Sipai Officer nih theih dan hrang hrangte

National Defence Academy (NDA) and Naval Academy (NA):

NDA and NA Exam hi UPSC-in kumtin vawi 2 a buatsaih thin a. 10+2 pass tawh emaw, zirlai mek emaw tan dil theih a ni. Navy leh Airforce a lut turin XII Science (Physics & Mathematics) lak a ngai a, Army atan chuan Arts la tan pawh a dil theih thung. UPSC Exam an paltlang hnuah Service Selection Board (SSB) interview ni 5 chhung an hmachhawn leh thin. NDA Exam hmachhawn tur hian kum 16 leh a chanve atanga kum 19 inkar nih a ngai. Kumtin Exam vawi 2 awm thin a, vawi khatna hi a hma kum December emaw January thla velah notification a chhuak thin a, NDA-II erawh June thla velah tihchhuah a ni thin.

Combined Defence Service Examination (CDSE):

CDSE pawh hi kum khatah vawi 2 buatsaih a ni thin a. Graduate emaw, final semester zirlai emaw tan a dil theih a, kum 19-24 inkar tan dil theih a ni. Written Exam paltlangten NDA ang bawkin SSB an hmachhawn leh thin. Exam vawi khatna hi a hma kum December velah hriattirna tihchhuah a ni thin a, a vawi hnihna hi August thla velah tihchhuah a ni thin thung. Mark hmuh ngai zat bituk a awm lem lo.

10+2 Technical Entry Scheme (TES):

HSSLC/Class XII Exam a Physics, Chemistry leh Mathematics la, 70% hmu pha chinte tan he scheme hmang hian sipai officer-ah a luh theih a. SSB interview an hmachhawn a, an paltlang theih chuan kum khat sipai nunchan an zir phawt a, chumi hnuah Engineering degree kum 3 an zir leh thin. Chutiang hnuah chuan Officer an ni ta thin a ni.

University Entry Scheme (UES):

Engineering zirlai, final year zirlai mekte tan he scheme hnuaiah hian sipai officer hna a dil theih a. Army headquarters lamin Screening team siamin campus interview an nei thin. Amaherawhchu, SSB/Medical Board erawh an hmachhawn a ngai ve tho. SSB an paltlang hnuah Indian Military Academy (IMA), Dehradun-ah kum khat an training a, officer puitlinga hlankai an ni thin a ni.

Technical Graduates Course (TGC):

Discipline thlan bik a Engineering graduates emaw, post graduate, second division-a pass chin tan Army Education Corps-ah a luh theih a, MSc in Agriculture/Dairy-te tan Military Farm-ah pawh a luh theih bawk. A dang ho ang bawkin SSB an paltlang vek tho a ngai.

Fighter pilots belonging to the Cobras and Flaming Arrows squadron walking to the flight line ahead of a practice sortie in preparation for the Indo-Oman air exercise somewhere in UP.

Short Service Commission (Technical) Entry:

Technical graduates/post graduates-te tana hun engemawchen sipai officer a luh ve theihna a ni a. SSB leh Medical Board an paltlang hnuah OTA, Chennai-ah chawlhkar 49 vel an training a, a hnuah officer an ni zui thin. Short Service Commission officer-te hi permanent officer ni lovin, hun tiam nei a tang an ni a, kum 10 an tan hnuah an duh chuan permanent officer-ah an lut leh thei tho bawk.

NCC (Special Entry Scheme)

University graduates, NCC ‘C’ Certificate nei, an college kal chhunga 50% mark hmu pha zat zat chin tan sipai officer a luhna chance tha tak a awm a. Final year/semester zirlaite tan pawh dil theih tho a ni. UPSC written exam an hmachhawn a ngai ve lo a, SSB interview direct-in an hmachhawn thei thin a ni. Hetiang a dil thei tur chinte chuan State level NCC Group Headquarters kaltlanga dil tur a ni a, Group Headquarters atangin Directorate General of NCC-ah, chuta tangin Recruiting Directorate-ah an kal tir leh thin. Mipa leh hmeichhia tan a dil theih ve ve.

Judge Advocate General Entry:

Law graduates (LLB), 55% aggregate marks hmu pha, kum 21 – 27 inkar tan a dil theih a. UPSC paltlang ngai lovin SSB-ah an direct thin. Hei hi permanent officer ni lovin short service commission tho a ni a, an duh chuan permanent pawhin an lut zui thei tho bawk.

Short Service Commission Women/ TGC (Education)/AEC:

Hmeichhia, thiamna bik neite tan Non-Technical Graduate, Technical and Post Graduate/ Specialist-te tan Education Corps, etc-ah Short Service Commission-in kum 10 a tan theih a. Voluntary-in kum 4 pawh sei theih a ni.

B.Sc Nursing-te tana Military Nursing Service aluh dante te, MBBS-te tana sipai officer nih theih dan kawng a hranpa a sawi tham a la awm a, hun remchangah kan la tarlang leh dawn nia. Sipai hna hi a tam a, a thain a zahawm bawk a. Thalaiten nasa lehzuala kan bawh a hun ta hle a ni.

%d bloggers like this: