Chelsea manager a over mah mah em.?

Chelsea manager thar Maurizio Sarri chuan England-ah boruak thar a tem chho mek a, a nun thlak hlawk thei thil pawh a hmachhawn mek.! Chung zingah chuan a zialzuk nasat lutuk hi a langsar ber a ni a, stadium chhungah meizuk khap a nih bawk si avangin a chi ai lohna tur kawng an dap mek a ni.

Italiian manager hi meizial heh tak a ni a, nikhatah cigarette bawm nga vel a zu zo thin niin an sawi. Tun hmaa hna a thawhna Italy-ah chuan stadium chhungah meizuk phal a ni a, touchline-ah a pak khu luih luih thin a ni. England-ah erawh kum 2007 atang khan stadium chhunga meizuk hi khap a ni a, hei hi Sarri tan chuan thil harsa ber pawl a ni ta a ni.

Italy-ah chuan meizu chungin inkhel a enkawl thin..

Inrinni liamta khan Sarri hian Premier League-a a game hmasa ber khelin, Huddersfield lakah a team te 3-0 in a chak pui nghal. He inkhela sawi zui hlawh ber erawh Sarri chetdan a ni a, meizial a zu chak lutuk tih reh nan cigarette a filter lai chu a hmuam deuh reng a, a changin a thial bawk. Hetiang teh nuaih anih avang hian Chelsea lam chuan an manager hi stadium chhunga meizukna hmun tur siamsak dan an ngaihtuah hial a ni.

Huddersfield leh Chelsea inkhelh laiin, a mei zu chak lutuk tih reh nan cigratte filter a hmang.

Hetihlai hian England rama meizuk do pawl Smokefree England chuan Chelsea thil tih tum dan chu dan kalh a ni an ti ve nghal a, dan hmanga beihlet an tum ve bawk. Chelsea hian an manager tan hian meizukna hmun siam thei pawh nise, Stamford Bridge-ah chiah a ni dawn a, midang khelmuala an inkhelh chuan Sarri hi a insum a ngai tho dawn a ni.

Sarri chungchangah hian comment tu tam tak ngaihdan a inang lova, thenkhat chuan insum tum lo leh inthunun thei loah an ngai. Heng ho ngaihdan hi a dikna chen a awm a, inkhelh chhung hi minute 90 nimahse; minute 45 hnuah chawlhlawk minute 15 an nei a, hetah hian dressing room lamah meizukna hun a nei thei a ni. Minute 45 chhung lek insum harsa a ti em em hi a ‘over’ ti te pawh an awm ve bawk. Thenkhat erawhin an dem hran lova, meizuk chaknain min tur tawh chuan insum a har em a ni an ti ve thung.

Sarri hi Mizoram-ah chuan awm se, meizuk khap pawl ten an man zin pawl a ni ve ngei ang 😀