Dem hlawh Courtois. A chhuanlam hi a tha tawk em.?

Belgian goalkeeper Thibaut Courtois chuan Chelsea chhuahsanin spanish club lian Real Madrid a zawm a, a chhuah danah Chelsea chhungkua bakah football khawvel atangin demtu an tam hle.!

Tunge Courtois?

Belgian professional footballer hi kum 1992, May 11 khan Belgium khawpui pakhat Bree-ah a lo piang a, a hming dik tak Thibaut Nicolas Marc Courtois niin; a hming hmasa leh tawp ber Thibaut Courtois  [tiˈboː kuːrˈtʋaː] tih chu kan hriatlar dan a ni. Naupangte anih lai atangin an khaw club Bilzen V.V-ah football a khel a, left back (defender)-ah a khel thin. Kum 1999 khan kum 7 mi lek ni chungin an ram club tha pawl K.R.C. Genk-ah a lut a, hetah hian goalkeeper-ah a inlet chho ta a ni.

Genk youth team-ah hian hma a sawn chak hle a, age level hrang hrangah an keeper rinrawl a ni nghal a, kum 16 leh ni 341 a upa a nihin senior team tana a game hmasa ber a khel a, kum 17 a nih chuan Genk senior team tan first choice goalkeeper a ni thei tawh. Kum 2010-11 season khan Genk chu Belgian Pro League-ah a champion pui a, Goalkeeper of the Year leh Genk Player of the Year award a dawng nghe nghe. Heihi Chelsea chuan lo hmu fuhin kum 2011 July thla khan €9 million-in an lei nghal chat a, kum 5 daih contract an ziahpui nghal.

Chelsea a zawm hnu leh buaina awm chhoh dan..

Chelsea a zawm hian kum 19 chiah a la ni a, goalkeeper tha tak Petr Cech a la awm bawk si avangin Atletico Madrid lamah loan-in an kaltir nghal a, tuna Manchester United goalkeeper David De Gea hmunruak a hnawhkhat a ni. Atletico-ah hian season thum chhung ropui takin a khel a, nomawi pali La Liga, Copa Del Rey, UEFA Europa League leh UEFA Super Cup a chawipui a, goalkeeper tha chawimawina Zamora trophy leh LaLiga Goalkeeper of the Year a dawng bawk. Field chhunga a chet that ang bawkin field pawn lamah pawh a che tha (?) a, a hmeichhe hmangaih Marta Dominguez tawngin, tuna a buaina leh a chhuanlam ber  a ni zui ta bawk.

A bialnu Marta nen hian innei lo mahse kum 2015 May thla khan fanu Adriana an nei a, kum 2016 September thla khan an fa pahnihna an pai lai mekin an inthen thu an puang a, thian anga an aawm zel tur thu an sawi thung. An inthen hnu kum 2017 May thlaah fapa Nicolas an nei leh bawk. Fa pahnih an neih hnu pawh hian inpawh tak chung siin an la inthen reng a, a fate hi a nu bul (Madrid)-ah awmin ani London-ah a awm thung.

Pathlawi lungleng….

Courtois hian kum 2019 June thla thleng Chelsea-a cham turin contract a ziak a, nikum kum tir atang khan a contract pawhsei tir tumin Chelsea lamin an thlem char char a, mahse chhuanlam engemaw siamin a hnar zel thung. Hetih lai hian a fate a ngaihthu leh a rilru chu Madrid-a a awm thu a khat tawkin a sawi chhuak reng a, Chelsea fans tam takin an mil lo nghal hle.!

Dem a hlawh chhan..?

Kumin World Cup-ah khan an ram chu pathumna nih puiin goalkeeper tha berah thlan a ni a, tun thla Ni 6 khan club training zawm leh tura tih a ni. Training an zawm hunah hian ram tana a khelhpui Eden Hazard leh Michy Batshuayi ten tha taka an zawm laiin Courtois erawh a inlan lova, phone hmangin Chelsea chhuahsan a duhthu club hotute a hrilh nghal bawk. Chelsea lamin training zawm phawt tura an tih hnuah a chhan hriat lohin thawhlehni (Aug 7) khan a zawm lo leh a, heivang hian Chelsea chhungkua mai bakah football khawvela mi hrang hrang pundits, commentators leh fans tam takin a chetdan an dem hle. Courtois chetdan hi a professional lo an tiin, contract a neih mekna club leh fans te a zah lo an ti a, a chetdan chu zahawm lo leh zahthlak an tih thu an sawi hlawm.

Training ni hnih chhung a zawm duh loh hnuah nimin (Aug 8) khan Chelsea chuan Courtois thlakna tur melhin, Athletic Bilbao goalkeeper Kepa Arrizabalaga chu khawvel goalkeeper man to ber ni turin an leinghal a, kum 23 chauha upa Kepa hi a contract neih meka leichhuah theihna zat an ziah pound maktaduai 71 in Chelsea hian a lei a, kum 7 daih contract an ziahpui a ni.

Kepa an leihnuah Chelsea hian kum khat chauh contract nei tawh Courtois chu Real Madrid hnenah pound mtd 35-in an hralh ve nghal a, a fate a chhuanlam chhan ber (?) Real Madrid a luh chu Courtois chuan a sual chhuak ta a ni. Real Madrid hian Courtois an lei manah pawisa bakah an midfielder Kovacic chu Chelsea-ah loan-in an kal tir bawk.

Real Madrid zawm duh/ Fate bula awm duh vanga hmingthatna kalsan tu(?) Thibaut Courtois

Real Madrid a zawm dawn tih a chian hnuah Courtois hian Chelsea thlahna thu facebook-ah a post a, mahse Chelsea fans ten ‘phatsantu’ tia an comment nasat avangin a post hi a delete leh nghal a, Istagram lamah pawh a post comment theih lohin a dah bawk. Chelsea tan ropui takin khelin nomawi hlawhchhuak mahse, a huntawp hman danin a zir lova, Chelsea fans tam zawk tan chuan ‘phatsantu’ a ni reng tawh ang.!