Damchhunga Politics khel thei tawh lo tur – Pakistan PM hlui Nawaz Sharif

April 13, 2018 khan Pakistan Supreme Court chuan thutlukna thar siamin, politician/public office a nihna pawimawh tak chelh lai, dik lohna engemaw an neih avanga an nihna atanga Court-in a chawlhtir tawhte reng rengin dam chhungin Politics an khel zui thei tawh lo ang a ti.

He thutlukna hian kum 2013 election-a a hausakna zep thentu, Panama Papers atanga hmuhchhuah a nih leh si avanga Prime Minister atanga chawlhtir tak Nawaz Sharif pawh a nghawng nghal a. A ni pawh hian a damchhungin Politics a khel thei dawn ta lo a ni. He court thutlukna hi Nawaz Sharif-a case behchhan a siam ni ngei a ngaih a ni bawk.

SC chuan Constitution article 62 (1) (f) anga MP atanga paihte emaw, ram hruai hna pawimawh thawkte emaw, an nihna atanga chawlhtirte reng reng hremna chu ‘permanent’ a ni tur a ni a ti a. “Chutiang mite reng reng chuan inthlan an hmachhawn thei tawh lo ang a, Parliament member an ni thei tawh lo ang” a ti. He constitution article hi amah Nawaz Sharif ngei hian a lo thlawp tawh thin avangin a tan beih letna tur a vang dawn hle a ngaih a ni.

He thutlukna siamtu member 5 awmna SC Bench hi Chief Justice Mian Saqib Nisar-a’n a ho nghe nghe.

He thutlukna hian Imran Khan-a kaihhruai Pakistan Tehreek-i-Insaf (PTI) party hruaitu senior, Jehangir Khan Tareen political career a titawp bawk a. A ni hi Election-ah UK-a a thil neihte a tarlan tel loh vanga disqualified a lo ni tawh bawk a ni.