Career Guidance : Sorkar hnuaia hna awm thei hrang hrangte leh a luh theih dan

Eizawnna hi sector lian pui pui pahnihah a then phawk theih a, pakhat zawk chu government sector (sorkar hna) a ni a, pakhat zawk chu private sector (private a eizawnna) a ni. Sorkar hnuaia hna thawh chu a him a, hlawh a thain a kiam ve thei lo a, hamthatna chi hrang hrang an nei tha em em bawk. Chutih rualin private sector lam erawh sorkar hna ang em em a nghet a ni ve thei lo a, amaherawhchu, hna thiam mi leh taima nih chuan hlawhah limit a awm ve meuh lo thung.

India ram bika sorkar hnuaia  hna awm thei hrang hrang, a tlangpui takmeuh lo tarlang ila:

CENTRAL SORKAR HNUAIAH
Union Public Service Commission (UPSC) :
UPSC hnuaiah hian India rama sorkar hna sang ber ber, All India Services (IAS, IFS leh IPS) leh Central service dang (IRS, IA & AS, IDAS, etc) te bakah hna pawimawh tak tak lak an ni thin a. UPSC hnuaiah hian exam chi 20 chuang a awm :
Civil Services Examination (CSE)
Engineering Services Examination (ESE)
Combined Defence Services Examination (CDSE)
National Defence Academy Examination (NDA)
Combined Medical Services Examination (CMSE)
Indian Economic Service and Indian Statistical Service Examination.
Indian Forest Services Exam
Special Class Railway Apprentices Exam (SCRA)
Combined Geo-Scientist and Geologist Examination, etc
Staff Selection Commission (SSC) Exams :
UPSC hnuai chiahah hian Group B leh C hna chi hrang hrang latu SSC a awm leh a. UPSC ang em em a  hna sang ni lo mah se, officer tenau hrang hrang nih theihna tha tak a ni. Tin, UPSC ang lo takin post ruak a tam thin hle. SSC hnuaia exam buatsaih thin chi hrang hrangte chu:
Combined Graduate Level Examination (CGL)
Combined Higher Secondary Level (CHSL) 10+2 Examination
Multitasking (Non-Technical) Staff Examination
Scientific Assistant Exam
Stenographers Grade ‘C’ and ‘D’ Examination
SSC Constables (GD) in CAPFs, NIA & SSF Examination
Sub Inspector In CPOs Exam
Junior Engineer (Civil & Elect) Examination
Junior Translators (CSOLS) /Junior Hindi Translators Examination
Section Officer (Audit | Commercial) Examination
Food Corporation of India (FCI) Examination
Lower Division Grade Limited Departmental Competitive Examination, etc
Armed Forces :
Eizawnna tha em em, hna tam em emna ni bawk chu sipai lam hi a ni a, kumtin vawi engemawzat lak a  ni thin. Sipai chi hrang hrang a awm ang bawkin luh theih dan pawh chi hrang hrang a awm a. Army GD atan Class 10 pass a tawk theih laiin Airmen leh Sailor atan chuan Class XII pass a ngai thung. Class XII pass veleh a officer course a luh theihna NDA exam te, Graduate hnua officer a luhna CDS te, Graduate entry chi hrang hrangte, special entry chi hrang hrang – NCC, Engineering, Law, Nursing Service, etc tamtak a awm bawk. Tin, a lumum a lut tan pawh zir peih chuan officer-ah a luh chhoh theih zel a ni. Sipaia tan hi mi insum thei tan chuan a hlawkin a tha hle a, insum thei lo tan erawh chhiatna hmawr a ni thei thung.
Hna dang :
Central sorkar hnuaiah hian Paramilitary Force hrang hrang- CRPF, ITBP, BSF, etc luhna tur a la tam hle a. Sorkar enkawl corporation chi hrang hrang hnuaiahte, Indian Railway hnuaiahte pawh hnaruak a tam thin hle. Hengte hi Mizo thalaiten kan ngaihven a, kan bawh a hun ta hle bawk a ni. Amaherawhchu, hetiang hna chi hrang hrang hre tur chuan Employment news lam bih tam a ngai a, tawng engemawchen thiam ve a ngai. Exam hun bik nei an nih fur avang leh thenkhat chu hriat lawk theih a nih bik loh avangin internet kaltlanga mahni in update ve reng a ngai a ni. Central hnuaia hna awmte hi Mizoram budget ei hek hauh lo a sum lakluh theihna a nih avangin bawh nachang kan hriat a hun hle.
MIZORAM SORKAR HNUAIAH
Mizoram sorkar hnuaiah hian hna chi hrang hrang thawh tur a awm ve reng bawk a, a zavaia sawi vek sen a nih loh avangin a langsar zual lo tarlang ila:
Mizoram Public Service Commission (MPSC) :
Mizoram sorkar hnuaia sorkar hnathawk hrang hrang latu pui ber chu MPSC hi a ni a. MPSC exam conduct reng reng chu fair thawkhat taka ngaih a ni bawk, hei vang hian thalai lehkhathiamte zingah pawh competition a sang sawt hle a ni. MPSC hian exam chi hrang hrang – MCS (Combined) exam te, Engineering Service te, Zirtirtu hna lakna te, Doctor leh Nurse te leh hna pawimawh dang zawng zawng a buaipui deuh vek a. Mizoram sorkar hnuaia hna ngheta luh tum tan chuan MPSC exam hi hmachhawn a ngai deuh vek tawh a ni. Hetih rual hian competition a san tawh em avangin heng exam a tling thei tur chuan thiam a ngai tawh hle thung.
Teaching Jobs :
Zirtirtu hna hi hna tha leh zahawm tak a ni a, a tlangpuiin hna nghet tur ho chu MPSC-in an la deuh vek a ni. Amaherawhchu, zirtirtu hna thawk tur chuan criteria chi hrang hrang a awm ta a, Graduate/Master degree neih ringawt a tawk tawh lo. Primary School chin a thawk tur tan HSSLC chin a tawk theih laiin a chung lamah chuan Graduate/Post graduate nih a ngai a. Hei mai bakah hian zirtirtu ni tura thiamna bik chi hrang hrang – B.Ed, STET, NET, etc neih a ngaih deuh vek tawh a. Training paltlang hmasa lo tan zirtirtu hna (private school-ah pawh) thawh theih a ni tawh lo.
Image result for Teaching Career
Police :
Mizoram sorkar, Home Department hnuaia thawk tur Police hi a khat tawka lak reng a ni a, amaherawhchu, UPSC te leh SSC-te anga regular taka hunbi nei a lak erawh a ni ngai lo. Post ruak awm dan a zir a lak a ni tlangpui. Police constable tan class 8 pass a tawk laiin, officer hna atan chuan Graduate chin a ngai deuh zel a ni. Tin, Mizoram police hnuaiah hian sports lam thei zualte tan sports quota a luh theih a ni bawk. Police a lut tur chuan physical test, medical test, written test leh interview paltlang a ngai tlangpui.
Professional Jobs :
Sorkar hnuaiah hian Graduate satliah ni lo, thiamna bik nei chi hrang hrang- Engineering, Medical, Technician, Computer, etc lam thiamna neite tan post ruak a awm deuh reng a, hetiang lam a thiamna nei bik tan lo chuan heng hnate hi dil theih a ni lo. Chuvangin, sorkar hna thawk tur pawhin thiamna bik nei thei course (professional course chi hrang hrang) zir a tha hle.
Heng bakah hian sorkar department hrang hrangin hnaruak an neihte a zirin MPSC kaltlang kher lo a departmental a lak an nei fo bawk a. Amaherawhchu, sorkar hna nghet emaw, contract hun rei zawk thawk tur pawh ni se advertisement leh employment exchange kaltlanga lak ngei ngei a ngaih avangin ngaihven peih chuan a hriat ve zung zung theih a ni.
Sorkar hna a lut thei tura pawimawhte:

Written Test : Sorkar hna lakna tamzawkah chuan written test hi a awm tlangpui a. Hna sang chinah (eg. MCS combined, etc) phei chuan written test hi chhawng hnih – Preliminary leh Main exam buatsaih a ni thin. Chuvangin, hetianga eizawnna tha nei tur chuan mahni zirlai/subject thiam nal mai bakah Current Affairs hriat tamte, Mathematics (class X level) thiam chian te, English (grammar) thiamte a ngai hle.
Interview : Sorkar hna lakna zawng zawng deuhthawah hian interview paltlang a ngai deuh vek a. Interview atan hian mahni subject hriat chian bakah current affairs (tunlai thil thleng) hriat a ngai hle a, language (a bikin English) lama chak a ngai hle bawk. Tawng lama harsatna neite tan chuan written test-ah ti tha viau mah se interview-ah tlin a har hle.
Image result for Interview
Physical & Practical Test : Hna lakna thenkhat eg. police, etc-ah hian physical test neih thin a ni a, hei erawh Mizo nula tlangval fit pangngai tan harsa a awm meuh lo. Hna bik thenkhatah practical test (typing, etc) neih  a ni thin bawk.
Computer thiam a ngai : Mizoram sorkar hnuaia hna thawk tur chuan Computer thiam hi tihmakmawh a ni ta.  Computer hi thiam satliah ni lo, sorkar pawmpui zirna in atanga certificate neih ngei ngei a ngai a. Chutiang tur chuan Mizoram a sorkar pawmpui Computer institute-ah zirchhuah ve thlap a ngai. A nih loh pawhin NIELIT, Zuangtuiah thla tin Computer CCC Course exam buatsaih a ni thin a, class kal ngai kher lo a exam theih a ni.
Employment Exchange : Mizoram a District hrang hrangah Labour, Employment, Skill Development & Entrepreneurship Department enkawl Employment Exchange a awm a. Hengahte hian hna zawnglai nih chuan in register ngei ngei tur a ni. Hna lakna tamtak chu employment exchange kaltlanga lak a nih thin avangin in register hi a pawimawh em em a ni.
– C.Lalhriatpuia

Editor, Hillsgate

Be the first to comment on "Career Guidance : Sorkar hnuaia hna awm thei hrang hrangte leh a luh theih dan"

Leave a comment

Your email address will not be published.


*