Aizawl-ah Zirtirtu an tam; MZP-in semrual an duh

Mizo Zirlai Pawl (MZP)-in a hmun ngei a kal a sorkar enkawl school engemawzat an zirchianna atanga a lan danin Aizawl khawpui chhunga school thenkhatah chuan zirtirtu an tam hle a. School thenkhatah phei chuan zirtirtu pakhatin zirlai 2-te, 4 chauhte zirtir ang an ni.

MZP chuan July7, 2018 (Inrinni) khan Aizawl Press Club-ah Press Conference neiin, Mizoram Sorkar enkawl zirna in hrang hrang (Primary School atanga Higher Secondary School)-a Zirtirtu inkhairual lo lutuk chu tha lo an tih thu an sawi a. Thingltang lam hmun hrang hrangah zirtirtu indaihlohna a nasat viau laiin Aizawl-a school tamtakah zirtirtu mamawh aia tam an awm thu an sawi a ni. Hei hian zirna nasa taka  a tihchhiat thu sawiin, zirtirtu semrual hna thawk tura Sorkar a phut thu an sawi a ni.

MZP chuan Right of Children to Free and Compulsary Education(RTE) Act, 2009 in Pupil Teacher Ratio(PTR), zirtirtu pakhatin zirlai a zirtir tur zat a ruahman tarlangin, Primary-ah 30:1 (zirtirtu pakhatin zirlai 30) a ni a, Upper Primary (Middle School)-ah 35:1 a ni thung. Tin, Rashtriya Madhyamik Shiksha Abhiyan (RMSA) framework ah chuan PTR hi secondary level-ah 30:1 a ni bawk. Hetiang a nih lai hian Mizoram-ah chuan Pupil Teacher Ratio (PTR) hi Primary school ah 18:1 a ni a, Upper Primary (Middle School)-ah 9:1 a ni a, High School-ah 8:1 leh Higher Secondary School-ah 14:1 a ni thung a ni.

Directorate of School Education Statistical Cell –in a tarlan danin Mizoram puma school awm zat,zirtirtu leh zirlai awm zat bakah TPR (Zirtirtu pakhatin zirlai a zirtir zat) chu hetiang hi a ni :

Mizoram a school, zirtirtu leh zirlai awm zat bakah TPR (Teacher Pupil Ratio)

Heti zozai zirtirtu an awm chunga thingtlang lama zirtirtu an indaih lo reng mai chu MZP chuan mak an tih thu an sawi a. Zirtirtu awmsa semrual chungchangah hian School Education Minister leh Chief Minister pawh an sawipui tawh thu leh hma la tura an ngen tawh thu sawiin, tun thlenga zirtirtu sem rual a la ni lo chu sorkarin hma a lak loh vang ni a an ngaih thu an sawi bawk.

MZP chuan tunhnaia Aizawl khawpui chhunga School hrang hrangte a hmun ngeia tlawh a an zirchianna report an tarlang bawk a. Hetiang hi sorkar school thenkhata zirlai leh zirtirtu awm dan a ni:

Aizawl khawpui a sorkar enkawl school thenkhata zirtirtu leh zirlai awm zat leh Zirtirtu pakhatin zirlai an zirtir zat – MZP

Hetianga Aizawl a zirtirtu an indaih viau lai hian MZP a in report thingtlang lama Primary school 11 te chuan zirtirtu pakhat (1) chiah an nei a. Heng zirtirtu pakhat neite hian zirlai 42 te, 45 te an nei thung. Tin, thingtlang lama Primary school 45-te chuan zirtirtu 2 chiah an nei a, Primary school 30 te chuan zirtirtu 3 chiah an nei bawk a ni. Tin, Thingtlang Middle School leh High School tamtakah zirtirtu an indaih lo hle bawk.

MZP chuan an hnena report lut atanga an hriat dan tarlangin, Middle School bikah hian Hindi teacher nei lo school 237 an awm thute, an hriat theih china Middle School, Headmaster nei lo 105 an awm thute, Primary school-ah Head Teacher nei lo 25 an awm thute, High School Headmaster nei lo 12 an awm thute an tarlang bawk a. Tin, Zirtirtu tura lak ni si School Education Department Office hrang hranga awm (attach) an thahnem hle tih leh, zirtirtu lak thar, thingtlang lama post ten an thil tihtheihna hmangin transfer an dil nasa hle niin an tarlang bawk.

MZP chuan zirtirtu tura lak, office hrang hranga attach a awm te chu an awmna tur hmunah kal turin an ngen nghal a. Zirtirtu awmsa semrual chungchangah hian MZP-in na taka hma a lak tur thu sawiin, zirtirtu awm sa rualkhai taka thingtlang leh khawpui school-ah te semrual an nih loh chuan a tul  ang anga na taka hma an lak zel tur thu an sawi a ni.