ARTS / HUMANITIES HNUAIA CAREER AWM THEI HRANG HRANGTE

Arts stream atanga career awm thei hrang hrangte hi sawi sen a ni lo a, a pawimawh zual leh tunlaia hna tam deuhna tlemazawng lo tarlang ila :

Teaching : Zirtirtu ni tur hian Elementary lamah class XII pass a tawk theih laiin a chung lamah chuan Graduate/Post Graduate bakah NET (National Eligibility Test) neihte a ngai. Tin, Mizoram chhunga school zirtirtu hna thawk tur hian Graduate/Post Graduate nih mai bakah B.Ed/DLEd neih tel a ngai a, Teacher Eligibility Test (TET) paltlang a ngai zel tawh bawk.

Competitive Exam (Government) : Arts line atang hian Civil Service Competitive exam (sorkar hna sang deuh chin lakna hrang hrang- UPSC, SSC, MPSC, etc hnuaia mi) a remchang hle a, Science background nei (Engineering & Medical, etc) tamtak pawhin civil service exam-ah chuan arts subject an la tha leh fo a ni. UPSC hnuaia exam theih ho hi a har zual deuh a, mi nazawng tan tlin theih a nih loh avangin a hnuai chiah SSC-a kum tina hna sing tel an lak thinte hi zirlaiten kan bawh a hun ta hle. State sorkar hnuaiah pawh sorkar hna chi hrang hrang lak reng a ni a, hengte hi arts line atanga dil theih tamtak a awm bawk. Tin, sipai lamah pawh officer nih theihna chance tamtak, arts atang hian a awm ve tho a ni.

Competitive exam chi hrang hrangte:

  1. Civil Services Examination
  2. Indian Economic Service Examination
  3. Indian Statistical Service Examination
  4. Combined Defence Services Examination
  5. NDA and Naval Academy Examination
  6. Combined Medical Services Examination
  7. Engineering Services Examinations
  8. Staff Selections for different Cadres
  9. Exam for recruitment of Dy. Superintendent of Police/ Company Commander/Asst.Commandant / in CRPF/BSF/Indo-Tibetan Border Police
  10. Exam for different posts through Reserve Bank of India Services Board
  11. Probationary Officers and others through Banking Service Recruitment Board
  12. State Public Services Commission, etc

 Banking : Bank lam hna chi hrang hrang (Probationary Officers, Clerks, etc) hi Arts line atanga exam theih a ni ve tho a. A khat tawkin exam tur a awm reng a, inbuatsaih thlawn a awm hman meuh lo. Hlawh a tha em em a, hamthatna tamtak an nei bawk. IBPS website hi Banking lam kal tan chuan luh fo a tha.. http://www.ibps.in

 Law : Class XII pass hnuah LLB kum 5 chhung (5 yrs course) a zir theih a, BA/B.Com zawh hnuah LLB kum thum (3 yrs course) a zir theih bawk. Law hi master degree leh a chunglam thlengin a zir theih a ni. Law lam thiamte tan chuan Lawyer (Ukil) mai bakah Judge/Judicial service lamte, sumdawng company liana thawh thlengin hna a tam thei hle. India rama Law college tha a zir thei tur chuan kumtina buatsaih thin Common Law Admission Test (CLAT) hmachhawn a ngai a, HSS zirlaiin (result chhuah hmain) form fill up theih a ni. Hrechiang duh tan : http://www.clat.ac.in/

 Management : Management course hi Graduation – BBA, BMS & BHM leh diploma course te, certificate course te, thla 3 atanga kum 4 thleng a zir theih a awm a. Tin, management hnuaiah hian Hotel management-te, hospitality management course tamtak zir tur a awm reng a. Hengte hi tunlai khawvelah chuan private hnuaia hna hmuh awlsam em em na, hlawk bawk si a ni. Sorkar lama luhna chance erawh a tam lutuk lo.

Journalism & Mass Communication : Chanchinthar thehdarh leh a kaihhnawih lama tui tan Journalism & Mass Communication hi a zir theih a. Diploma, Graduation atanga Master degree thlenga zir theih a ni. Institution tha tak tak a lut tur chuan all India level entrance beih ve a ngai.

Linguistics : Tawng (language) lam thiam chi tan hian hna a tam hle bawk. English leh Hindi nal taka thiam tan phei chuan hna a tam em em reng a ni. Hetiang a tawng lam ringawt zirna hi University tamtakin course an nei a ni.

Designing : Designing tih ringawt hnuaiah hian course hrang hrang -Fashion designing, interior designing, Graphic designing, etc a awm thluah a. Certificate leh diploma course zir theih tamtak a awm a ni.

Psychology : Mihring rilru leh nihphung zirna Psychology lama tui tan chance a tha em em a. Mahse, HSS leh College level leh a chunglam thlengin Psychology subject lak a ngai ve thung. Psychology thiam tak tan chuan Psychologist hna chi hrang hrang tamtak a awm a ni.

Visual art/decorative art: Hemi huang chhungah hian course tamtak zir tur a awm a, hetiang lama kal mi tan chuan eizawnna tling tak vek a ni. Chhungte chu: Painting, Drawing, Sculpture, Photography, Conceptual arts, Architecture, Weaving, Fabrics

 Performing arts : Performing arts an tih ho hi entertainment lam nena inkaihhnawihte a ni hlawm a, Mizo thalai tamtakin eizawn nan a an hman lai mek a ni hlawm. Chungte chu : Music, Theatre, Dance, Singing, Acting, Comedy, Direction, Choreography, Editing, Martial art, etc