Chakma-te’n HC-ah Case tharthawh leh; MIMER-a MBBS seat hnawhkhah theih a ni rih lo!

Mizoram sorkarin technical seat pek chungchangah Chakma-te Category-I atanga Category-II a a dah avanga Chakma thenkhatten High Court-a Mizoram sorkar an khinna thubuai kal zelah High Court chuan Mizoram sorkar chu ‘stay order’ a pe.

Chakma thenkhatten Mizoram sorkar an khinna thubuaiah hian High Court a hearing neihnaah thubuai thehluttute an inlan mumal loh avangin kum 2017 khan High Court hian he case hi a lo titawp (dismiss) tawh a. Amaherawhchu, he case hi Gauhati High Court Mizoram Bench atangin Gauhati HC lama sawnthlak a nih hnuah Chakma thenkhatte hian case hi an tinung thar leh a. High Court pawhin case tih nun leh hi lo remtih sakin, Mizoram sorkar chu Technical seat allotment a kalpui lai titawp rih turin hriattirna a pe ta a ni.

Hetiang a nih avang hian MIMER-a Category-I seat 66 zinga la hnawhkhah loh seat 4 chu hnawhkhah hman a ni ta lo a ni.

Engtin nge ni zel ang?

High Court-in Chakmate hi Category-I a a dah let leh a nih chuan heng seat awl 4-te hi Mizo zirlai seat nghak mekte aia rank sang zawk Chakma zirlaiten an chan theih mai rin a ni a. Amaherawhchu, tute pawhin seat hi chang zui dawn sela, class tan a nih tawh avangin admision ti thei tur chuan Mizoram sorkarin Union Ministry of Health & Family Welfare leh Medical Council of India (MCI) lamah High Court thutlukna a zir a tlaikhawhnu a admission tih phalna a neih lawk thlap a ngai thung ang.

CASE DANG A LA AWM CHEU…

Kum 2017-a MBBS zir tura allotment pek vek tawh, Zirlai pawlte nawrna avanga  an cancel leh tak Chakma zirlaiten Mizoram sorkar hi High Court-ah an khing tho bawk a. Hemi chungchang a ngaihtuah chhung chu MBBS seat 4 lo dah awl rih tura Gauhati High Court-in Mizoram sorkar a lo hriattir tawh angin MIMER-a MBBS seat 4, Category I seat pakhat leh Category II seat pathum chu Mizoram sorkarin a dah awl rih bawk a. A chunga case dangah seat 4 stay a nih bawk avangin MIMER-a Mizoram quota seat 70 zinga seat 62 chu hnawhkhah a ni tawh a, seat 8 chu hnawhkhah theih a la ni ta rih lo tihna a ni.

MIMER-a MBBS seat awm dan

MIMER-ah hian MBBS seat 100 a awm a, seat 15 chu central pool atana dah a ni a, seat 15 chu India mi, ram danga chengte, Non-Resident Indian (NRI) te puala dah a ni thung (NRI-te zir man hi a to bik a, tuition fee ah ringawt pawh kum khatah cheng nuai 10 chuang hret an chawi ang). Hetiang a nih avang hian seat 100-ah Mizoram quota chu seat 70 a ni ta a. Hetah hian Category I tan seat 66 dah a ni a, Category II tan seat 3 dah niin, Category-III tan seat 1 dah a ni bawk.

Category-III puala seat pakhat dah hi Counselling vawi 2 neih a nih chhungin diltu pakhatmah an awm lo a. Spot round-ah erawh diltu pakhat a awm ta a, amaherawhchu, seat allot fel a nih hmain High Court-in stay order a pek hnan tak avangin engmah tih hman a ni ta chuang lo a ni.

NRI seat 15 hi allotment tih fel vek tawh a ni a, he thu buatsaih lai hian Central pool atana dah seat 15 hnawhkhattu an awm leh awm loh a la hriat theih loh thung.

Mizoramin MBBS seat engzatnge a neih tak?

Mizoramin kum 2018-ah hian MBBS seat 84 a nei ta a. Heng zinga seat 70 chu Mizoram Institute of Medical Education & Research (MIMER), Falkawn a mi niin a dang seat 14 chu North East state hrang hrangah a ni thung. North East state danga Mizoramin MBBS seat a neihnate chu:

RIMS, Imphal                         – seat 7

NEIGRIHMS, Shillong            –  seat 3

AGMC, Agartala                     – seat 2

AMC Dibrugarh                     – seat 1

Tejpur MC, Tejpur                – seat 1

TOTAL                                    – seat 14