a sawi a ni. He thu hi EU-in America thilsiam thenkhat atanga chhiah $ 3.3 billion lakna tur thu a tihchhuah atanga darkar khat hnuah Trump hian a tweet ve nghal a ni.

Hetih lai hian EU lam pawhin US-in chhiah 20% a lak vaih chuan thungrulh ve ngei tumin ruahmanna an siam tawh niin Bloomberg chuan an tarlang ve bawk a. “US chhiah lak tur chu tih hlawhtlin a nih chuan a phu tawk ang ngeia thungrulh a ni ve ang” an ti.

European ramten chhiah 25% an lakna hi Harley-Davidson Inc. motorcycles, Levi Strauss & Co. jeans leh bourbon-ahte  a  ni a. Hei bakah hian  category hrang hrang 200 chuang – Vaimim, buhfai, serthlum juice, cigarretes, cigar, T-shirts, cosmetics, lawng leh steel lam a huam tel dawn a ni.

Trade War

China nena trade war an neih lai mek bawk avangin Donald Trump-an kum engemawzat chhunga an thawhpui tha berte zinga mi lo ni tawh European auto industry-te a vauna hian US dinhmun a ti khirh sawt thei dawn niin zir mi thenkhatte chuan an sawi a. Hetih lai hian anmahni lama chhiah lak awm ve ngai si lo kara ram dangin US thilsiamte laka chhiah an lo lak fo tawh thinte thungrulh nana hetia chet a thawh chho ta hian mi tamtak thlawp a hlawh hle bawk. Kan hriat tawh angin June 6 khan US chuan China atanga an bungraw lakluhte atangin chhiah 25% lakna tur thupek a lo tichhuak tawh a. China pawhin hemi thungrulh nan hian US chhiah bituk zat ang chiah hi bungraw engemawzatah a bituk ve nghal tawh bawk a nih kha.

Ram dang atanga bungraw lakluh a tam hian ram chhunga thilsiamtuten nasa takin an tuar thin a. March thla daih tawh khan US Commerce department chuan ram dang atanga an car lakluhte avanga an ram a car siamtute tawrh dan an lo zirchiang fe tawh a. An thil hmuh chhuah a zirin a tul a nih phawt chuan US President hian rorel khawl Congress pawmpuina nei kher lo pawhin hetiang lam thila hmalak theihna dan, kum 1960 chho a an lo siam tawh hmangin a nei a  ni. Heng avangte pawh hian a ni mahna, US hian March 2018 khan khawvel hmun hrang hrang atanga steel leh alluminium a lakluh thinte atangin chhiah engemawzat a lo la thar tawh a. Hetianga ram dang atanga a bungraw lakluh atanga chhiah an lak thar laite pawh khan EU ramte atanga metal lam thil a lakluh thinahte chuan tax an la ngai chuang lo a, amaherawhchu, heng zawng zawng hi tun boruak lo awm thar hian a vaw chhe thei hle dawn niin a lang.

America’s Ambassador to Germany Ric Grenell chuan he buaina thleng thar chinfel dan tur ngaihtuah hian Washington lamah hma a la mek a. White House trade adviser Peter Navarro, Commerce Secretary Wilbur Ross, U.S. Trade Representative Robert Lighthizer leh Treasury Secretary Steven Mnuchin-te chu US leh Europe ramte inkara car thawnchhuah leh lakluh a tax lak a nih loh nan theihtawpin hma a la mek a ni. Report thenkhata a lan dan chuan Trump’s administration leh German car siamtute chuan a rawtnate chu an pawm thei tawh a, inremna erawh siam a la ni lo niin report a ni.

China-in trade war a tuar

US leh China inkara Trade War thleng mek avanga China rama industry ten an tawrh lutuk loh nan anmahni tanpuina tur US $ 100 billion zet chu vawiin June 24 hian China Central Bank, People’s Bank of China (PBOC)  chuan a release a. China hian trade war hi a tuar hle a, kum 2 chhunga an stock market hniam ber lai an tawn mek bakah kum engemawzat chhunga investment leh retail sales lama an hniam ber lai an tawng mek bawk.

China hian kum kalta khan US atangin US $129.89 billion man vel bungrua a lak luh laiin US $505.47 billion man zet US-ah hian an thawnchhuak thung a. US-in China thilsiam hoah tax a lak tam hian China bungraw man a sang a, a man a san sawt avangin a hmangtu an tlahniam a, an bungaw thawnchhuah thin zat nasa taka a tlakhniam tak avangin China rama bungraw siamtu company tamtakah nghawng nasa takin a nei tan ta niin a lang.

US leh EU inkarah hian trade war hi thleng leh ta se, khawvel economy hi eng ang takin nge a nghawng ang tih hi ngaihtuah tham tak a ni ta a ni.