NATIONAL DEFENCE ACADEMY (NDA) EXAM

National Defence Academy (NDA) hi Pune khawpui chhim thlang lam km 24 vela hla a Khadakwasla Dil kama awm a ni a. Ram 8300 acres (sq.km 34) vela zau a ni. Kum 1949 vela Sap Viceroy hovin bul an lo tan tawh a ni a. India ram Prime Minister hmasa ber Pandit Jawaharlal Nehrua’n lungphum phumin, kum 1955 January 16 khan hawn a ni.

NDA hi India rama Sipai Officer tam zawkte train chhuahna hmun ber a ni a. Sipai lama tui thalai tam zawkten an tum ber chu NDA a luh hi a ni. He hmunah hian India rama sipai hrang hrang- Army, Air Force leh Navy Officer atana lak tharte an training thin.

NDA Entrance Exam hi Union Public Service Commission-in kumtin vawi 2 a buatsaih thin a. Class XII pass hlim zirlai tamtakin an exam thin. He exam hmachhawn theite chu:
1. State Board leh University hnuaia Class XII emaw a tlukpui emaw pass chin. A chung lam tan pawh dil theih tho.
2. Mipa nupui la neilo tan chauh exam theih a ni.
3. Kum 16 1/2 – 19 inkar.
4. India khua leh tui a ni ngei tur a ni. Hetah hian-
a) India khua leh tui pangngai
b) Bhutan, Nepal leh Tibetan refugee, an nu leh pate kum 1962 January 1 hma lama India rama lo awm tawh.
c) India mi leh sa, Pakistan, Burma, Sri Lanka leh Africa khawthlang lam ram thenkhat- Kenya, Uganda leh United Republic of Tanzania atanga lo pemte.

NDA-ah hian Army, Navy leh Airforce-te an Training kawp vek avangin dil thei chin pawh an hrang deuh nuai a. Class XII Arts pass tan Army-ah chauh a dil theih laiin Airforce leh Navy atan chuan Class XII Science (Physics, Chemistry, Mathematics- PCM) ngei a ngai thung. Kum tin March thlaah Exam vawi khatna NDA & NA-I a awm thin a, September thlaah vawi hnihna NDA & NA-II a awm thin. He exam hmachhawn tum tan chuan hemi hma lam thla 4/5 vel atangin dilna ngaihven tur a ni.

NDA Exam Centre hrang hrang 40 zingah Aizawl a tel ve avangin Aizawl-a Exam Centre, Govt. Mizo Higher Secondary School, Aizawl-ah exam mai theih a ni a. Dilna hi online vek a kalpui a ni tawh a ni.
Candidate te chu ngun takin an exam thin a. Exam hautak tak tak hetiang hi paltlang a ngai:
1) UPSC buatsaih Written Exam.
2) Candidate-te theihna enchhin nana Service Selection Board hma a interview (Intelligence & Personality Test)
3) Service Medical Board hma a Medical Examination.
Written examination
Subject Duration Marks
Mathematics 2 1/2 hrs 300
General Ability 2 1/2 hrs 600
TOTAL 900

Written Test a paper-te hi Objective Type vek a ni a, English veka question set a ni bawk.
Interview hi sawi tawh angin Intelligence & Personality Test a ni a. Verbal leh non-verbal-a kalpui a ni thin a. Group Discussion-te, group planning te, outdoor group task te leh tawi te te a lecture inpek tir hmang tein an endik thin bawk. Interview hi Candidate-te thiam leh thiam loh lam ai mahin an personal quality enna a ni ber.
NDA-ah hian kum 3 chhung an Training thin a, NDA-a an training zawh hian Army-a kal turte chu IMA-ah kum 1 an training leh a, Navy-a kal turte Naval Academy-ah kum 1, Air Force a kal turte chu Air Force Academy-ah kum khat leh a chanve an training leh thin. NDA-ah hian training facilities an uluk a,a tha ber ber an pe bawk a, training chhuak ngat chu an smart thei hle. Training laklawh laia bang te chuan Training an lak tawhna man zawng zawng an rulh leh vek a ngai thin.

Tips for NDA Entrance Exam:
* Mathematics hi a pawimawh hle a, class XI leh XII textbook atangin uluk taka zir tur a ni.
* Biology lamah chuan disease and causes, animal world and plant anatomy lam zir tel a tha.
* Psychological test chi hrang hrang- association test (W.A.T), Thematic appreciation test (T.A.T), Situation Reaction Test (S.R.T), Self Descriptions (S. D) etc, te practice reng tur a ni.
* History, science leh geography ah chuan Class X text book a pawimawh.
* Exam hunchhunga zawhna chhang zo hman turin hun hmandan practice a ngai nasa hle.
* Confidence an ngaipawimawh hle. your hard work.
* NCERT Textbooks zir a tha.
* Physics-ah chuan electro mechanism, magnetism leh thermodynamics lam a pawimawh thin hle.
* Chemistry-ah chemical analysis, inorganic compound, periodic table, equilibrium etc zir ngun a ngai zual.
* English grammar, reading leh writing zir uluk a ngai hle.

%d bloggers like this: