Article: Career Planning

Mizo zirlaite zingah mahni eizawnna tur kawng (career) thlang fel hlei thei lo engemawzat an awm a. Thlang fel tawhte zingah pawh thlan fuh tawk loh avanga rilru buai engemawzat la awm theih a ni. Chuvangin Career thlan dawna hriat tel ngai thil pawimawh thenkhat lo zir ho ila.

1. Mahni chakna leh chak lohna hriatchian a pawimawh :
Kan chak lohna lai leh kan chakna laite inhriat chian vek a tha. Tawng (language) lama chak lo chi te, memory tha lo chi te, midang nena inbiakpawhna (communication) lama skill nei tha bik riaute, kan hriselna dinhmunte hriatchian a pawimawh a. Hei hian kan career thlanna tur kawngah nasa takin min pui thei a ni.

2. Mahni mizia inhriatchian :
Kan tuizawng leh tui loh zawng hi keimahni bakah kan chhungte leh kan thian hnaivai takte hian kan hre ber a. Chuvangin, career kan thlan fel dawnin kan mize milpui kan thlan thiam theih nan mahni mai bakah chhungte leh hetiang lam hre deuhte rawn an tha hle. Kan hna ngaihsan zawng apiang hi kan mize milpui hna, kan thawh chi a ni vek lo tih hriat reng a tha. Eg. Midangte tanpui duhna rilru pu tan lo chuan Medical line lam hi career hrehawm tak a ni thei a, inphahniam ngaithei lo tan Hospitality Management lam a tihchi loh thei viau bawk. Chutiang zelin…

3. Hna kalhmang hriat :
Kan thawh chak leh kan milpui ni a kan hriatte chu an hnathawh dan kalhmang chiang taka hriat tum tur a ni. Eg. Nurse lo thlang dawn ta ila, engzat nge an hlawh? Khawi khawiahte nge thawh tur? Thingtlangah nge khawpuiah? Sorkar a luhna chance a tha em? Hospital lian leh changkang zawka luhna chance a awm em? Foreign thlengin eng nge chance awm thei? Heng zawng zawng hi DUHTHLANNA kan siam fel hmain hriat vek tur a ni. Engineering kan thlang dawn a nih pawhin kan Engineering thlan tur – Civil, Mechanical, Electrical, etc kha eng nge a nih chiah? Khawi khawiahte nge an thawh thin tihte hriat hmasak vek tum tur a ni. Chuta tang chuan kan thawh chi a nih leh nih loh awlsam takin a hriat theih a ni.

4. Sum leh Pai :
Tunlai khawvelah chuan zirna man hi a to ta em em a. Mahni mai ni lo, chhungkua a ngaihtuah ho a ngai ta takzet mai. Kan career duh thlan zawh tura senso ngai zat tlangpui hi awlsam takin internet atanga hmuh theih a ni a. Sum leh pai lama kan chhungkaw dinhmun leh kan dap chawp theih dan turte, harsatna lo awm ta se loan lak theih a ni ang em tihte thlenga chhungkua a ngaihtuah ho tur a ni. Institution hrang hrangah senso a inang lo thei hle a. A tlangpuiin sorkar institution-ah zir man a tlawm a, private-ah a to zel. Technical course lamah pawh sorkarin seat a neihna, entrance kaltlanga luh ngai ho hi an tlawm tlangpui a, institution inang rengah (private institution-ah pawh) state quota a zir leh private a zirte zir man a inthlau thei hle.

5. Nih tum pakhat chauh neih bur loh tur :
Nih tum pakhat chauh neih bur hi thil tha tak a nih tho rualin, mihring kan nih anga harsatna tawk thei kan nih avangin a him lo ve thei. Natna engemaw kan tawk thei a, accident kan tawk thei a, sum leh paia tlakchhiatna leh harsatna dang kan tawk thut thei. Tin, engemaw avangin kan nih tum ber kan ni pha lo thut thei a, kha career kha a tha lo chho thei viau bawk. Chuvangin, nih tum hi pathum/pali vel tal neih a tha a, chutiang tur chuan chang pawh tih zauh ve deuh a tha.

6. Chhiar tam a ngai :
Hetiang zawng zawng hre tur chuan chhiar tam a ngai a, zawh tam a ngai bawk. Tunlaiah internet a chak tawh a, awlsam takin career chungchang pawh zawnchhuah zung zung theih a ni tawh a. Chuvangin, mahni a indap nachang hriat a pawimawh hle. Tin, kan hriat theih mai loh thilte chu a hre deuh tur ni a kan ngaihte zawh hreh reng reng loh tur a ni.

7. Institution tha :
Kan phak tawka Institution tha berah zir tum hram hram tur a ni. Chutiang tur chuan mahni zirlai thiam a, entrance hmachhawn peih a, a hunbi thlenga ngaihven peih a ngai a ni. Institution tha apiangah luh a har a, inbuatsaih pawh a ngai nasa. Tin, professional course bikahte phei chuan Institution tha apiangin placement an nei tha a, hna hmuh thlengin a awlsam bik thin a ni.

 

– C.Lalhriatpuia, Editor, Hillsgate