BRICS

Khawvela ram thang chak ber ber BRIC countries an tih mai- Brazil, Russia, India leh China (BRIC) dinhmun hi zirlaite tan chuan ngaihven thama ni.
He tawngkam BRIC tih hi tunhmain hriat a ni ngai lova. Jim O’Neill, Goldman Sachs Investment bank-a economist lar takin a thesis a a ziah atangin hetiang tawngkam hi an lo hmang chho ta a ni.
Kum 2009 June 16-ah Yekaterinburg, Russia-ah summit hmasa ber an nei a. Ram thangchak em em, lian bawk si an nih avangin khawvelin a ngaihven nghal hle. Kum 2010-ah an zing a South Africa a lo tel ve atangin BRICS tih a lo ni chho ta a ni.
Kum 2015-ah khan heng BRICS ramte hian mipui 3.6 billion zet an nei a, chu chu khawvel pumpui atangin 41% zet a ni. Economy lamah pawh heng ram pangate hi an neu lo hle. Kum 2015-a heng ram 5-te nominal GDP (kum khata sum dehchhuah) chu US$ 16.6 trillion a ni a, chu chu khawvel pum GDP atangin 22% a ni. GDP (PPP) phei chu US $37 trillion a ni a, foreign reserves hlawmkhawm pawh US $ 4trillion zet a tling a ni. Kum 2050-ah phei chuan khawvel economy control tur an la ni thei ngei dawn a ni.
China hi tun ang renga a thang a nih chuan an ram economy hian kum 2038-ah USA a khum tawh dawn a. Kum reilote chhungin Super Power a ni thei mai dawn niin an chhut a ni. Ralthuam lamah te, Science thiamna lamah te leh mihring nunphung hrim hrimah an sang em em a. USA in nasa takin dodal thin mah se, an hmasawnna hi dal theih a ni lova, power a ngah tial tial mai a ni.
Hetiang zela a thang a nih chuan India pawh hian kum 2043-ah US a khum thei ang a, tuna khawvel ram changkang ber ber kan tih- Britain, Japan Germany, France, etc-te hi chuan an phalo hle tawh dawn a ni. Tin, India ram mipui 50% vel zet hi thalai, kum 25 hnuai lam an nih avangin hmasawnna hi a la nasa hle tura ngaih a ni.
Brazil hi khawvel ram zau lamah pangana niin, mipui tam lamah pawh pangana a ni bawk a. Khawvela economy thang chak berte zinga mi a ni bawk. Anni pawh hi tun anga an thang zel a nih chuan India dawttu ni turah ngaih a ni.
Cold War tawp, kum 1991 a Soviet Union a kehdarh hnu khan hun engemaw chen chu Russia ram dinhmun hi a phet rih a. Tunlai hian an ram economy-in hma a sawn nasa in khawvel ram thang chak berte zingah a tel leh thei ta a ni.
March 2013-a Durban, South Africa a BRICS summit an neih tumin khawthlang ramte control financial institutions International Monetary Fund (IMF) leh World Bank-te el turin financial Institution siam ve ni se an ti a. September thla a an inhmuhkhawm leh tumin an sum thawh tur zat pawh an han puang ta diah diah a. China chuan $41 billion a thawh tur thu a sawi a, Brazil, India leh Russia-ten $18 billion theuh thawh an inhuam bakah South Africa pawhin $ 5 billion thawh a inhuam thu a sawi ve ta bawk. Tichuan, financial institution thar, New Development Bank (BRICS Development Bank an tih bawk) chu an lo din chho ta a ni. He bank thar din tur hian July 2014-ah agreement sign fel a ni a, July 2015 atangin a takin a kal chho ta bawk. He bank hian Shanghai, China-ah hmunpui a nei a ni.
Heng ram thanglai mek, ram lian pui pui ho inhlawm khawm hi a chhan tamtak a awm thei ang a. A chhan tamtak zingah super power US leh a sangawizawnpui khawthlang ramten khawvel economy an control tlatna do let chu a chhan lian ber pakhat a ni. Hetih rual hian, heng ram lian5-te hi inel ve ran an nih tho avangte, China leh India inkar fel hleithei lo vangte hian eng nge an an chhoh zel ang tih erawh hriatthiam a la har rih viau thung.