2018-2019 atana Admission ti thei lo turin India rama Medical College 82 hrem mek an ni, Medical College thar din rawtna 68 hnawl a ni bawk

Medical Council of India (MCI) rawtna angin sorkar laipui a Health Ministry chuan India rama Medical College 82 chu kum 2018-2019 session atana admission thar la thei lo turin a dang mek.

Medical Council of India (MCI) hian heng Medical College-te an tlawh tuma an tlin tawk lohna hrang hrangte hi an tarlang a. Chung zingah chuan infrastructure lama duhthusam tawk lohna te, faculty lama an tlin lohnate leh thil dang engemawzat a tel a ni.

“MCI lamin an endikna a an tlin lohna engemawzat an hmuh avangin heng Medical College-te hi session thar 2018-2019 atana admission ti thei lo tura tih an ni a. Heng an tlin lohnate hi infrastructure lamte, faculty lamte leh thil chi hrang hrangah a ni” tiin Health Ministry Official pakhat chuan a sawi.

Admission ti thei lo tura tih mek Medical College 82 zinga 70 chu private medical college an ni a, 12 chu sorkar college a ni thung. Heng medical college zingah hian India rama MBBS zir theihna college lian tak takte an awm hlawm avangin India ramin MBBS seat 64,000 vel a neih mek zinga seat 10,430 velah admission a tih theih dawn rih loh tihna a ni.

Official-ten an sawi zel danin Medical College thar 68 dinna tura rawtna awmte chu hnawl an ni bawk a. Heng zinga 31 chu sorkar din tum niin, 37 chu private an ni thung. Hnawl tak zinga 4 chu Bihar a mi an ni a, 2 chu West Bengal a mi an ni thung. MCI Official pakhat chuan, “College-in a mamawh tur ngaihtuah leh chhut lawk miah lovin mi hian Medical College din hi an tum ringawt thin a  ni” a ti.

Hetih lai hian February 2018 khan Union Cabinet chuan kum 2021 atanga tan theih turin sorkar enkawl Medical College 24 din nise tiin an lo rel tawh a. Kum 2019 atangin District Hospital hrang hrang behchhanin medical college 58 din nise an lo ti tawh bawk.