AWARD chi hrang hrangte

Khawvelah hian mi hlawhtlingte chawimawina (Award) chi hrang hrang a awm a. Chung zinga chawimawina ngaihsan hlawh zual lo tarlang ila:

Academy Awards (Oscars)

He chawimawina hi Film lama chawimawina sang ber leh ngaihhlut ber a ni. Kumtina semchhuah thin niin khawvel pumah mipui vaibelchhe telin TV kaltlangin an en thin. He chawimawin hi  kum 1929 atanga pek tan niin khawvel ngaihsan a ni.

Booker Prize

Novel ziaktute chawimawina sang, British sawrkarin Commonwealth ram mite hnena a pek thin hi ziakmite chawimawina sang ber leh ngaihhlut hlawh ber a ni. Kum 1968 atang khan kumtinin thla 12 chhung lehkhabu chhuak tha ber hnenah he chawimawina hi pek a ni thin. Tun hnu hian Man Booker Prize tia hriat lar a ni ta.

Polish author Olga Tokarczuk wins the Man Booker International prize 2018

BRIT Awards

Hei hi Popular Music chawimawina sang tak niin, kum 1977 atanga pek tan a ni a. Zaithiam lar Robbie Williams chu he chawimawina dawng hnem ber tawh niin BRIT Awards 15 a dawng tawh a. Heng zinga 4 chu Take That member anih atanga a dawn a ni.

Cannes Film Festival

Film lama chawimawina sang tak, Cannes Film Festival hi kumtin France chhim lama khawpui pakhat Cannes-ah neih thin a ni a. He festival-a chawimawina hlu ber chu Palme d’Or (Golden Palm)niin kum 1955 atanga pek tan a ni.

 Golden Globe Awards

He US Film chawimawina hi kum 1943 atanga pek tan niin Julia Roberts hian nominate vawi 5 hmu tawhin Award vawi 4 a dawng tawh a. Tom Hanks hian Nomination 6 ah Award vawi 4 a lo dawng tawh bawk.

Grammy Awards

He US Music Award hi kum 1959 atanga pek tan niin khawvel ngaihhlut a hlawh hle a. He Award dawng tam tawh zingah chuan conductor Sir George Solti, vawi 38 lo dawng tawhte leh Stevie Wonder, vawi 22 lo dawng tawhte leh Beyonce Knowles, award panga lo dawng tawhte an tel.

 MTV Video Music Award

Rimawi lam Channel pakhat MTV buatsaih rimawi lam chawimawina sang hi kum 1984 atang khan pek tan a ni a. Madonna hi he chawimawina ah chuan mi langsar ber niin nomination vawi 69 hmu tawhin Awards vawi 19 a lo dawng tawh  a ni.

 Nobel Prize

Alfred Nobel, Dynamite hmuchhuaktu hmingchawia phuah khawvela chawimawina ngaihhlut ber hi kum 1901 khan bul tan alo ni tawh a. Category ruk – Physics, Chemistry, Medicine, Literatur, Peace leh Economics-ah then niin kumtin he Award hi pek thin a ni. He chawimawina dawngtute hian khawvel khawi hmunah pawh ngaihsan leh ngaihpawimawh an hlawh a ni.

 Pulitzer Prizes

Journalism, writing (fiction, non-fiction and Poetry) leh Music lama thawk thate chawimawina hi kum 1917-a bul tan niin, Publisher lar tak pakhat Joseph Pulitzer-a hmingchawia phuah a ni. He chawimawina pawh hian ngaihhlut a hlawh hle.

Heng bakah hian chawimawina Award dang tamtak a awm na a, heng ho hi khawvel pum huap pawha ngaihsan leh ngaihhlut hlawhte an ni.