ALEXANDER GRAHAM BELL

“Mr. Watson–come here–I want to see you” tih a hriat chu ringhlel leh makti lutukin Thomas A. Watson chuan a ngaithla a. Lawm lutukin room leh lamah chuan a tlan phei a, an thil hmuhchhuah thar, mi maktaduai tam tak nundan sawi danglamtu tur chu a pu Alexander Graham Bell nen chuan an lawm ta a ni. Chu chu kum 170 zet liam ta, March 10, 1876-a thil thleng kha a ni a. Chumi kum chuan Alexander Graham Bell chu kum 29 chauh a la ni nghe nghe.

Family background

Alexander Graham Bell hi March 3, 1847 khan 16 South Charlotte Street, Edinburg, Scotland, UK-ah a lo piang a. He a pianna in hi tun thlengin chhinchhiah a uluk taka enkawl a la ni nghe nghe.  A nu leh pa te hi Prof. Alexander Melville Bell leh Eliza Grace Symonds Bell an ni. An unau hi mipa hlir pathum niin a upa ber dawttu a ni a. A pa leh a Pu te ho hi thusawi thiam hmingthang, thusawi thiam zirna bu te siama eizawng an ni nghe nghe.

A piantirh a a hming an phuahah chuan Alexander Bell tih ringawt a ni a. Mahse, kum 10 mi a nih laiin a unau dangte anga hming lai neih ve a duh ta tlat mai a, a pa hnenah a dil a, a pa chuan lo phalsak in a hmingah Graham an belh leh ta a ni. A chhungte leh a thiantha zualte erawh chuan a upat hnu thleng pawh khan “Aleck” tiin an la ko thin a ni awm e.

Zirna lamah a chhuanawm viau lo

A unau dangte ang bawkin school kal lovin a pa hnen atangin zirtirna a dawng a. Chumi hnu lamah chuan Royal High School, Edinburg, Scotland-ah a zir zawm ve a. Kum 15 mi a nihin zirchhuak mumal lovin a bansan ta a ni. Science subject, a bikin Biology a tui hle a, subject dang erawh chu a ngaih thah hle thung. Chutianga school a chawlh tak hnu chuan London-ah a pu bula awm turin a kal ta daih a. Hetia a pu bula a awm hi a tan chuan zirna bul intanna tak tak a lo ni ta zawk a. A pu zirtirna azarah kum 16 mi a nihin Weston House Academy, Elgin, Scotland-atangin Elocution leh Music-ah zirtirtu leh zirlai a ni kawp thei nghe nghe. Chumi hnuah chuan a u Melville a hnung zuiin University of Edinburg-ah a zir chhunzawm ve a, mahse, University of Edinburg-ah pawh hian mumal takin a kal chuang lo niawm tak a ni.

Naupang dangdai tak a ni

A tette atangin naupang dangdai tak a ni ve hrim hrim a. A tet laia a thianpa pakhat chu Ben Herdman, an thenawma buh herna (flour mill) neitu fapa a ni a. Alexander-a chuan chik taka zawtin, engtin nge flour mill-ah chuan an tih thin tih a han zawt chiang a. Buh chu a kawr thenfai a ngaih thu leh chu hna chu hna hautak tak a nih thu an hrilh a. Hun engemaw chen a rial hnu chuan, thil vir thei hmanga siam, perek kilh bur furna hmanga awlsam taka buh her theihna tur a siamchhuak ta mai a. Chu thil chu kum engemawzat an hmang nghe nghe. Hetih lai hi kum 12 mi chauh a la ni!!! Kum 16 mi a nih lai pawhin luruh lem, a chhung lam atanga windpipe hmanga chhem a, a hmui inkhar dan mila “Mama” ti thei a siamchhuak tawh bawk.

Hetianga naupangte a nih lai pawh hian pianpui thiamna a nei tha hle a. A nu kaihhruaina azarah art, poetry leh music lam pawh a rawn tui chho viau a. Zirna mumal nei miah lovin Piano pawh a lo tum thiam leh mai a, an chhungkaw piano tumtu ber a ni ta nghe nghe. A aw han tihdanlam vel (voice tricks) a thiam hle a, inlengte hmaah pawh a in show ve nasa mai thin a ni awm e. A nu hi a bengchhet avangin ring tak leh chiang taka biak a ngai thin a, chu chuan Alexander-a chu a tha zawnga hruaiin, a thusawi reng reng a fiahin a chiang thin hle.

Kum 1965-ah Edinburg atangin London-ah an pem a.  A hma a a lo thawh tawhna Weston House-ah Alexander-a chu thawk lehin, a hunawl apiangah ri inhlanchhawn theih dan hmuhchhuah tumin experiment a bei vak vak mai thin a. A room atangin Sommerset College-a a thianpa room thlengin telegraph hrui a thlung a. Chumi hrui kaltlanga inbiak theih dan pangngai aia tha zawk hmuhchhuah tumin a bei nasa mai thin a ni.

Harsatna an tawk nasa

Kum 1867 chho ah chuan a hriselna a lo tha ta lo hle a. Chutih laiin a nau Edward “Ted” chu TB natna avangin khumbetin a lo damlo bawk a. Chumi hnu a a hriselna a rawn that leh deuh hnu chuan Sommerset College-ah Instructor hna a thawk a. Hetih hunlai atang hian a hming pawh A.G.Bell tia ziah a ching tan ta bawk. A nau duhtak chuan TB natna chu do zo lovin a boralsan ta a. A u, Melville chuan nupui neiin a indang ve ta bawk. Alexander pawh chu a hma lama a zir tawh chhunzawmin, University College, London-ah Degree lak tumin a zir chhunzawm leh a. Hetih chhung hi chu a chhungte khawhar awmpuiin in lamah pawh a han awm ve ren rawn a. South Kensington, London-a rualbanlo te school-a zaizira inbiak zirtirtu a pa chu a pui ve a. Vanduaithlak takin, kum 1870-ah a u, Melville-a, nupui neia chhungkaw din chho mek chu TB vang bawkin a boral leh ta.

Alexander Graham Bell and his family

A u boral  zet chuan an chhungkua a nghawng nasa hle a. Amah Alexander-a a lo hrisel lo bawk nen, hmun hrisel zawk nia an hriat lam panin kum 1870 August thla ah Brantford, Ontario, Canada-ah an pem ta vang vang mai a ni.

Canada-ah pawh hian an eizawnna chu a ngai tho a ni. A pa lehkhabu siam, zaizira inbiak dan hmang chuan hma a la chho zel a, hmun hrang hrangah lecture pe tura sawm a ni ve tan ta a ni. Kum 1872 alo thlen meuh chuan Boston-ah rualbanlote zirtirna school a hawng ve ta hial a. A zirlai lar tak pakhat chu Hellen Keller a ni!

Kawl a eng chho tan

Hetih hunlai pawh hian thir hrui kaltlanga inbiakna awlsam zawk siamchhuah tumin hma a la reng a. Vanneihthlak takin mechanic naupang tak, Thomas Watson-a nen an intawng a, an thawk dun ta nghe nghe. A experiment ngawrh zawka beih a duh avangin Boston-a a school pawh chu tihtawp mai a tum a. Zirlai pahnih chiah a kawl a, chung zirlai pahnih, bengchhet ve ve- kum 6 mi “Georgie” Sanders leh kum 15 mi Mabel Hubbard-te erawh chu a tana mi tangkai ber ber an ni ta.

George-a pa, sumdawng hausa tak mai Thomas Sanders chuan hmun nuam zawk leh experiment tih theihna tur remchang zawng a ngaihtuah sak a. Pakhat zawk, Mabel Hubbard nen pawh a hnu lawkah an innei zui ta nge nge a ni.

Experiment a tih lai tak tak chuan Chhun leh tlai lama class a lak zawhah a mu hmasa a, zan rei tawh hnuah tho lehin, a experiment chu a chhunzawm leh thin a. Chu thil chu miin an hria ang tih hlauin, dawhkan pawh a bik takin a siam a, awlsam taka a hmanrua thuhruk mai theih turin a siam hial a ni. Beidawng lova a beih rengna chuan rah tha chhuahin,  March 10, 1876-ah Telephone a lo hmuchhuak ta a ni.

Alexander Graham Bell hian University hrang hrang atangin Honorate Degree 6 zet a dawng a. Telephone a hmuhchhuah hnua Company a din, Bell Telephone Company hmangin Telephone lama sumdawnna lian tak a bei zui bawk.

TELEPHONE HMUCHHUAKTU NIH INCHUHNA

Kum 1875-ah chuan experiment hrang hrang a tih hnuah telegraph hmanga ri thawn theih dan chu hmuchhuak ta in a inhria a. Neitu nihna/hauh bik theihna nei turin hma a la ta nghal a. Amaherawhchu, a ukil-in England-in ram dang atanga patent pekchhuah tawhte a pekchhuah nawn ngai loh avangin England-a patent tih hmasak tha a ti a. Chumi hnuah US-ah chuan thehluh chauh nise an ti a ni.

Hetihlai vel bawk hian Scientist pakhat, Elisha Gray chuan telegraph wire hmang tho sia water transmitting hmanga sound thawnchhuah dan experiment a lo bei ve nasa mai bawk a. Feb.14, 1876-ah a thilsiamchhuah chu kengin US Patent Office-ah neitu nih dilna chu a thehlut ta a. Amaherawhchu, chumi hma lawk, darkar khat emaw lekah Alexander Graham Bell-a Ukil chuan application a lo thehluh hman tawh si avangin March 7, 1876-ah chuan US patent Office chuan Bell-a tan Patent chu a pechhuak ta a ni.

He lehkha pekchhuah ni hian Bell-a pawh Boston lamah let lehin hna a thawh chhunzawm leh nghal a. A notebook-a a ziah, Gray-a hmuhchhuah liquid transmitter ang chuan a thil hmuhchhuah chu a siam chhunzawm a. Hei hi chu a hmaa a lo siam ai khan a lo awlsamin, transmitter hmang chuan room leh lama awm Watson-a chu a tira kan ziah ang khan a va be thei ta a ni.

Elisha Gray-a thiamna a ru em?

Hetia Gray-a thilsiam design hmanga Telephone a siamchhuak ta zawk hian mi thilsiam ru a puhna a tawng nasa ta mai a. He ngaihdan hi tun thleng hian a la reh thei lo. Amaherawhchu, March 1876 hnu lawkah chuan a Telephone hmuhchhuah chu electromagnetic hmanga thlak dan a hmuhchhuah leh nghal mai avangin Gray-a liquid transmitter chu a hmang chhunzawm leh ta chuang lo.

 

Patent examiner, Zenas Fisk Wilber chuan affidavit an siam lai vel hian zu a heh hle tih sawiin, Bell-a ukil Marcellus Bailey chu Civil war laia a thawhpui, a lei tamtak a lo bat tawh a ni tih a sawichhuak a. Gray-a thilsiam chu Bailey-a a entir ngei thu leh, Bell-a pawh a hnuah a entir leh thu leh Bell chuan $100 a pek thu  a sawi a. Bell-a erawh chuan patent chungchang chu an sawi ngei thu leh Gray-a patent chu a zirchian ngei thu chu pha lo mah se, pawisa a pek thu erawh chu a pha thung.

Hemi hnu kum 18 chhung hian Bell Telephone Company chuan telephone right chuhpuina thubuai 600 zet an nei hman a. Amaherawhchu, an patent erawh chu tuman an chhuhsak thei ta lo.

Kum 1922 Aug.22-ah Alexander Graham Bell chu ama chenna Beinn Bhreagh, Nova Scotia-ah kum 75 mi niin zunthlum avangin a boral ta a. A nupui duhtak, Mabel-in, “Don’t Leave me,”a tih lawm lawm pawh chuan a ko kir zo ta lo a ni.