Article : TUM NEIH HI HLAWHTLINNA

Puitlin leh hlawhtlin tak tak hi a har hlein ka hre ṭhin a. Hlawhtling tura midang fuih ngam pawh thil awlsam niin ka hre lo. Zirnaa rualawh avanga khawvel ram ropui ber tih ngamah meuh zirna boruak ṭha chhima ka awm ve hnu pawh hian kan tleirawl lai khan nun kaihruaitu ṭha lo nei ila, hei ai chuan thlen san a awl awm mang e, ka ti rauh rauh fo; ka tlai deuh tawha hriat châng ka neih vang a ni. Officer ni tur ringawt emawa infuih hi a tawk lovin ka hria a; nun hlawhtling neih erawh kan tum ṭheuh turah ka ngai a. Chumi atan chuan tum neih hi a pawimawh viauin ka hria a; he article hi ka chûl hnûm thar leh a ni. A bikin nun insiam mek tleirawlho hi rilruin a tinzawn ber.

Primary School-a kan kal lai vêl khân enlenna (magnifying glass) hmang hian ni sa hnuaiah paper kan em alh thin. Mahse chutah chuan tih dan bik a awm a. Ho tê angin lang mah se a formula chu kan zawm ngei a ngai. Chu formula chu, focus bik neia paper chu em tur a ni. Chutianga tih chuan reilotêah a sat lutuk avangin a alh phat thin. Focus bik nei mang lova em kuala enlenna kan ken chêt dur dur chuan a alh thei ngai lo.

Anonymous chuan, “Hringnun lamlian i zawh laiin, i thil tumah tak chuan i mit fûktir la, tlâk-hawlhna tur âwng lai ni lovin, a bial chhûngah ngei chuan fuh chat tum ang che,” a lo ti.

I thiante hnenah an thil tum han zâwt mah teh, chhànna tlânglâwn tak ni tur chu, “Mi hlawhtling tak nih, hlim taka awm, nuam taka khawsak,” tih a ni mai thei. Chutiang thil chu châkawm tak ni mah se tum chiang tak nei lote chhànna a ni tlângpui. Tum chu a SMART tur a ni, tiin an sawi thin. Chumi awmzia chu heti hian sawi fiah tum ang aw:

1. S – Specific – A chiang tur a ni. ‘Ka rihna tihhniam ka duh,’ tih hi tumna naran a ni a. ‘Ni 90 chhûngin gram 10 tala ka rihna tihhniam ka duh,’ tih chu a chiang zâwk a ni. Kan thil tum chu a chian a pawimawh hle.

2. M – Must be measurable – Teh theih a ni tur a ni. I teh theih loh chuan tihhlawhtlin a har ang. I hmasawn dân bi hre turin i thil tum chu teh theih ni se a tha e.

3. A – Achieveable – tihhlawhtlin theih. I thil tum chu tihhlawhtlin theih thil a nih a pawimawh. Phingphihlîp arsi lâk tum ang chauh i nih a hlauhawm. America President nih tumte hi sângin ropui hle mah se Mizo tân chuan tihhlawhtlin ngaihna awm lo, engtikah mah a hlawhtlin dâwn loh avangin beidawnna thlentu a ni thei bawk.

4. R – Realistic – a taka chantir nghal – I thil tum chu i rihna ni 30 chhûnga gram 20-a tihhniam a nih a, exercise la a puar lutuka chaw ei pawh i insûm a nih chuan a takah i chantir mek tihna a ni.

5. T – Time bound – hun tiam chin neih. I thil tum tihlawhtling turin i tih tan hun tur leh i zawh hun tur tiam chin nei rawh.

I thil tum chu hetiang hian ruahman chhin teh:
1. Short-term – kum khat chhûnga tihhlawhtlin theih.
2. Mid-term – kum thum chhûnga tihhlawhtlin theih.
3. Long-term – kum nga chhunga tihhlawhtlin theih.

Kan thil tum chu tihlawhtling turin kum nga chuang lai pawh a ngai mai thei. Mahse tum bik neia nun hman hi a hluin a pawimawh êm êm a. Thil tam tak tum teuh ai chuan eng emaw bik tum hian tihhlawhtlin pawh a awlsam thin. (I hneh thei 2013:282)

A taka tih awm si lova tumna ringawt chu suangtuahna ruak mai a ni a. Thil tih hian suangtuahna chu a takah a chantir thin. Miin a tum chu thelh zauh thin mah se, hlawhchhamna a ni chuang lo. Tlêma han khawtlai hret pawh hi hlawhchhamna a ni lo va, kan thil tum en nawn a, chumi hmun thleng tura hmathar lâk leh kan mamawh a ni zâwk. Camera pawh hian tha taka thlâ a lâk theihna turin tum bik a neih a pawimawh a ni tir’u?

Khawiah nge i pian a pawimawh lo va, khawi lam nge i pan zêl tih hi a pawimawh zâwk chu a ni. Tum nei lova huaisenna leh thawhrim ve viauna hi chu alo thlàwn mai a ni fo. Hlauhthawnna hian tum tihhlawhtlinna kawngah nghawng tha lo a nei thin a. Thleng tura i duh loh ang i suangtuah vak vak kha i tân a tha lo a ni.

Tum fel tak neiin i hmalam hun han hmachhawn teh khai. Gen. George S. Patton Junior chuan, “Nakina tumna famkim neih chauh ai chuan famkim vak lo chung pawha tûna tum neih nghal a tha zâwk,” a lo ti. (I hneh thei 2013:283)

Tum tha tak nei la. I thil tum azir khân i nungchang thunun ang che. Eng chen nge i tum tihlawhtling tura inbuatsaih i mamawh tih pawh nangmah inchhût fo la. Eng chen nge i thlen tawh a? Eng chen nge i la hmabak tih pawh ngaihtuah fo rawh. Tumruhna hi mi tam takin kan tlachham a, nawmchen kan uar a, tûn atana kan hlim chuan kan duhtâwk a, nakin hun kan thlir pha lo fo thin.

Tumruhna(determination) neih hi a pawimawh a. Mahni inthunun chungin tum tihhlawhtlinna atan theihtawp chhuaha ke pen fo a tûl hle. Tûna hrehawm tawrh pawisa lova theihtawpa beih hi hlawhtlinna a ni fo.
Mizo zînga mi ropui leh hlawhtling ber bera kan neihte pawh hian an lo bei nasa asin!

Kum 1930 leh 1940 inkâr vêla Shillong-a High School zu kai Mizo zirlai hmasa berte chu: Kâphrânga; Thenphunga; Lalbiakthanga; Khawtinkhûma; Sangliana te an ni a.

Chûng hun lai chuan Guwahati University a la awm lo va. Calcutta University hnuai vek a la ni. Shillong-a Tribal Hostel pawh a la awm lo va. Earl Hostel-ah an pangain an awm. An zînga upa ber chu Kâphrânga a ni a. Ani hian In chhûnga nu leh paten an fate an control ang maiin a thiante chu a control a. Zawm ngei ngei tur Dân 10 (Ten Commanments) a siam a. Chu chu tûn thlengin ‘KÂPHRÂNGA DÂN SAWM PÊK’ an la ti a. Chûngte chu hêngte hi a ni:

1. Cinema en loh tur, lèn vah mai mai loh tur.
2. Pocket money heh viau loh tur.
3. Chhûngte pawisa chah vak vak loh tur, mamawh tâwk chauh chah tur.
4. Vaiho chu lehkha zirnaah khûm vek tur, Sport-naah leh insualnaah pawh khûm vek tur, ngam ngei ngei tur.
5. Zîng ni chhuah hmain thawh vek tur, vûr tlâk lai pawh ni se, kekawrtê chauh hàa ke lâwnga khèlmual vawi thum hêl chhuah hnuah tuisika inbual tur, chumi hnuah lehkha zir tur.
6. Pakhatna emaw, pahnihna emaw nih tum vek tur, a ni lo berah First Div.-ah pass vek tur.
7. Hostel-ah tumah bengchhen loh tur.
8. Zu, meizial, sahdah leh pânkhawr lam rêng rêng eia in loh tur.
9. Pathian Nî-ah inkhawm vek tur.
10. Dam loh loh tur.

Dàn 10-na ber ‘Dam loh loh tur’ tih hi amah Kâphrânga’n a bawhchhe hmasa ber a, chawlhkâr khat zet a dam lo va, thiante buaipui ngaia awmin lehkha an zir that loh phah deuh niin an sawi. Hêng mi pangate hi mi ropui tak an rawn ni theuh a:

1. Major Kâphrânga, IFAS
2. Brigadier Thenphunga Sailo, Chief Minister
3. Lalbiakthanga, IAS, Chief Secretary
4. Khawtinkhûma, IAS, Chief Secretary
5. Sângliana, Education Director (Kristian Chhûngkua 2009:80)

Lehkha i zir lai kha i khawvel tur dinna hun tha ber a ni a. Chhel tak leh tumruh takin engkim han ti teh. Mi vannei kan tih te pawh hi an vanneihna tur kawng an insialsak thin a lo ni a. Chumi hnuah chuan mi hlawhtling, mi vannei, mi awhawm ti-a hriat zui an lo ni mai thin.

 

Tum fel tak i neih a, chumi tihlawhtling tura ngawrh taka i beih phawt chuan hlawhtlinna chu i kuta a awm a ni e! Mi taima te chanvo tura Pathian ruat hi tu mahin an chhuhsak thei ngai lo a nia! Kum sawm liam leh hnuah eng mi nge i nih ang a? Eng dinhmunah nge i din ve ang le? Chu chu tûna i awm dânin a hril ang a. I hmalam hun chu nangma kuta awm a ni e.
“Find out who you are; and do it on purpose”
-Dolly Parton

VLC Vanlalhriatrenga

-VLC Vanlalhriatrenga, Camp: Chicago, Illinois, United States

(He article ziaktu VLC Vanlalhriatrenga hi tunlai Mizo thalaite zingah chuan mi entawntlak berte zinga mi, thuziak lama tui, thil zir mi leh chik mi a ni a. Tunah hian Illinois, United States-ah Counselling lam zir bingin a awm mek a ni)