BENJAMIN LALFAKMAWIA : Kum 2010 HSLC Topper a che pui zel

Hillsgate, Aizawl May 16, 2018: Kum 2010 HSLC Exam-a Mizoram pum a pakhatna dinhmun hauhtu Benjamin Lalfakmawia s/o Biakdika Colney, Chhingchhip chuan chanchin ngaihnawm a nei chho zel.

Benjamin Lalfakmawia hian kum 2018 tir lam khan King George’s Medical University, Lucknow-ah MBBS a zir zo a. Tunhnaia Post Graduate zirna tura entrance exam hrang hrangah result tha tak a nei chhunzawm zel bawk.

Dr. Benjamin Lalfakmawia hi India ram pum huapa MBBS zirchhuak tawhten Post Graduate an zawm lehna tura entrance exam buatsaih NEET-PG-ah Scheduled Tribe ranking-ah pahnihna a ni a. India rama Medical College tha bera chhal thin AIIMS-PG Entrance-ah Scheduled tribe rank pathumna a ni bawk. Tin, India rama Medical College tha ber zinga chhal ve tho Postgraduate Institute of Medical Education & Research (PGIMER)Chandigarh-a MD, MS Entrance Exam 2018-ah ST – 1 a ni bawk.

MBBS a zirna King George’s Medical University, Lucknow atangin March thla khan a chhuak fel a, VMMC & Safdharjang Hospital, New Delhi-ah Radiodiagnosis-in a lut a. Amaherawhchu, hetia PG zir thei tura ranking tha tak nei a tlin leh tak avang hian PG a zawm leh rih dawn niin a sawi a. Post Graduate zir zawmna tur hian Counselling neih hma chu tih chian theih la ni lo mah se, AIIMS emaw, PGI, Chandigarh emaw zawm a tum thu a sawi a ni.

Dr. Benjamin Lalfakmawia hi kum 1994 April 15 a piang a ni a. Class I-IV chu Chhingchhip Primary School – II atangin a zirchhuak a, class V-XII erawh St.Peters HSS, Chhingchhip atangin a zirchhuak thung. Lehkha thiam thei pangngai tak niin Class V-X thlengin pakhatna a ni tluan parh a ni.

HSLC Exam 2010-ah khan Mizoram pumah pakhatna niin, Science a la chhunzawm a, HSSLC 2012-ah St. Peters HSS, Chhingchhip atangin Mizoram pumah parukna a ni leh bawk.

Kum 2012 hian Mizoram sorkar buatsaih State Technical Entrance Examination (STEE) a hmachhawn nghal a, Medical-ah 3-na niin, Engineering-ah 4-na a ni bawk. Engineering lam thlang lovin, a chung lama kan sawi tawh angin King George’s Medical University, Lucknow-ah MBBS a zir zawm leh ta a ni.

MBBS a zir chhung hian 2nd year-ah pahnihna a ni a, Pathology-ah phei chuan Gold medal a la nghe nghe. 3rd year-ah 9-na niin, Final-ah 5-na a ni bawk.